كوكجايداقتاعى كوڭىلدى ءسات

  • كەلۋ قاينارى: ىلە گازەتى
  • 10:10:21 06/11/2018

 

    كامالبەك بوقان ۇلى

 

    ەسىكتەن كىرگەنىمىزدە، كەڭ بولمەنىڭ ءىشى ادامعا لىق تولىپتى، ينە شانشار جەر جوق. كەڭسەنىڭ وڭ جاق بۇرىشىندا اققۋبا ءوڭدى ازامات الدە ءبىر جۇمىس جايىمەن كەلگەن جۇرتتى اسا جىلى شىرايمەن قابىلداپ، ولاردىڭ گراپپالارىن ءوز قولىمەن تولتىرىپ، ەندى بىرەۋلەرىنىڭ تاعى ءبىر گىراپپالارىن كومپيۋتەردەن لەزدە شىعارىپ بەرىپ جولعا سالىپ جاتىر. الگى گراپپاسىن قۋانا قولىنا الىپ سوزىلا تۇرەگەلگەن قاپساعاي دەنەلى قارت:

    − مىنا گراپپانى تولتىرىپ بەرمەسەڭ تاعى دا اۋدانعا سابىلىپ، اۋرە بولاتىن ەدىم، راقىمەت شىراعىم! – دەدى ول شىنايى ىقىلاسىن بەرىپ. بولمەنىڭ ءتور جاعىندا تاعى ءبىر قاراتورى ازاماتتا كەلگەن بۇقارانىڭ مۇڭ – مۇقتاجىنا ورتاقتاسىپ، جۇمىستى تەزىرەك ءبىر جاقتى ەتۋگە، ولارعا زاڭدىق جاقتان اقىل – كەڭەس بەرىپ، ءجون سىلتەدى.

    مىنە بۇل ساۋان اۋداندىق 2 – ورتا مەكتەپتەن بورتىڭكە مال فەرماسى كوكجايداق وتىرىقتانۋ تۇيىنىنە تۇسكەن جەڭىسبەك، بولات قاتارلى قىزمەت گرۋپپاسىنىڭ كادرلارى ەدى. ولار بۇقاراعا وسىلايشا بار ىنتا – پەيىلىمەن قاربالاس قىزمەت وتەپ جاتقاندىقتان، ولار ءبىزدىڭ كەلگەنىمىزدى دە سەزبەي قالدى. قاربالاستىق سايابىرلاپ قولى بوساي قالعان ءبىر ارەدىكتە وسى قىزمەت گرۋپپاسىنىڭ شۋجيى جەڭىسبەك ىسقاقبەك ۇلى احۋالدى بىزگە بىلايشا تانىستىرا باستادى:

    − نەگىزگى ساتىنىڭ ۇيىمدىق قۇرىلىسى وڭالماي ءوندىرىس ورگە باسپايدى، كوتەرمەگە بەرۋ جاۋاپكەرلىك ءتۇزىمى اتقارىلىپ، «تايقازان» شاعىلعاننان كەيىنگى ەڭ اسەرلى ىستەر مەن اڭگىمەلەردى دە سىزدەر اۋىل – قىستاقتان ەستىپ، كورىپ جۇرگەندەي، ءبىزدىڭ كوكجايداقتاعى حالىق تۇرمىسىنا قاتىستى يگىلىكتى ىستەردە نازارلارىڭىزدى اۋدارار دەگەن ويدامىز، – دەپ ءبىر توقتاعان ول ءسوزىن تاعى دا ساباقتاي ءتۇستى:

    − «قازاندا نە بولسا شومىشكە سول ىلىنەدى» دەگەندەي مۇنداعى 5 ادامنان قۇرام تاپقان قىزمەت گرۋپپامىز العاشقى جارتى جىلدا ءبىرتالاي جۇمىستىڭ باسىن قايىردى، اۋەلى قىستاقتىڭ ۇيىمدىق قۇرىلىسىن رەتتەپ، قىستاق القاسىن جاڭالاپ، قىستاقتىڭ كەمەلدى ءتارتىپ – تۇزىمدەر ورناتىپ، قىستاقتاعى شارۋالاردىڭ ۇيىمدىق كوزقاراسىن جوعارىلاتتىق. كوكجايداق وتىرىقتاندىرۋ تۇيىنىندە ەكى قىستاقتان قۇرالعان ءبىر پارتيا ياچەيكاسى بار. ۇيىمدىق قۇرىلىسى ءبىرشاما كۇردەلى، بىتىراندى قونىستانۋ جاعدايى ءالى دە بار، ونىڭ ۇستىنە جاز بەن قىستا ساياحات ىستەرىمەن شۋعىلداناتىن، قىستاۋعا بارىپ مال وتارلاتاتىن، باسقادا كاسىپ كوزدەرىن قۋىپ كەتەتىن شارۋالارىمىز نەداۋىر ساندى يەلەيدى.

جاۋاپتى رەداكتور: گۇلدەن ماقسات قىزى