راحىمەتحان شوناي ۇلى: كۇزەۋلىك

  • كەلۋ قاينارى: ىلە گازەتى
  • 09:40:54 26/10/2018

    قىر كۇيەك.

    قىرى سەمىز، ىرگەڭدەگى،

    توڭكەرىلگەن توعايى، بۇرگەندەرى.

    ات تويىپ وتقا قويعان بىردەمدەگى،

    جاپىرىندى ءىز بولعان جۇرگەن جەرى.

 

    توپان سۋ توعىتىلماس توبىعىنان،

    جونىندا تۇلكى جورتىپ، ءبورى ۇلىعان.

    قامشىسىنا ساپ العان قايران اكەم،

    كۇنگەيدەگى كۇپ -كۇرەڭ توبىلعىدان.

 

    كۇزەۋلىكتىڭ ءساتى شات، كۇنى كۇلكى،

    مايلانعان اتا -ساقال، ءىنى - مۇرتى.

    اڭ - قۇس پەن بۇرالقىعا پانا بولعان،

    كۇزەۋدەن كوشكەن ەلدىڭ جىلى جۇرتى.

 

    كۇزەۋلىك پە ەشتەمە ويلاتپاعان؟

    اجەم قولى ينەلى ويماقتاعان.

    ىڭىرانا كۇيسەسە شار ساۋلىقتار،

    ءسۇزىسىپ بويلاق، بۇزاۋ ويناقتاعان.

 

    جاڭعىرىعىپ ۇنىنە ۇلانىنىڭ،

    قايىرماسىن قايتالاپ جىر -ءانىنىڭ،

    تاۋ، تاس، ورمان مالشىنسا اق جاۋىنعا،

    ەلەڭدەگەن قۇلاعى قۇلانىنىڭ.

جاۋاپتى رەداكتور: جازيرا بولاتباي قىزى