سۇيىسپەنشىلىكتىڭ قۇدىرەتى

  • كەلۋ قاينارى: ىلە گازەتى
  • 03:42:12 23/05/2018

    ارداق مادەنيەت قىزى

    

    اجال مەن كۇلىپ تۇرىپ كۇرەسىپ ەڭ، سول بەينەڭ شىقپاي قويدى ءبىر ەسىمنەن. سودان بەرى كوپ جىل ءوتتى بىلەم، مەنى كىم؟ ءدال وزىڭدەي ءسۇيىپتى ەكەن.

    «قاپاستاعى قۇس» سياقتى شيپاحانانىڭ تۇتقىنى بوپ، سارى توسەككە ەرىكسىز تاڭىلىپ، جاستىقتىڭ جالىن وتى مازداپ تۇرعان سەرى كۇندەرىنىڭ التى قىردىڭ استىندا قالىپ قويعانىن قايرانداپ وي ـ قيالعا شىرمالىپ جاتقان بالا.

    جانار وتى وشكىندەپ، كەبەرسىگەن ەرىندەرى قابىرشىقتانىپ، قاسىندا قايعىدان قان جۇتقان، «اھ» ۇرىپ كۇرسىنىپ، ەڭىرەگەندە ەتەگى جاسقا تولعان انا...

    - ەھ، مەن ءسىرا نەدەن جازدىم، تىم بولماسا مەنىڭ كارى جانىمدى قيناپ، جانىمدى الساڭ بولماي ما؟ -» دەپ ىشتەي نالەت ايتىپ، ءومىردىڭ مەيىرىمسىزدىگىنە كەيىپ، جاس ءومىرىن قور قىلىپ، ءبىر رەتكى شالىس باسقان قادامى ءۇشىن وسىنداي قاسىرەتكە دۋشار بولعان بالاسىنا انا جۇرەگى ەلجىرەي قارايدى.

    تەك كىرپىگىن قيمىلداتۋعا عانا شاماسى جەتىپ، سانسىز ويلاردىڭ شىرماۋىنا بايلانىپ، قايعىنىڭ قۇزىنا قۇلاپ بارا جاتقان كوز جانارىنان قاسىرەتتىڭ تامشى جاستارى سورعالاپ، اۋرۋ ازابى مەڭدەتىپ 20 جاسقا ەركىن كەلە قويماعان مەيىرباننىڭ كوز الدىنا تاي-قۇلىنداي تەبىسىپ وسكەن، قايعىسىز قامسىز بالا كۇنگى جان قۇربىسى ارۋجان ءالى دە سول ءسۇپ -سۇيكىمدى، كىپ -كىشكەنتاي بولىپ ەلەستەيدى. وزىمەن ويىنشىقتارعا تالاسىپ قولىنداعى بالشىقتارىن ءبىر -ءبىرىنىڭ بەتىنە جاعىپ، ءماز بولىسقان رەياسىز كەزدەرى؛ تورعايعا تاس لاقتىرىپ، تالاي رەت كورشىلەرىنىڭ تەرەزەسىن شاعىپ، ءسوز ەستىپ تاياق جەگەن ەسەر كۇندەرى؛ قىس بولسا كوك بالاق بولعان، جاز بولسا جولداعى توقتاۋ سۋلاردى كەشىپ، اسىر سالىپ جۇرگەن قام-قايعىسىز كۇندەرى كۇنى كەشەگىدەي كوز الدىندا مەنمۇندالايدى.

    -ەندى سول كۇندەر قايتا قايرىلىپ كەلمەسكە كەتتى، كوڭىلدى ساتتەر قازىر تەك ەلەس بولىپ قالا بەردى. ءومىردىڭ ءمانىن باسىڭا ءولىم حاۋىپى تونگەندە تۇسىنەدى ەكەنسىڭ،-دەپ ىشتەي كۇبىرلەگەن مەيىربان، تالىقسىپ بارىپ، ۇيىقتاپ كەتتى.

    اۋرۋ ازابى جانىنا باتىپ، كۇننەن -كۇنگە السىزدىك جەڭىپ، قارسىلىق قۋاتىنان ايرىلىپ، ءبىر جۇتىم سۋدى ءىشۋدىڭ ءوزى ازاپ بولعان وعان اجال اب جىلانداي ارباپ، جۇتىپ قويارداي ايباتتانىپ قاھارىن ءشاشىپ تۇرعانداي سەزىلەدى.

    قايعىنىڭ قارا بۇلتى ۇيرىلىپ قاسىرەتتەن شەرلەنگەن اناسى جالعىز ۇلىنىڭ كۇن ساناپ سەمىپ بارا جاتقانى جانىنا باتىپ، ۇيقى-كۇلكىنى ۇمىتىپ، بالاپانىن جىلاننان قورىعان قۇستاي شىجاق قاعادى. مەيىرباننىڭ جانى ءسال دە بولسا بايىز تاۋىپ، ۇيىقتاپ كەتكەنىن كورگەن انا بالاسىنا مەيىرلەنە قاراپ وتىرىپ، تالىقسىپ ۇيىقتاپ كەتكەن ەدى.

    الدە بىرەۋ قۇلاق تۇبىنە كەلىپ: -مەيىربان ءجۇرشى، تۇرشى! ، تەز كەتەيىكشى، …تۇرماساڭ مەن كەتتىم وندا،- دەگەن رەنىشتى قىزدىڭ نازىك ءۇنى ەستىلدى، بۇل تانىس داۋىس، ناق ارۋجاننىڭ داۋىسى. ءوڭى مە، ءتۇسى مە، ايتەۋ ءبىر بەلگىسىز ەلەس. كوزىن اشۋعا قانشا زورلانعانمەن كىرپىكتەرى ايرىلماستاي ايقاسىپ قالعان مەيىربان بىردەڭە ايتقىسى كەلگەندەي ۇمسىنادى، ءبىراق بۇلدىر ەلەس الىستاپ جەتكىزەر ەمەس. كەبەرسىگەن ەرىندەرى ءدىر-ءدىر ەتىپ، كوزىنەن اققان ىستىق جاس جاستىعىن سۋلاپ كەتتى.

جاۋاپتى رەداكتور: جازيرا بولاتباي قىزى