پوەزياداعى كوركەمدىك تۇيسىك تۋرالى

  • كەلۋ قاينارى: ىلە گازەتى
  • 03:19:30 12/11/2017

    مامەتتۇرسىن اسەن

    ۇيعۇر تىلىنەن اۋدارعان نۇربولات ءابدىقادىر

    

    پوەزياداعى كوركەمدىك تۇيسىك تەك جالعىز اقىننىڭ عانا وبيەكتيۆ سۇلۋلىقتى ارقاۋ ەتىپ، سوبيەكتيۆ سۇلۋلىققا تالپىنۋىمەن شەكتەلمەيدى. ول ءاربىر جۇمىر باستى پەندەنىڭ ساياسي، فيلوسوفيا، ءدىن، ادامگەرشىلىك، تۇرمىس، كوركەمونەر، ءوندىرىس جاقتارىمەن تامىرلاسادى. ادامزات قوعامى ۇزدىكسىز وزگەرىپ وتىرادى. جەكەنىڭ جان دۇنيەسى كەڭدىك ءھام تەرەڭدىكتەن ەندى بارعان سايىن احيقي شىندىققا جاقىنداي تۇسەدى. ياعني ءوزىنىڭ باقىتى، كەلەشەگى ءۇشىن شىت جاڭا شىعار جول ىزدەۋگە باستايدى. دەمەك كىم–كىم دە ءوزىنىڭ ىشكى رۋحاني كۇشىنىڭ جەتەگىمەن ءومىر سۇرەدى. كوركەمدىك تۇيسىك ادام قۇلاش سەرمەپ جەتپەك بولعان ەڭ بيىك كەڭىستىك. اقىن سونداي–سونداي وقىرماندارداعى كوركەمدىك تۇيسىكتى شەبەر تىلمەن ادەبي بەينەلەۋ ارقىلى ولاردىڭ جانىنا قۋات باعىشتاپ، جۇرەكتەرىنە سەنىم ۇيالاتپاق. اقىندارداعى بار كوركەمدىك تۇيسىك قوعامدىق ءومىر ءامالياتىنان بارىپ پايدا بولادى. اقىن كەيدە رەال تابيعاتتان تويات اپ، وزىنشە وي قورىتىپ، ءوزى تانىعان سۋرەتتى سوزبەن سىزادى. اقىننىڭ ءىسى دەرلىك شىندىقتى شىرايىنا كەلتىرىپ، سەزىم تۇيسىگىن قاعازعا ءتۇسىرىپ، سوڭىنا سول تۇيسىنگەنىن وبرازعا بولەۋدەن تۇرادى. پوەزياداعى كوركەمدىك تۇيسىكتىڭ قۇنى اقىنداعى كوركەمدىك تۇيسىكتىڭ كۇشتى–السىزدىگى مەن جوعارى–تومەندىگىنەن ايقىن كورىلەدى. اقىن ولەڭدى كوركەمونەر مەن ءومىردى، وبيەكتيۆ تۇرمىس پەن سوبيەكتيۆ مەن ورتاسىنداعى بايلانىستى تىعىز كىرىكتىرمەكتى ماقسات ەتكەن تۇرعىدا جازادى. راس ءومىر مەن ادەبيەتتەگى ءومىردى توعىستىرعان اقىن ولەڭدەرى كوركەمونەردىڭ اسىل كۇشىن جاريا ەتەدى. وسى ماعىنادان العاندا، اقىنداردىڭ الەمىن تارايتپاي، ولاردى شابىتتاندىرىپ، ونەردەگى ءوسۋ جولىنا باعىت–باعدار نۇسقاپ وتىرعاندا ءجون.

    قازىرگى كەزدەرى ۇزبەي جاريالانىپ جاتقان ءبىر ءبولىم جىرلاردىڭ مازمۇنى تىم–تىم ولەز بولعان سوڭ، ونى وقىعان كىسىنىڭ كوڭىلى قۇستارىنان ايىرىلعان كولدەي بوپ تاۋسىلا قۇلازيدى. ماسەلەن، ماحاببات تاقىربى نەگىزىندەگى ليريكالاردى الايىق، ولەڭ بىردەن ءوز پەرسوناجىن ءوزى لەزدە قارعاپ–سىلەپ، وعان اشكەرە وكپەلەپ، سۇيگەنىنە مىندەتسىپ قالىپ جۇرەدى. جىردىڭ باسى كوپ–كورىم جاقسى باستالىپ، اقىرى جۇتاۋعا باستاپ، رۋحى وتە ءپاس بوپ، ءبىر ءتۇرلى بەيشارا حالدە ءۇمىتسىز اياقتاعانىن كورسەڭ! مۇنداي ءۇمىتسىز، ءيىنى تۇسكەن ماتىندەر ساحنالاردا، ءتىپتى، «انگە» اينالىپ، ول انشىلەر تاراپىنان ايتىلىپ، اينالاعا جامىراۋدا... ءبىزدى بۇل ويلاندىرماي قويمايدى. ايتالىق، «ەندى قايتتىم؟»، «ءاي، ماحاببات! تەگى سەن قايدا ءجۇرسىڭ؟» دەگەن سەكىلدى كوبىكتەي كوپ ءان اۋەندەرى سوزىمىزگە مىسال بولادى. وقىرمان ەش ۋاقىتتا ءوز رۋحىن ءتۇسىرىپ، ءوزىن ۇمىتسىزدەندىرۋى ولەڭ وقىمايدى، كەرىسىنشە جۇرەگىنە سەنىم ۇيالاتۋ ءۇشىن، ءۇمىت ۇشقىنىن لاۋلاتىپ، راداسىن بەكەمدەۋ ءۇشىن، سونداي–اق ءومىر شىندىعىن تانۋعا سەبى تيسە دەپ ولەڭ وقىسا كەرەك–تى. بارىمىزگە ءمالىم، تيىپجان اليەۆتىڭ جىرلارىن وقىرماندارىنىڭ سونشالىقتى جانى ءسۇيىپ وقۋلارىنىڭ سەبەبى – تىلگە جەڭىل، حالىقتىق ءمانى تەرەڭ، اسەرى بولەك، ەرەسەن اۋەزدى بولىپ كەلەدى ءارى كەلەشەكتىڭ الاۋ وتى جالقىندايدى. كوڭىلگە شاتتىق، تۇگەسىلمەس ءۇمىت، سەنىم مەن رادا باعىشتايدى.

جاۋاپتى رەداكتور: جازيرا بولاتباي قىزى