ومارعازىنىڭ ويلى دا تاپقىر ورالىمدارى

  • كەلۋ قاينارى: ىلە كەشى گازەتى
  • 04:10:38 06/09/2017

  

    ومارعازى ايتان ۇلى-ەلىمىز قازاق ادەبيەتىنىڭ پوەزيا، پروزا، درامما سىندى ءۇش جانرىندا بىردەي بيىككە كوتەرىلگەن تالانتتى قالامگەرى، ءومىرى قيلى جىلداردا وتسە دە، تۋعان حالقىنا سارا تۋىندىلاردان ون توم ۇسىنىپ كەتكەن قارىمدى قالامگەر ەكەنى ايان. ومىكەڭنىڭ سوزگە ءسوز كەلگەندە ايتىپ قالاتىن تاپقىرلىعى دا بار ەكەنىن بىرگە بولعان قالامداستارى اڭگىمە ەتىپ وتىراتىنىن بىلەمىن. اسىرەسە، شايسۇلتان قىزىر، باتىرحان قۇسبەگين، ءشامىس قۇمار ۇلى سىندى حالقىمىزدىڭ وتكەنى مەن كەتكەنىن بەدەرلەپ، ۇلتىمىز تاريحىن كەلەشەك ۇرپاق كوڭىلىنە ۇيالاتقان مول ءونىمدى اعالاردىڭ اۋزىنان ارا-تۇرا ەستىپ قالىپ جۇرەتىنمىن. ەندى، سول ءبىر ءساليقالى ساتتەردەگى كەڭەستەردەن ەستە قالعان، ءبىر تۋار ومارعازى ايتان ۇلىنىڭ ويلى سوزدەرى مەن تاپقىر ازىلدەرىن وقىرماندارمەن جۇزدەستىرۋدى ءجون كوردىم.

    -جەڭىس ىرىسحان ۇلى

    ** ** **

    سەكسەنىنشى جىلداردىڭ باسىندا ومارعازى ايتان ۇلىنىڭ وتباسىنا اسقار تاتاناي ۇلى مەن ماعاز رازدان ۇلى كەلىپ قوناق بولىپتى. حالچام قوناقتارىن بايەك بولىپ كۇتىپتى. قولعا سۋ قۇيىلىپ، الدىعا تاباق كەلگەندە قاراسا تاباقتا ەكى جامباس تۇر دەيدى. قوناقتار جامباسقا ءبىر، ومىكەڭە ءبىر قاراپتى. سوندا ومىكەڭ:

    -سارمايداي ساقتاعان ەكەۋىڭە ارناعان جامباستار بولاتىن، ونىڭ ۇستىنە بىلتىر دا قوناققا شاقىردىم، كەلە المادىڭدار، مىنانىڭ ءبىرى بىلتىرعى جامباستارىڭ، ءبىرى بيىلعى جامباستارىڭ،-دەپ جال تاۋىپ، حالچام اپايدىڭ بولىمسىز اعاتتىعىن جابا توقىپ بىلدىرمەي كەتىپتى.

    ** ** **

    حالشام جەڭگەي ومارعازى دەگەنگە ءتىلى كەلمەي «يمەرعازى» دەيدى ەكەن. راحمەتوللا اپشە ۇلى حالچامعا:

    -ومارعازى دەپ دۇرىستاپ ايتساڭشى، يمەرعازىڭ نە؟-دەپتى.

    سوندا ومارعازى:

    -حالشام دۇرىس ايتادى، مەن ءبىر دايىن قازىمىن عوي ءارى ساۋلى قارا ىنگەنمىن حالچام قانشا ەمسە دە تاۋسىلمايتىن،-دەپتى. ومىكەڭ ەڭبەكاقىسىن حالشام باسقاراتىنىن ىممەن ايتىپ.

    ** ** **

    ماعاز اعا ومارعازىعا:

    - «ەكى تەكەنى ءسۇزىستىرىپ» اكەلىپ، «تۇيەلەردى» توبىمەن اكەلىپ، «اڭداردى شادىرلاتىپ اتىپ»، ولجاڭدى «وتكەلەكتەن» امالداپ وتكىزىپ، «جىلدار سورابىمەن» تارتىپ وتىرىپ ادەبيەت بازارىنا اكەلىپ، «تارازىلاپ» ساتىپ، ونى «اق مىسىققا» قاراتىپ قويىپ جاتىرسىڭ با؟-دەپ قالجىڭداپتى. سوندا ومىكەڭ ۇستىندە:

    -«تاي بولىپ جوعالىپ، تارلانداپ تابىلىپ»، «سارى بەلگە» كەلىپ كوسىلىپ، ەندى «التايدىڭ اقيىعى» بولىپ سامعاعالى قاناتىڭىزدى قومداپ تۇرسىز با؟ -دەپتى.

جاۋاپتى رەداكتور: گۇلدەن ماقسات قىزى