كىتاپ سورەسىنە سىڭگەن اكە مەيىرى

  • كەلۋ قاينارى: ىلە گازەتى
  • 04:58:45 07/08/2018

    مي شۋەلي

    

    مەن ءبىر قاراپايىم قىزمەتكەر وتباسىندا ومىرگە كەلدىم. اكە – شەشەم دە مىڭ – ميلليونداعان ەڭبەكشى قاۋىمنىڭ ءبىرى. سول ءبىر جىلدارى تولىق ورتانى تامامداپ بولماعان اكەم «زيالى جاس» بولىپ شينجياڭنىڭ كۇنەس اۋدانىنا كەلىپ، شەشەم ەكەۋى قيىنشىلىققا بىرگە توتەپ 8 جىل تۇرمىس كەشىردى. سودان ۇرىمجىگە قايتار ۋاقىتتا، مەن الدەقاشان باستاۋىش مەكتەپ وقيتىن جاسقا كەلىپ ەدىم. اكەم توعان قازىپ، كومىر كەنگە ءتۇسىپ، ءۇي مۇلىكتەرىن دە جاسادى، زيالى جاستان جۇمىسشى دا بولدى، زاۆودتا جۇمىسشىلار ۇيىمىندا ىستەپ، كاسىپورىننىڭ پارتيا ياچەيكا شۋجيى بولىپ، وسى 5 جىلدىڭ الدىندا داڭقپەن پەنسياعا شىققانعا دەيىن... مەنىڭ سانامدا كورگەنى كوپ تاجىريبەلى، اشىق – جارقىن، قالجىڭباس، سەگىز قىرلى، ءبىر سىرلى اكە بەينەسىندە ورىن العان ەدى.

    ورتا جاسقا قادام قويعان شاعىمدا ەسەيىپ – ەرجەتۋ جولىما كوز جىبەرسەم، اكەم ماعان كوپ قىمباتتى نارسەلەردى قالدىرىپتى. سوڭىندا مەنىڭ كوزىم كىتاپ ۇيىندەگى مەن ورتا مەكتەپ وقىپ جۇرگەن كەزىمدە اكەم ماعان ءوز قولىمەن جاساپ بەرگەن كىتاپ سورەسىنە ءتۇستى.

    ول كىتاپ سورەسىنىڭ كەڭدىگى 0.5 مەتر، بيىكتىگى 1.8 مەتر، استى – ءۇستى بولىپ 6 قابات، ورتاڭعى ءبىر قاباتى قۇلىپتاۋعا بولاتىن ەكى سۋىرما، ۇستىڭگى 3 قاباتى مەن استىڭعى 2 قاباتىنا تارتىپ اشىپ – جابۋعا بولاتىن ءمولدىر اينەك قاقپاق ورناتىلعان ەدى. كىتاپ سورەسى ءبىرىڭعاي قاراقوڭىر سىرمەن سىرلانىپ، كورەر كوزگە سونداي سالماقتى، شىنايى كورىنەتىن. ول كەزدەرى ۇيدە ارنايى كىتاپ ءۇيى جوق بولاتىن، كىتاپ سورەسى مەنىڭ بولمەمدە، قابىرعا جاقتا تۇراتىن. مەن وعان بالالىق شاعىمداعى قۇپيالىقتارىمدى جازعان كۇندەلىك داپتەرىمدى، ءتىپتى، ءوزىم جاقسى كورەتىن قاي – قايداعى نارسەلەردى جيىپ، ورتاڭعى سۋىرماعا ءبارىن بىرگە سالىپ قۇلىپتاپ تاستايتىنمىن. باستاۋىش وقىپ جۇرگەن كەزىمدە اكەمنىڭ ماعان الىپ بەرگەن كىشكەنە سۋرەتتى كىتابى مەن تىزبەكتى سۋرەتتى كىتاپشالاردىڭ بارلىعىن كىتاپ سورەسنىڭ ەڭ استىڭعى قاباتىنا سالىپ قويدىم. اكەمنىڭ ماقۇلداۋىنسىز ساقتاعان ءبىرتالاي كىتابىن ۇرلاپ ءوز بولمەمدەگى كىتاپ سورەسىنە تاسىپ اكەلىپ العام، ولار «كاسىپكەرلىك تاريحى»، «جاستىق جىرى»، «قالىڭ ورمان قارلى دالا»، «قىزىل جارتاس» سياقتى كىتاپتار ەدى جانە «قىزىل ساراي ءتۇسى»، «باتىسقا ساپار»، «لياۋجاي اڭىزدارى»، «ءۇش پاتشالىق قيساسى»، «ءۇش ءتاپسىر، ەكى قاعىس» سياقتى كلاسسيكالىق شىعارمالار، بۇدان باسقا تاعى فرانسيا جازۋشىسى موپاسسان مەن الەكساندر توماستىڭ بىرنەشە شىعارماسى دا بار. مەن وسىدان باستاپ كىتاپ تەڭىزىنە قۇلادىم، شىعارماداعى كەيىپكەرلەرمەن بىرگە قۋانىپ، بىرگە جىلاپ، بىرگە ازاپتانىپ، بىرگە ەسەيىپ – ەرجەتتىم، بىرگە تولىستىم. وسىلايشا ورتا مەكتەپ ءبىتىرۋدىڭ الدىندا اقىرى كىتاپ سورەدەگى كىتاپتاردى وقىپ بولدىم.

    ۋنيۆەرسيتەت وقىعان شاعىمدا مايدا اقشالارىما ءوتىمدى بولعان كىتاپ، جۋرنالداردى ساتىپ الاتىنمىن. ولار چيان جۇڭشۋ، بو لي، لۋ يۋان، جين يۇڭ، يۇي شيۋيۇي، جانە ۋاڭ جۇڭلۇي، جوۋ گۋوپيڭ قاتارلى جازۋشىلاردىڭ شىعارمالارى ەدى. بۇل كىتاپتار مەن جۋرنالداردى وقىپ بولعان سوڭ ءبىر – بىرلەپ كىتاپ سورەمە ءتىزىپ قوياتىنمىن.

جاۋاپتى رەداكتور: جازيرا بولاتباي قىزى