نەكە ىستەرىندەگى كەلەڭسىزدىكتەرمەن كۇرەسە بىلەيىك

  • كەلۋ قاينارى: شينجياڭ زاڭ جانە تۇرمىس گازەتى
  • 03:37:12 16/05/2018

  

    اقىلباي مۇقامەتالي ۇلى

 

    نەكە ادام ومىرىندەگى ەڭ ماڭىزدى ءىس. ول ءبىر ادامنىڭ كەيىنگى تاعدىرىن، باقىتتى تۇرمىسقا كەنەلۋى مەن تابىسقا قول جەتكىزۋىن، كوڭىل كۇي جاقتاعى اقاۋسىزدىعىن، ساپالى ۇرپاق تاربيەلەۋىن بەلگىلەيدى. دەمەك، نەكە ىستەرىنىڭ باياندى، كىرشىكسىز بولۋى ادامعا شەكسىز باقىت، ءماندى عۇمىر مەن شاتتىققا تولى كوڭىلدىلىك سيلايدى. بولاشاقتىڭ يەسى بولعان بالالار پىسيحيكاسىنىڭ قانداي بولۋى انە سول نەكەنى تىرەك ەتكەن وتباسى ءمورالىنىڭ پاكتىلىگىمەن تىعىز بايلانىستى. بەرەكەلى، تاتۋ-ءتاتتى، ءمورالدى وتباسىندا ەسەيگەن بالا بەينە قۇنارلى جەردە وسكەن ماۋەلى جەمىس سەكىلدى تامىرىن تەرەڭگە تارتىپ قۇلپىرا تۇسەدى، بولاشاعىنان زور ءۇمىت كۇتتىرىپ، اتا-اناسىن قۋانىشقا بولەيدى. سوندىقتان، نەكە ىستەرىندەگى كەلەڭسىز ارەكەتتەردەن اۋلاق بولىپ، شۋاق شاشقان ءمورالدى دا ادەپتى وتباسى ۇلگىسىن قالىپتاستىرىپ، ءومىرىمىزدىڭ جالعاسى، وتباسىمىزدىڭ ءسانى بولعان ۇرپاعىمىزعا نۇرلى بولاشاق سيلايىق، اعايىن!

    وتباسىمىزدىڭ بەرەكەسى، ەرلى - زايىپتىلاردىڭ تاتۋ-ءتاتتى وتۋىنە دانەكەر بولعان بالا تاربيەسى وتباسى تاربيەسى، مەكتەپ تاربيەسى جانە قوعام تاربيەسىمەن تىعىز توعىستىرىلعاندا عانا وزىندىك جاراسىم تاۋىپ ماندىك سيپات الادى. دەسە دە، بۇلاردىڭ ىشىندە وتباسى تاربيەسى ەڭ ماڭىزدى ورىندا تۇرادى. شەشۋشى رول اتقارىپ، ۇرپاقتارعا ءنارلى ونەگە سيلايتىن وسى وتباسى تاربيەسىنىڭ ويداعىداي، كەدەرگىسىز بولۋى تاعى سول وتباسىنىڭ تۇتقاسى بولعان ەرلى - زايىپتىلار نەكەسىنىڭ باياندى -بايانسىزدىعىمەن بايلانىستى. «بالاپان ۇيادان نەنى كورسە، ۇشقاندا سونى الادى» دەمەكشى، نەكەلى بولعان ەرلى-زايىپتىلاردىڭ بەرەكەسىز، ىنتىماقسىز بولۋىنان تۋىندايتىن ۇرىس-كەرىس، توبەلەس، بوقتىق سوزدەردى ايتۋ سىندى ۇنامسىز ارەكەتتەر بالانىڭ ءوسىپ- جەتىلۋى مەن ۇيرەنۋىنە ەرەكشە اسەر ەتەدى، بالا مۇنداي ەرسى ارەكەتتەردى ونەگە ەتىپ الادى دا، ناشار مىنەز-قۇلىق پەن جامان ادەتتى وڭاي قالىپتاستىرادى، ۇيرەنۋدە ناشارلاپ، وقۋعا زاۋقى سوقپايدى. قازىرگى بەسىكتەن بەلى شىقپاي جاتىپ وقۋدان قاشىپ ۇرلىق ىستەۋ، تەمەكى تارتۋ، كوشەدە قايىرشىلىق ىستەۋ سياقتى جامان ارەكەتتەرمەن اينالىسىپ جۇرگەن بالالاردىڭ دەنى انە سول ەرلى-زايىپتىلاردىڭ ورتاسىنداعى بەرەكەسىزدىك سالدارىنان نەكەدەن اجىراسقان وتباسىلارىنىڭ ۇلاندارى ەكەن. ەرلى - زايىپتىلاردىڭ نەكەدەن اجىراسىپ شاڭىراعىنىڭ شايقالۋى كوبىنەسە وتباسىنداعى ىنتىماقسىزدىق، ىشىمدىككە بەرىلۋ، سۋىق جۇرىسكە سالىنۋ سالدارىنان تۋىنداپ وتىر. ءتىپتى، كەيبىر جاس وتاۋلار اراسىندا وتباسىنا، بالا - شاعاسىنا قاراماي ءوز الدىنا قاڭعىرىپ كەتەتىن، سونىڭ سالدارىنان ەرلى - زايىپتىلار نەكەدەن اجىراسىپ، بالاسى قاراۋسىز قالاتىن جايتتەردە جوق ەمەس. قارشادايىنان ءتىرى جەتىم بولىپ تاربيەسىز كۇي كەشكەن مۇنداي بالالاردىڭ ەسەيە كەلە جامان جولعا ءتۇسىپ، قىلمىس وتكىزبەسىنە كىم كەپىل.

جاۋاپتى رەداكتور: گۇلدەن ماقسات قىزى