كۇندەلىكتى ويلار

  • كەلۋ قاينارى: ىلە كەشى گازەتى
  • 08:43:30 25/07/2017

    لەۆ تولستوي

 

    * كەشە شىنايى سەزىم جايلى اڭگىمە بولدى. ءتۇيىنى مىناۋ: كورەگەندى، ادامگەرشىلىك كەلبەتى قالىپتاسقان ادام شىنايى سەزىمدى كورە الادى. ۇيلەنگەن نەمەسە ايرىلىسقاندار – اشۋلانعان ادامداي ونىمەن كۇرەسە باستايدى، ورتانقولدار مەيىرىمدىلىككە بالاپ قىزىعادى ، مۇلدە ادامدىق بەت – بەينەسى قالىپتاسپاعان پەندەلەر ونى تۇسىنگىسى دە كەلمەيدى، ءتىپتى ميىقتان كۇلەدى.

    * ەگەر ءار كىم ءوز ءۇيىنىڭ ەسىك الدىن سىپىرار بولسا، بۇكىل كوشە تازالانار ەدى.

    * الەم قايعى – قاسىرەت جۇتقاندارعا قۇرمەت كورسەتە بىلگەندەر ارقىلى العا جىلجيدى.

    * ەڭ ۇلكەن اداسۋشىلىق ادامداردى ءبىر جاقتى باعالاۋ. ولاردى مەيىرىمدى نەمەسە اشۋلانشاق، اقىماق، اقىلدى دەگەن وي قالىپتاستىرۋ. ادام اعىس سەكىلدى اعىپ وتىرادى، وندا بۇل قاسيەتتەردىڭ بارلىعى دا كەزدەسەدى. كەيدە اقىماق، كەيدە اقىلدى، كەيدە اشۋلانشاق، كەيدە مەيىرىمدى بولادى نەمەسە كەرىسىنشە. بۇل – ادامنىڭ ۇلىلىعى. ءسىز ونى ءبىر جاقتى باعالادىڭىز دەلىك، ال، ول قازىر مۇلدە وزگەرگەن، وزگە ادام! «جاقسى كورمەيمىن» دەۋگە بولمايدى. ءسىز سولاي دەگەنىڭىزبەن، ول قازىر مۇلدە وزگە...

    * شىنايى اقيقات – وتە قاراپايىم.

    * تاڭەرتەڭمەن ماڭىزدى ءارى تۇشىمدى ويلار كەلدى. ەندى سولاردى ۇمىت قالدىرعانداي الاڭداۋ ۇستىندەمىن. ەسكە ءتۇسىرىپ كورەيىن: ادام ءوزىن تانىماعانشا ءولى نە ءتىرى ەكەنىن بىلمەيدى، ويتكەنى ول ءالى ءتىرى ەمەس. ءتىرى ادام رەتىندە تانىمىن سەزىنگەن شاقتا تىنىمسىز ءوزىن سۇراقتىڭ استىنا الا باستايدى. نەگە عۇمىر كەشىپ ءجۇر؟ جاۋابىن ىزدەۋگە كوشەدى. ءبىر جاۋاپتىڭ پۇشپاعىنا جەتكەنشە جانى تىنىش تاپپاق ەمەس.

    * ادامدار كوبىنە مولشەرلى اقىلعا يە بولعانى ءۇشىن عانا اپپاق ارىمەن ماقتانعىش كەلەدى.

    * ادام ءارقاشان باقىتتى بولۋعا ءتيىستى، ەگەر ونى جوعالتىپ السا، قاي جەردە قاتەلەسكەنىن قاراسىن.

    * جاستاردان «مەن وزگەنىڭ اقىلىمەن جۇرگىم كەلمەيدى، ءوزىم ويلانا الامىن» دەگەندى ءجيى ەستيمىز. ويلانىپ، سۇبەلەنىپ قويعان دۇنيەلەردى قايتا ويلانىپ نە كەرەك. دايىن دۇنيەنى ال دا، العا جورتا بەر! ادامزاتتىڭ كۇشى وسىندا.

    * ەڭ ۇلكەن اداسۋ – ەشتەمە دە ىستەمەستەن باقىتتى كۇتۋ.

    * ماسەلە كوپ بىلۋدە ەمەس، ەڭ ماڭىزدىسىن بىلۋدە.

    * ويىن ويناۋ ءۇشىن قارىن توق بولۋ قاجەتتىلىگى تۇسىنىكتى. قوعامنىڭ ءار مۇشەسىنىڭ قارىنى اشپاعان كەزدە عانا ولار ونەرگە دەن قويا الادى. ەگەر قوعام مۇشەلەرى توق بولماسا، ناعىز ونەر وركەن جايماق ەمەس. سالعىرت ونە – كەسكىنسىز، اش قوعامداعى ونەر – دورەكىلەۋ، وكىنىشتى...

    * ادام وزىنە جاقىن تاقىرىپ جايلى اڭگىمە قوزعاعاندا، تىڭداۋشىنىڭ وزىندەي ەمەس ەكەنىن ۇمىت قالدىرادى. ەگەر ادامدار ءوزىن شىنايى الاڭداتقان، نەمەسە رۋحاني دۇنيەنى ءسوز ەتپەسە، مىندەتتى تۇردە جەكە باسى جايلى كوپ سوزدىلىككە ۇرىنادى. البەتتە، بۇل وتە كوڭىلسىز.

 

جاۋاپتى رەداكتور: جازيرا بولاتباي قىزى