قۇرىلىسحان ءتاليان قىزى: مىڭ بوياۋى سان ءتۇرلى ورنەگىمەن

  • كەلۋ قاينارى: ىلە گازەتى
  • 02:52:38 01/01/2018

  

    ارقالاعان اسىل وي

 

    نار عاسىردىڭ كەمەرلى كەمەسىندەي،

    جاڭا ءومىردىڭ جايدارى تورەسىندەي.

    ارقالاعان اسىل وي جىل كەلەدى،

    جازىلماعان وتتى جىر تەمەسىندەي.

 

    مىڭ بوياۋى سان ءتۇرلى ورنەگىمەن،

    جەتكىزبەستى قۋالاپ وردەن ىلگەن.

    ۋاقىتىن ۇلىقتاپ جىل كەلەدى،

    ارعىماقتاي جەز تۇياق ورگە جۇزگەن.

 

    ىزگىلىكتىڭ ايشىقتاپ تاراۋلارىن،

    نىساندارعا نىق ايتىپ باعامدارىن.

    جىل كەلەدى وزگەشە پاراساتپەن،

    ۇلاعاتتاپ ۇلى ەل ءاز ارمانىن.

 

    تەرەڭ سىرعا تەڭىزدەن باعامىن دەپ،

    قۇن ولشەمدى عۇزىرلى ءان سالامىن دەپ.

    جىل كەلەدى تالعامنىڭ تارازىسى،

    ادىلەت اق جولىنا باعامىن دەپ.

 

    سەرى جىرىن كوڭىلدىڭ سەلدەتەم دەپ،

    ابىز دالا اق ءۇمىت تەڭدەسەم دەپ.

    جىل كەلەدى تاعى دا جىل كەلەدى،

    كۇللى الەمدى باقىتپەن تەربەتەم دەپ.

جاۋاپتى رەداكتور: گۇلدەن ماقسات قىزى