تالابىم تاۋدان بيىك، سۋدان تەرەڭ، سوڭىنان تالابىمنىڭ ەرە بەرەم

  • كەلۋ قاينارى: ىلە كەشى گازەتى
  • 06:26:45 01/02/2018

      (كيىم جوبالاۋشى زياتقان ايدارقان قىزىمەن سۇحپات)

 

    قۋاندىق كوبەن ۇلى: ءسىز بالا كەزىڭىزدە سۋرەتشى بولامىن دەپ ويلادىڭىز بە؟

    زياتقان ايدارقان قىزى: قوڭىر قالتا شاڭىراقتا دۇنيەگە كەلگەنىممەن، اقىلعا ىرعىن اكەنىڭ تاربيەسىندە بولدىم، ول كىسى ادام بولۋ، ونەرلى بولۋ جايىندا اڭگىمەنى كوپ ايتاتىن ەدى. دەسە دە سول باقىتتى كۇن ۇزاققا بارمادى، جاستايىمنان اكەمنەن ايىرىلىپ، قورمال انامنىڭ باۋلۋىندا ورتالاۋ مەكتەپتىڭ تابالدىرىعىن اتتادىم. ەس ءبىلىپ، ەتەك جيعاننان باستاپ انامىزدىڭ جاماۋ-جاسقاۋلارىنا، ءجۇن ءتۇتىپ، ۇرشىق يىرۋىنە، جيەك باسىپ، سىرماق تىگۋىنە قولقابىس تيگىزەتىنىم ەسىمدە.

    وتكەن عاسىردىڭ 70-جىلدارىنىڭ سوڭعى كەزىندە شينجياڭ كوركەمونەر مەكتەبى (قازىرگى شينجياڭ كوركەمونەر ينستيتۋتى) وقۋشى قابىلدايدى ەكەن دەگەن حابار قۇلاعىما ءتيدى. از دا بولسا قازاقى ويۋ-ورنەكتەن بەيىمىم بولعاندىقتان اتالعان مەكتەپتىڭ سىزۋشىلىق كاسىبىنە سىناۋ بەرۋگە بەكىدىم. وسىلايشا ءوزىم تىلەگەن سۋرەتشىلىك ونەرىن باستاپ كەتتىم. قۇلشىنا ۇيىرەنىپ، جالىقپاي ىزدەنگەنىمنىڭ ارقاسىندا 3 جىلدىق وقۋىمدى تابىسپەن ءبىتىرىپ، قىزمەتكە شىقتىم.

    ق. كوبەن ۇلى: «ۇستازى جاقسىنىڭ ۇستامى جاقسى» دەمەكشى، شينجياڭ كوركەمونەر مەكتەبىندە كىمدەردەن ساباق الدىڭىز؟ ستۋدەنتتىك ومىرىڭىزدە وكىنىش بولدى ما؟

    ز. ايدارقان قىزى: 1976-جىلدىڭ كۇزىندە شينجياڭ كوركەمونەر مەكتەبىنىڭ سىزۋشىلىق فاكۋلتەتىنە ءار ۇلتتان قۇرام تاپقان 30 نەشە وقۋشى قابىلداندىق، قازاقتان 4 وقۋشى عانا ەدىك. بىزگە ساباق بەرەتىن مۇعالىمدەرىمىز شينجياڭ كوركەمونەر مەكتەبىنىڭ پروفەسسورى، ايگىلى سىزۋشى عازى امەت مۇعالىم باستاعان عاني، تاشبولات، شۇي گوفىڭ قاتارلى ۇستازدار بولدى. وكىنىش جاعىنا كەلسەك: ءتىلىمىزدىڭ جەتەرسىزدىگى، جابدىقتىڭ كەمشىلدىگى، وقۋ ۋاقىتىمىزدىڭ قىسقالىعى بولدى.

    ق. كوبەن ۇلى: التاي ايماقتىق ءان-ءبي ۇيىرمەسىندە قىزمەتتە بولعانىڭىزدا قانداي كولەمدى كونسەرت، ساحنالىق شىعارماعا قاتىناستىڭىز؟

    ز. ايدارقان قىزى: التاي ايماقتىق ءان-ءبي ۇيىرمەسى — ولكە كولەمىندەگى قازاق ۇلتىن نەگىز ەتكەن ونەر وتاۋى. مەن كاسىپتىك وقۋىمدى بىتىرگەننەن كەيىن العاش رەت وسى ۇيىرمەنىڭ ەسىگىن اشتىم. مەنى ساحنا جوبالاۋ قىزمەتىنە ءبولدى. سول تۇستا ساحنا دەكراتسياسىمەن شۇعىلداناتىن گو جيانجاۋ دەيتىن حانزۋ اعاي بار ەكەن. ەندى عانا وقۋ ءبىتىرىپ كەلگەن ماعان بەينە كوكتەن تىلەگەنىمدى جەردەن بەرگەندەي تاماشا ۇستازدىڭ جانىمنان تابىلماسى بار ما؟! سول كىسىنىڭ باۋلۋىندا ۇيىرمەمىزدىڭ ۇلكەندى-كىشىلى كونسەرتتەرىنە قاتىناستىم. گو جيانجاۋ ۇستازىم ەكەۋىمىز ىستەگەن « اققايىڭ شەجىرەسى»، «اۋىل اراسىنداعى تار سوقپاق»، «اڭشىنىڭ ماحابباتى» سياقتى شىعارمالارعا جوبالاعان دەكراتسيامىز، كيىمدەرىمىز ءتۇرلى ساحنالاردان كورىنىپ، سول كەزدەگى كورەرمەندەردىڭ جاقسى باعاسىن الدى. 1986- جىلى مەملەكەتتىك 2- رەتكى ءبي جارىسى بەيجيڭدە وتەتىن بولىپ، وعان ۇيىرمەمىزدەگى مەملەكەتتىك جوعارى دارەجەلى ءبيشى قىمبات ايدار قىزى اپايىمىزدىڭ « قۇداشا» اتتى ءبيى تاڭدالدى، سونىمەن ءتول قازاق ۇلگىسىندەگى كيىم جوبالاۋ جۇمىسى ماعان جۇكتەلدى.

جاۋاپتى رەداكتور: گۇلدەن ماقسات قىزى