كەڭ بولساڭ كەم بولمايسىڭ

  • كەلۋ قاينارى: شينجياڭ گازەتى تورابى
  • 09:06:45 04/12/2017

    تۇرمىس بارىسىندا ءبىز ازدى - كوپتى باسقالاردىڭ كومەگىنە يە بولىپ تۇرامىز. مۇندايدا مىناداي جاعدايلار ۇنەمى كەزەسەدى: بۇرىننان جاقسى ءوتىپ كەلە جاتقان ەكى دوس كەيدە ءبىر كىشكەنتاي ىسكە بولا نەمەسە دوسىنىڭ ءوز قالاۋى بويىنشا بىتىرە قويماعان ىسىنە بولا ارازداسىپ، ەكەۋ ارا جاۋ بولىپ شىعا كەلەتىنىمىز بار. بالكىم باسقالاردىڭ جاساعان مىڭ مارتە جاقسىلىعىن ءبىر رەتكى ەسكەرۋسىز قالدىرعانىنا بولا الدىڭعى جاقسىلىقتارىن ۇمىت قالدىراتىن جاعداي بارلىق ادامنىڭ باسىندا بار كەمشىلىك بولۋى مۇمكىن

    باسقالاردىڭ سان مارتە كومەكتەسكەنىن بالكىم ءبىز ۇمىتىپ قالعان بولارمىز؛ الايدا سول كىسىلەردىڭ ءبىر رەتكى وتكىزگەن قاتەلىگىن ماڭگى ەستەن شىعارمايمىز. ءبىز باسقالاردىڭ كەمشىلىگى مەن قاتەلىگىن بايقاي قالساق بولعانى، سول قاتەلىككە شۇقشيىپ، سول ادامدى كورگەن سايىن جەك كورىپ، ىعىر بولامىزدا جاتامىز. الايدا باسقالاردا اينا سەكىلدى، ءبىز وعان قاباق تۇيسەك ول دا بىزگە قاباعىن تۇيەدى دە ءبىر- ءبىرىمىزدى جاقتىرماي وتەمىز. ءىس جۇزىندە تارىداي كەمشىلىك بىزگە تاۋداي كەمشىلىك بولىپ كورىنەدى دە، ءوزارا قاس جاۋعا اينالىپ، كوزگە شىققا سۇيەل بولىپ شىعا كەلەدى.

    باسقالار ءسىزدى كوزگە ىلمەگەن جاعدايدا دا، كەرىسىنشە ءسىز ونىڭ سىزگە جاساعان جاقسىلىعىن قاشان دا ۇمىتپاي، جاساعان جاقسىلىعى كىشكەنتاي بولسا دا، ونى كوڭىل قويماسىنا ءۇنسىز ساقتاپ، اشۋدى اقىلعا جەڭدىرگەندە عانا كەرنەگەن اشۋ جۇرە - جۇرە باسىلاتىن بولادى. « ءوزى جاقسى كىسىگە ءبىر كىسىلىك ورىن بار»، « كەڭ بولساڭ كەم بولمايسىڭ» دەمەكشى دوستار ارا تاتۋ ءتاتتى، كەڭ پەيىل بولعاعاندا عانا بەرەكە - بىرلىك ارتىپ، دوستىق نىعاياتىنى شىندىق.

    باسقالاردىڭ ىستەگەن جاقسىلىعىن جۇرەك تۇكپىرىندە ساقتاعاندا عانا كىشپەيىلدىلىك قاسيەت كورسەتە الامىز. ەشقاشان كەمشىلىكسىز ادام بولعان ەمەس، باسقالارعا كەڭ پەيىل بولعانىڭ وزىڭە كەڭ پەيىلدىك ەتكەنىڭ؛ باسقالاردى قۇرمەتتەگەنىڭ ءوزىڭدى قۇرمەتتەگەنىڭ! باسقالاردىڭ كەمشىلىگىن عانا بايقاپ، باسقالارعا جول بەرگىسى كەلمەيتىندەر ءوزىن باسقالاردان ارتىق كورەتىندەر، ولار ءوز كەمشىلىگىن بايقامايدى دا ۇنەمى ءوزىن جەتىلدىرىپ، وي ورەسىن وسىرەتىن قىمباتتى ورايدان قاعىس قالىپ وتىرادى؛ وزگەلەردىڭ « تارىداي جاقسىلىعىن تاۋداي كورەتىن» كىسىنى استە ۇمىتپا، اركەز يگى جاقسى ادامنان ۇيرەنىپ، ولاردىڭ ارتىقشىلىعىن قابىلداعاندا وزىمىزدە بار ارتىقشىلىق بىرتىندەپ ارتىپ، قوعامدىق قارىم- قاتىناس شەڭبەرىمىز ۇلعايىپ، ءبىلىپ - بىلمەي مول رۋحاني بايلىققا يە بولامىز.

    باسقالاردىڭ جاقسى جاعىن جاقتاي ءبىلۋ- دوستار ارا قۇرمەتىڭدى اسىرسا؛ تۋىستارارا بەرەكە- بىرلىكتى بولاسىڭ. باسقالاردىڭ كەمشىلىگىن، ايىبىن ەستە ساقتاعانعا قاراعاندا باسقالاردىڭ جاقسىلىعىن، ارتىقشىلىعىن ۇمىتپاۋ تۇرمىسىڭدى مىڭ ەسە كوڭىلدى ەتەدى. وسىعان قاراعاندا باسقالاردىڭ جاقسىلىعىن نەگە ەستە ساقتاماسقا؟

جاۋاپتى رەداكتور: جازيرا بولاتباي قىزى