ءبىزدىڭ ابە اعا

  • كەلۋ قاينارى: ىلە گازەتى
  • 04:25:19 11/09/2017

     (ەسسە)

    ياسىن جۇپبايەۆ

 

    ول كەزدە ءبىزدىڭ ابە اعا جيىرمانىڭ ىشىندەگى جاپ–جاس جىگىت ەدى. سوعان قاراماستان ءوز تۇستاستارى نە وزىنەن كىشىلەرمەن ەمەس، وزىنەن ۇلكەندەردىڭ قاق ورتاسىندا وتىرىپ اڭگىمە ايتاتىن. ال قالعاندارى ۇيىپ تىڭداسىپ وتىراتىن ەدى. مەكتەپتە وزىنەن ۇلكەن مۇعالىمدەرمەن، قوعامدا قىستاعىمىزداعى وزىنەن ۇلكەن كىسىلەرمەن اڭگىمەلەسىپ وتىراتىن. نە جونىندە ايتىىپ وتىرادى ەكەن، ايتەۋ اندا–ساندا وتىرعان توپ قىران كۇلكىگە باتاتىن ەدى. كوپ وتپەي مەكتەبىمىزدىڭ پيونەرلەر قىزمەتىنە جاۋاپتى بولىپ، اپتا سايىن قيمىل وتكىزىپ تۇراتىن. سونداعى قيمىلدىڭ ءبىرى–ءبىزدىڭ ەڭ ۇناتاتىن قيمىلىمىز «جايناعان قىزىل جۇلدىز» دەگەن كىتاپتى وقىپ بەرۋشى ەدى. پان دوڭزىنى ءبارىمىز جاقسى كورەتىن ەدىك، حۋ حانسانعا كەكتەنۋشى ەدىك. ءبىز كىتاپ تىڭداپ وتىرعان ادام ەمەس، كىتاپتىڭ ىشىندە جۇرگەن ادام سەكىلدى ەدىك. مۇمكىن، مەنىڭ مەكتەپتەس–ساباقتاستارىم عانا ەمەس، زامانداستارىم دا پان دوڭزىنى سۇيىكتى كەيىپكەرى رەتىندە ءالى دە ۇمىتا الماعان بولۋلارى كەرەك. ءبىر كۇنى ءبىزدىڭ ابە اعا سىرتقا كەتكەندىكتەن پيونەرلەر وتريادىنىڭ قيمىلىن باسقا ۇستازىمىز ۇيىمداستىردى.

    _ پيونەرلەر قيمىلىندا نە ىستەۋشى ەدىڭدەر،–دەپ سۇرادى ۇستازىمىز.

    _ مۇعالىم بىزگە كىتاپ وقىپ بەرەتىن.

    _ نە كىتاپ؟

    _ پان دوڭزى.

    _ ؟

    كىتاپتى تاۋىپ كەلدىك. مۇعالىم وقي باستادى.

    _ قازاقشا وقيتىن بۇرىن،–دەپ شۋلاستىق.

    نە كەرەك، كىتاپ ءبارىبىر ۇيعۇر تىلىندە وقىلدى. سول كەزدە عانا ءبىز ابە اعامىزدىڭ ۇيعۇر تىلىندەگى كىتاپتى ەش مۇدىرمەي، كىدىرمەي قازاق تىلىندە وقىپ بەرەتىنىن ۇقتىق. مۇنداي كىتاپتى ءبىز بۇرىن وقىپ كورگەن جوق ەدىك. كەرە قارىس كەڭ ماڭدايلى، ءبيداي ءوڭدى، تۇنىق داۋىستى بۇل كىسى ءبىزدىڭ ۇيتقىمىز ەدى. بۇل ءبىزدىڭ ابە اعانىڭ بىزگە قالدىرعان العاشقى اسەرى بولاتىن.

    وسىدان كوپ وتپەي ءبىزدىڭ كلاسقا جەتەكشى مۇعالىم بولا ءجۇرىپ، ءتىل–ادەبيەت، ماتەماتيكا، جاعراپيا، قازاق ءتىلى گراماتيكاسى سياقتى ساباقتاردى وتە ءجۇرىپ، ورتالاۋدىڭ سوڭعى جىلدىعىنا دەيىن ۇستاز رەتىندە بار ءبىلىمىن ايامادى، اعا رەتىندە اقىل–كەڭەسىن ايتىپ، ادامدىققا جەتەلەپ وتىردى. كەيىن قوعامنىڭ قاجەتى بويىنشا اكىمشىلىك سالاعا، باسشىلىق قىزمەتكە اۋىسقانىن ەستىگەنىمدە، اتتەگەن–اي، دەگەنىم ەسىمدە.

جاۋاپتى رەداكتور: گۇلدەن ماقسات قىزى