ونەر ساحناسى − ونەگە مەكتەبى

  • كەلۋ قاينارى: ىلە گازەتى
  • 04:09:51 27/11/2017

    _ دەمەك ونەر ادامى ساحناعا شىعۋ ءۇشىن ۇلكەن دايىندىق بولۋ كەرەك بولدى عوي؟

    _ ارينە، ساحناعا شىعۋدى كوكەيىڭە العاننان كەيىن ءوز باسىم ويىن–تويدان، كۇلكى، ساۋىقتان تيىلىپ، بار اقىل–ەسىمدى ءان جاسامپازدىعىنا ارنايمىن، ءان ءسوزىنىڭ يىرىمىنە بويلاپ، اۋەنىنە بۇكىل اقىل–ەسىممەن قۇنىعا كىرىسەمىن. بۇل جاتتىعۋ ايتارعا وڭاي بولعانىمەن، ەڭ قيىن، ەڭ تىنىشتىقتى، ەڭ كوڭىل نۇكتەسىن تابۋدىڭ ءساتى. ول ورەگە جەتكەننەن كەيىن تىڭدار قۇلاق سەنى كوككە اۋەلەتەدى. بۇل ءۇشىن داۋىستى قورعاۋى كەرەك. ءانشىنىڭ ءوز داۋىسىن قورعاۋى ونەردەگى ءومىرى مەن ونەرىن قورعاعاندىق بولادى.

    _ ءانشى بولعان ادام داۋىستى قورعاۋى كەرەك دەگەندى جاس ۇرپاق انشىلەرگە قالاي تۇسىندىرەسىز؟

    _ ونەر ساحناسىندا جۇرگەن انشىلەر ءۇشىن داۋىستى قورعاۋ ەڭ قاراپايىم ءارى ەڭ بيىك ولشەم. ويتكەنى قازىرگى ەكونوميكالىق نارىق بيلەگەن ساتتە، كەيبىر جاس انشىلەردىڭ ورىنداعان ءانىنىڭ كەلەسى جۇرەككە جەتپەي تۇنشىعاتىنىڭ سەبەبى انشىلىك داۋىستىڭ ونەر ادامىنا سيلار بيىگىن تۇسىنبەگەن شالاعايلىعى دەپ بىلەمىن. ءوز باسىم تاماعىمدى جىلى ۇستايمىن، نەگە دەيسىز عوي، ءاندى كوككە اۋەلەتەتىن داۋىسىڭ سۋىققا جاۋراماۋى، ىستىققا كۇيمەۋى كەرەك. ال ەكىنشىدەن داۋىستى زورلاماۋ كەرەك. داۋىسىڭ جەتپەيتىن انگە قۇلاش سەرمەپ، ساحناعا شىعۋ داۋىس پەردەڭدى بۇلدىرەدى ءارى كورەرمەننىڭ كوڭىلىن سۋىتاسىڭ. دەمەك ءارقانداي ءبىر ونەر يەسى ءارقاشان بويىنداعى بار ونەرىن ۇكىلى بايگە اتىنداي ايالاپ، ۇستىنە شاڭ قوندىرماي بابىنا كەلتىرىپ باپتاپ ماپەلەپ وتىرۋى كەرەك.

    _ ونەر ساحناسىندا بۇلبۇل كومەي ءانشى اتاعىن العان ءانشىسىز، كوپ ادامنىڭ قولى جەتە بەرمەيتىن ءان ونەرىنىڭ بيىگىنە جەتۋىڭىز وڭايعا تۇسپەگەن شىعار؟!

    _ ارينە، وتباسى تاربيەسىنىڭ جەتەكشىسى بولعان مەن ءۇشىن وڭاي بولعان جوق انشىلىك ونەردىڭ بيىگىنە شىعۋ. انا بولعان ادام ەڭ الدىمەن ۇرپاقتى ونەگەلىلىككە تاربيەلەۋ كەرەك. سوسىن، بويىڭداعى ونەردى ۇشتاۋمەن بىرگە، جانۇيانىڭ بەرەكەسىن كوز قاراشىعىڭداي قورعاۋىڭ كەرەك. بۇل مىندەتتەردى انالىق مەيىرمەن، انالىق كوڭىلمەن اتقاراسىڭ. ونەر ساحناسىندا بويىمدا بار تالانتىمدى ايگىلەۋىمە قوساعىم ءجۇمادىل ماماننىڭ ەڭبەگى ەرەن بولدى. جۇكەڭ حاس ونەردىڭ ادامى بولعاننان كەيىن دە مەنىڭ ونەرىمە ءورىس، كوڭىلىمە قانات بولا ءبىلدى. شىن نيەتىمەن ونەرگە بەرىلىپ، ءان ايتۋ جاتتىعۋلارىن جاساۋىما، ساحناعا شىعىپ ءان شىرقاۋىما شابىت، جىگەر بەرىپ وتىردى. سول ءۇشىن كوپتەگەن اندەر وتباسىمىزدان اۋەلەپ ءان كوكجيەگىنە قوسىلدى دەپ ايتا الامىن.

    _ ونەرگە ونەگەلى وتباسى بولعان ءجۇمادىل مامان شاڭىراعىندا تاماشا–تاماشا اندەر اۋەلەدى عوي. سونىڭ ەستەن كەتپەس ەسكى كوزى قايسى دەپ ايتاسىز؟

    _ وتباسىمىزدان شىققان «قىزقۋار» ءانى جۇرت جۇرەگىنە جول الدى.

    _ ەندەشە، سول ءبىر تاماشا وتباسى شاتتىعىنىڭ كۋاسى بولعان «قىزقۋار» ءانى ەسىڭىزدە مە؟

    _ ارينە، ەسىمدە، كوكىرەكتەن شىققان شىعارمامدى قالايشا ۇمىتايىن.

    _ «قىزقۋار» ءانىن ايتىپ بەرەسىز بە؟

    _ جارايدى، تالابىڭدى ورىندايىن. ويتكەنى «قىزقۋار» ءانى بال باقىتتىڭ انگە اينالعان ونەر كوكجيەگى عوي.

جاۋاپتى رەداكتور: جازيرا بولاتباي قىزى