ۇنەمى باسقالاردىڭ قامىن ويلاۋ - اسىل قاسيەت

  • كەلۋ قاينارى: ىلە گازەتى
  • 05:14:21 20/11/2018

  

    مەن بۇرىن ءبىر ءىس ورنىندا قىزمەت ىستەگەن ەدىم، ءار جىلعى مەرەكە – مەيرامدا مەكەمەمىز ەرەكشە قيىنشىلىعى بار وتباسىلارىنان حال سۇرايتىن.

    حال سۇراۋ بۇيىمدارىن ساتىپ الار كەزدە باستىعىمىز ۇنەمى «پايداسىز نارسەلەردى الماڭدار، كۇرىش، ۇن، سۋماي سياقتى زاتتاردى كوبىرەك الىڭدار، ادەمى قوراپتارمەن بەزەندىرىلگەن ازىقتىق تاعامداردى ولار وزدەرى جەۋگە قيمايدى دا، باسقالارعا ۇسىنادى» دەپ تاپتەشتەي تاپسىراتىن.

    باستابىندا بۇعان ونشا ءمان بەرمەگەن ەكەنمىن، قيىنشىلىعى بار وتباسىلارعا بارعان كەزىمدە عانا بۇل زاتتاردىڭ ولاردىڭ تۇرمىسىندا شىنىمەن تاپشى ەكەنىن بايقادىم.

    باستىعىمنىڭ بۇل شىنايى ادامگەرشىلىك قاسيەتى مەنى ەرىكسىز ءتانتى ەتتى.

    انام كىشكەنتايىمنان مىنانى قۇلاعىما قۇيعان بولاتىن: ادام تەك ءوزىن عانا ويلاماۋى كەرەك، باسقالاردىڭ دا كۇي – جايىن ويلاعان ءجون. انام قايتىس بولعاننان كەيىن جولداسىم «قايىن اپام ءومىربويى ءوزىن ەمەس باسقالاردى ويلاپ وتكەن ادام عوي» دەپ باعا بەردى.

    ءيا، انامنىڭ ءومىرىن «اقكوڭىل» دەگەن وسى ءبىر اۋىز سوزگە جيناقتار ەدىم.

    كەلىنىمىز جاڭادان ۇزاتىلىپ كەلگەن كەزدە شەشەم ودان ۇنەمى قانداي تاماقتى ۇناتىپ جەيتىنىن سۇرايتىن، تاماقتى دا كەلىننىڭ تابەتىنە قاراي ىستەيتىن، وعان ۇنەمى بىزدەن جاسىرىپ اقشا بەرىپ تۇراتىن، ول ۇناتىپ جەيتىن ۇساق جەمەكتىكتەردى ونىڭ بولمەسىنە قويىپ قوياتىنى ءالى ەسىمدە.

    شەشەمنىڭ بۇل ارەكەتى قىزعانىشىمدى قوزدىرعان كەزدە قالجىڭداپ: كەلىن العاننان كەيىن تۋعان قىزىڭدى دا ۇمىتىپ كەتتىڭ عوي، - دەيتىنمىن. سوندا شەشەم مەنى جازعىرىپ: جامان قىز، كەلىندى اكە – شەشەسى 20 نەشە جىل باعىپ – قاعىپ، ەرجەتكىزىپ بىزگە ۇزاتتى، ءبىز دە ونى سىرتقا تەپپەۋىمىز كەرەك، قايسى اتا – انا ۇزاتىلعان قىزىنىڭ جات ەلدە ءجابىر كورۋىنەن الاڭدامايدى دەيسىڭ، سوندىقتان ءبىز ونى وزىمىزگە بالاپ جاقىن تارتۋىمىز كەرەك، مەن دە سەنى ۇنەمى ەنەسىمەن قالاي ءوتىپ جاتىر ەكەن، تۇرمىسى قالاي ەكەن دەپ ۋايىمداپ وتىرامىن. ادام دەگەن باسقالاردى دا وزىندەي كورۋى كەرەك، - دەيتىن.

    ەلدىڭ ءبارى ەنە مەن كەلىن قاتىناسىن ماڭگىلىك قيىن ماسەلە دەپ قارايدى، الايدا شەشەم مەن كەلىنىم ورتاسىندا شەشە مەن قىزى اراسىنداعى تەرەڭ سۇيىسپەنشىلىك ساقتالعان ەدى. شەشەمنىڭ راك اۋرۋىنا دۋشار بولعان دياگنوزى انىقتالعان كۇنى شيپاحانانىڭ باسپالداعىندا بوتاداي بوزداپ ەگىلىپ تۇرعان كەلىنىمدى كوردىم، ەڭىرەگەندە ەتەگى جاسقا تولىپ تۋعان قىزى مەنەن بەتەر قينالدى.

جاۋاپتى رەداكتور: گۇلدەن ماقسات قىزى