جاستىق كوكتەمىڭدى كىمگە سيلادىڭ

  • كەلۋ قاينارى: ىلە كەشى گازەتى
  • 09:39:56 11/12/2017

     ءمينۋار قولفونىنىڭ اقىرىن سايراعان دىبىسىنان ويانىپ، قولفونىنا قاراپ «ۋاقىت ءبىر تالاي جەرگە بارىپ قالپتى عوي...» دەدى دە، كادىمگى ادەتىنشە ءۇنحاتىنا ءۇڭىلدى. ءۇنحاتتاعى دوستارى وعان كوپتەگەن سوزدەرمەن قوسا ءبىر تالاي جولدامالالار جولداپتى. دوستار شەڭبەرىندەگى ون شاقتى حاباردا ونىڭ وقۋىن كۇتىپ تۇرعان ەدى. «وي، تاۋبا! بۇلار تۇنىمەن ۇيىقتاماي ءۇنحات ويناعان با؟ مەن دە تەلەفونعا تەلمىرىپ كەش جاتسام دا بۇلار ءۇنحاتتى تولتىرىپ جىبەرىپتى» دەدى دە ءۇنحاتتاعى سوزدەرگە بىردەن قۇلاق تۇرە باستادى.

    «ءمينۋار ساباقتاس، جۇما تۇستەن كەيىن ساباق جوق، ۋاقىت شىعارىپ وتكەندەگى كورىپ قويعان قىزىل كويلەكتى الىپ بازار ارالاپ كەلسەك بولار ما ەكەن... الدىمىزداعى جەكسەنبى كۇنى گۇلناردىڭ تۋىلعان كۇنى، بۇل رەت الگى كوپەس جىگىتى وتكىزىپ بەرەدى ەكەن. قاراعاندا مەيمان كوپ، قىزعىن بولاتىن ۇقسايدى؟!...» دوستارىنىڭ قالدىرعان سوزدەرىن كورىپ ونىڭ بەتىندە بەلگىسىز ءبىر جىميىس پايدا بولدى. ءبىراق «باس قوسۋعا ءسىرا نە كيۋ كەرەك؟» دەگەن قۇيقالى ماسەلە ونىڭ باسىن قاتىرا باستادى.

    * * *

    ەكىنشى ساعاتتىق ساباق ۋاقىتى، ءابيبام بارىنشا ساقتىقپەن قولفونىن قولىنا الىپ ەكرانىنا كوز جۇگىرتتى دە، قارسى جاققا «جان دوسىم، مەنىڭ دە ەرتەڭ تۇستەن كەيىن ساباعىم جوق. جازاتىن ءبىر ماقالام بار ەدى، كىتاپحاناعا بارىپ ماتەريال كورسەم بولۋشى ەدى، ءبىراق وعان قىر جەلكەمنەن تارتىپ-اق تۇرعانى... بولماسا توردان ءتۇسىرىپ قۇدا دا تىنىش، قۇداعي دا تىنىش ەتەرمىن، ەرتەڭ حابارلاسايىن، قوش! جانىمداي جاقسى كورەتىن بوتام» دەگەن سوزدەردى قولفونىندا تەرىپ بولىسىمەن، ساباقتى بار پەيىلىمەن تىڭداپ وتىرعانداي بەينەگە ەنە قالدى. ءبىراق ونىڭ قيالى قيىردا ەدى...

    * * *

    حاليدام جاتاعىندا وتىرىپ ساباق پىسىقتاۋدى ۇناتاتىن-دى. جاتاقتا ىستىق شايدى سوراپتاي، كوڭىلگە جاققان ۇساق-تۇيەك نارسەلەردەن قاربىتا وتىرىپ كىتاپ كورسە قانداي جاقسى ءا! ءبىراق ەڭ ماڭىزدىسى جاتاقتا «ۋايفاي» دەپ اتالاتىن ءبىر اسىل كەم، سونى اشىپ تورعا جالعاپ تەلەفون كورسە قانداي كەرەمەت!... ول بۇگىن دە كەرەۋەتىنىڭ ۇستىندە بۇك ءتۇسىپ كىتاپ كورىپ جاتقان ەدى. كەنەت تەربەلگەن قولفون ءۇنى ونىڭ نازارىن اۋداردى، قولفوندى قولىنا الىپ ءۇنحاتقا ءۇڭىلدى، دوستار شەڭبەرىنە كەلگەن دۇنيەلەر دە از ەمەس ەدى. سونىڭ ىشىندە ساباقتاسى قۇربانتايدىڭ جولداماسى ونىڭ بارلىق نازارىن اۋداردى. «جۇرەگىم قايدا مەنىڭ...» حاليدام تاقىرىبىن وقىپ قىزىعىپ قالدى. ونىڭ نازارىنداعى قۇربانتاي بۇلاي ەمەس ەدى عوي. قۇربانتاي جىگىتتىڭ گۇلى عوي شىركىن! ونىڭ سۇڭعاق بويى، ءمۇلايىم بەينەسى بار-بارلىعى... كوز الدىندا كولبەڭدەگەن ەلەستى تاعى دا قولفون شىرىلى بۇزدى. ول ەلەستەن ەسىن جيىپ قۇلاق تۇبىنە توسقانى سول ار جاعىنان وكسىك ارالاس ۇنمەن: «جان دوسىم حاليدام، وڭباعان اسەننىڭ ايەلى بار ەكەن، ول بۇگىن مەنى ىزدەپ كەلىپ شاشىمنان جۇلدى...» تىڭداپ ءدال وسى اراعا كەلگەندە حاليدامنىڭ جۇرەگى دۇرسىلدەپ سالا بەردى، ونىڭ ارتىن تىڭداۋعا ءدات قىلا المادى بىلەم! وتتاي قىزۋ ماحاببات قۇشاعىنداعى دوسىنىڭ ەندىگى حالى نە بولماق؟ ءىستىڭ ارتى نەمەن تىنار ەكەن دەشى؟...

جاۋاپتى رەداكتور: گۇلدەن ماقسات قىزى