جارق ەتكەن جارىق جۇلدىز ەدى

  • كەلۋ قاينارى: ىلە كەشى گازەتى
  • 03:55:57 15/12/2017

    تۇرسىنعالي مۇقامەتجان ۇلى

    

    «شاراپاتتى» قالت جىبەرمەيتىن ادەتىم، ءبىر جولى تەلەۆيزوردان تىلەۋقان جاقىپباي ۇلىنىڭ ءومىرى مەن شىعارمالارى تانىستىرىلعان «شاراپات» نۇرى قالتىلداعان جان دۇنيەمدى سىلكىندىرىپ، سامارقاۋ قيالىما قانات ءبىتىرىپ، قولىما قالام الدىردى.

    مارقۇم تىلەۋقاننىڭ شىعارماشىلىق تالقى قيمىلىندا ايگىلى جازۋشى جۇماباي ءبىلال ۇلى: «تىلەۋقان جاقىپباي ۇلى كەسەك دارىن يەسى، ول ءوز زامانىن ارعى-بەرگىسىن ۇڭىلە زەرتتەپ، جان-جاقتى تەرەڭ قامتىپ جازدى. ءتىپتى، باسقالار ات ءىزىن سالماعان تاقىرىپتارعا دا باتىلدىقپەن باردى. تىلەۋقاننىڭ اعاسى تولەۋبەك جاقىپباي دا مىقتى، تانىمال دارىندى ەدى. ءبىر وتباسىنان ەكى بىردەي ساڭلاقتىڭ شىعۋى وڭاي شارۋا ەمەس» دەدى.

    «اكەڭ ولسە دە، اكەڭدى كورە قالعان ولمەسىن» دەگەن. شۇكىرشىلىك. وسى ءبىر جانار تاۋداي جالىن اتقان تالانت يەسى تولەۋبەك جاقىپبايدى بىلەتىندەر ءالى دە اندىزداپ تابىلادى ەكەن. ونىڭ قولامتاداي ءسونىپ بارا جاتقان دەرەگىن ۇرلەپ وت الدىرىپ، مازداتىپ جالىنداتۋ، جارىعىنان توگىلگەن شاراپاتتى كورسەتۋ بىلەتىندەردىڭ، اسىرەسە، توننىڭ ىشكى باۋىنداي وتكەن ماعان بۇلتارتپاس بورىش بولىپ سەزىلە بەردى.

    سەكسەننىڭ سەڭگىرىنە شىقتىم. تولەۋبەك مەنەن 3 جاستاي ۇلكەن، ورتا بويلى، قىزىل سارى، بۇيرا شاشتى، قىر مۇرىندى، وتكىر كوزدى جىگىتتىڭ ناعىز سۇلتانى ەدى.

    وتكەن عاسىردىڭ 50-، 51-جىلدارى شاۋەشەكتە تارباعاتايدىڭ العاشقى تولىق ورتاسى تاتار-وزبەك مەكتەبىنىڭ جەتى اۋداننان باس قوسقان 8-كلاسىندا ونىمەن ساباقتاس بولدىم. كلاس جەتەكشىمىز ءابلاحات دەگەن وزبەك جىگىت ەدى.

    تولەۋبەك وتكىر، شەشەن، باتىل، باۋىرمال، ادامدارعا جاناسقىش، جانى جايساڭ جان ەدى. وقۋ مەن قوعامدىق جۇمىستاردا مەكتەپتىڭ الدىڭعى لەگىنەن كورىنەتىن. كىتاپقۇمار، قاي-جايداعى قولعا تۇسپەيتىن اسىل كىتاپتاردى سول تاۋىپ كەلەتىن، ءبارىمىز تالاسا وقيتىنبىز. ءوزى قوڭىرقاي تۇرمىس كەشىرەتىن مالشى وتباسىنىڭ پەرزەنتى.

    جىلعا تاياۋ وقۋ بارىسىندا توننىڭ ىشكى باۋىنداي ارالاسىپ بۇكپەسىز دوسقا اينالىپ كەتتىك. سول كەزدە جۇمىس تىندىرۋعا قىرۋار كادر قاجەت بولىپ، مەكتەپتەگى جوعارى كلاس وقۋشىلارىنىڭ تاڭداۋلىلارى ىرىكتەپ الىندى. تولەۋبەك سول قاتاردا كوپتەگەن شارتتان سۇرىنبەي ءوتىپ، 8- جىلدىقتى بىتىرۋگە دە ۇلگىرمەي، ماڭدايى جارقىراپ كەتە باردى. العاشىندا كوشپەلى سوتتا حاتشى بولىپ ىستەدى. ءوزى كىتاپقۇمار، ۇيرەنۋگە قۇشتار ادامدى كۇرەستىڭ لاۋلاعان وت جالىنى ونان ارمان شىڭداي تۇسكەن ءتارىزدى. قولىنا قالام الىپ، سول جىلداردان باستاپ، فەلياتون جازا باستادى.

جاۋاپتى رەداكتور: گۇلدەن ماقسات قىزى