قىزعانىشتىڭ قىرىق دوسى بار

  • كەلۋ قاينارى: شينجياڭ زاڭ جانە گازەتى
  • 04:24:34 20/04/2017

    

    قىزعانىش سەزىمى قىز بەن جىگىتتىڭ سۇيىسپەنشىلىگى تەرەڭدەپ، بەلگىلى ءبىر دەڭگەيگە بارعاندا تۋىلاتىن تابيعي قۇبىلىس. ەرلى - زايىپتىلاردىڭ ءبىر - ءبىرىن قىزعانۋى تابيعي نارسە، دەگەنمەن، قىزعانۋدىڭ دا ءوز ءجونى، ءوز رەتى بولادى.

    سۇيگەنىن بولماشى نارسەدەن قىزعاناتىن ادامدار نەگە جامان ويلايدى؟ قىزعانىش سەزىمى ادام بويىندا ەشقاشان جالعىز جۇرمەيدى. ونىڭ ءوز سوڭىنان ەرتىپ جۇرەتىن تاعى بىرنەشە «دوسى» بار. ولار قانداي «دوستار»؟ قىزعانىشتىڭ ارعى جاعىندا تاعى قانداي سەزىمدەر بار؟

    رەنىش. قىزعانىشقا بوي الدىرىپ، سىڭارىنىڭ سەزىمىنە كۇمان كەلتىرىپ، سەنىمسىزدىك تانىتقان ادامدار ادەتتە رەنجىگىش كەلەدى. ونىڭ ىشكى جان- دۇنيەسى رەنىش پەن وكپەگە تولى بولادى. رەنىش جۇرگەن جەردە ماحابباتتىڭ تاڭى شۋاقتى، سەزىمدەردىڭ ءدامى ءتاتتى بولمايدى.

    سەنىمسىزدىك. قىزعانىش سەنىمنىڭ بەرىك بولماۋىنان پايدا بولادى. سەنىم سەزىمدەرگە تىرەك بولعاندا عانا سۇيگەنىڭىزدى قىزعانۋدى دوعاراسىز. ونى جوق نارسەدەن قىزعانىپ، ءار ءسوزىن وتىرىككە ساناپ كۇمان كەلتىرە بەرسەڭىز، ءسىزدىڭ سەنىمىڭىزدىڭ كۇلى كوككە ۇشقانى.

    وزىمشىلدىك. قىزعانىشقا بوي الدىراتىن جاندار كوبىنە ءوزىمشىل بولىپ كەلەدى. ولار تەك ءوز سەزىمدەرىنىڭ جەتەگىندە عانا جۇرەدى. ولار سۇيگەنىنىڭ تەك وزىنە عانا سويلەپ، تەك وزىنە عانا كۇلىمسىرەگەنىن قالايدى. سويتەدى دە ونى تىلدەسكەن كەز كەلگەن ادامىنان قىزعانا بەرەدى.

    جەك كورۋ. ءسۇيىپ تۇرىپ جەك كورۋ سەزىمى ءسۇيۋدىڭ ءمانىن بىلەتىندەرگە جاقسى تانىس. سەبەپسىز قىزعانۋدان شارشاپ، ءبىر - ءبىرىنىڭ جۇيكەسى مەن جۇرەگىنە سالماق سالعان ەكى جاس ءبىرىن - ءبىرى جەك كورە باستايدى. قىزعانىشتىڭ سوڭى جەك كورۋشىلىككە اپارىپ سوعادى.

 

جاۋاپتى رەداكتور: جازيرا بولاتباي قىزى