انا مەيىرى

  • كەلۋ قاينارى: ىلە گازەتى
  • 03:48:15 08/03/2019

    باقىتبەك نەسىپبەك ۇلى

    («8 - ناۋرىز حالىقارالىق ەڭبەكشى ايەلدەر مەرەكەسىنىڭ» مەرەيىمەن)

    (شالقىما)

    

    قاجىرلى دا قاراپايىم قاسيەتىمەن، بيازى دا بىلگىر بيىكتىگىمەن، مەيىرىمدى دە ءمۇلايىم مىنەزىمەن، اق ەدىل دە رياسىز دارقاندىعىمەن، ادال دا كىرشىكسىز ىزگىلىگىمەن جارتى الەم اتالعان ايەل زاتىنىڭ «8 – ناۋرىز حالىقارالىق ەڭبەكشى ايەلدەر مەرەكەسى» كەلىپ جەتكەن ءساليقالى ساتتە نەگە تەرەڭ تەبىرەنبەسكە، تەڭىزدەي تولقىماسقا؟!

    سۇيىكتى وقىرمان، ءبىزدى ۇزدىكسىز العا ىلگەرىلەۋگە جەتەلەيتىن، سوزساق قولىمىزدى، ويلاساق ويىمىزدى ۇزارتاتىن سىرلى كۇش نە دەپ سۇرار بولساڭىز، ول _ انا مەيىرى دەپ جاۋاپ بەرەر ەم ەش ىركىلمەستەن. ايتىپ – ايتپاي، انە سول شەكسىز مەيىرىمىمەن سان جۇرەكتى جىلىتىپ، كوپتىڭ كوڭىل تورىنەن مىقتاپ ورىن العان اياۋلى دا ارداقتى انالار تۋرالى ايتىلعان اق جارما العىس - القاۋلار، ءتانتى تولعانىستار كىم – كىمدى بولسا دا وسىلاي وي تۇيىندەۋگە تارتپاي قويماس – اۋ! سودان بارىپ ءارقاشان جولىمىزدى نۇرلاندىرىپ، جىگەرىمىزدى جانىعان، بويىمىزعا قۋات، ويىمىزعا شۋاق سيلاعان، قۋانىشىمىز بەن جۇبانىشىمىزعا ورتاق بولىپ قۇراق ۇشقان، بار اۋىرتپالىقتى ءۇن – ءتۇنسىز ارقالاۋعا پەيىل بولعان، وتباسىنىڭ قورمالى، بەرەكەنىڭ ۇيتقىسى، جاراسىمدىلىقتىڭ جارشىسى، قوعامنىڭ دانەكەرى، قارىم – قاتىناستىڭ كوپىرى بولعان اياۋلى انالارعا ىززەت – قۇرمەتىڭ قاباعات اسىپ، تەبىرەنىسىڭ تىپتەن تاسي تۇسەدى...

    وسىناۋ بايتاق دالانىڭ وي مەن قىرىندا، دۋماندى قالا قۇشاعىندا، باسەكەلى بازارىندا... ءبارى – بارىندە سەنىڭ ايشىقتى ىزدەرىڭ مەن ىزگىلىگىڭ مەنمۇندالايدى. وندا سەنىڭ ماڭداي تەرىڭ تامىپ، ەرشىمدى ەڭبەگىڭ سىڭگەن. انە سوندىقتان دا انا ەسىمى سارقىلماس وزەننىڭ، ۇلى وتاننىڭ اتىنا بالانىپ وتىرماي ما. سەندەر تاعى زاڭعار جازۋشىلار مەن اق يىق اقىنداردىڭ قارىمدى قالامىنان توم بولىپ جازىلىپ، جىر بولىپ توگىلدىڭدەر، اڭگىمەنىڭ ارقاۋى، ءان – كۇيدىڭ ارناسى، ءار تاقىرىپتىڭ تيەگى بولىپ ورىلدىڭدەر!

    راس – اۋ، ماڭدايىنان تۇنىق تەر تامشىلاپ، جۇزىنەن ىزگىلىك نۇرى توگىلگەن انا ەسىمى _ دۇنيەدەگى ەڭ ەسىل ەسىم؛ بار مۇراتىن ءوزى ءۇشىن ەمەس، قايتا ۇرپاق ءۇشىن ۇستانعان انا جۇرەگى _ ەڭ پاك، شەكسىز رياسىز، مەيىر – شاپاعاتقا تولى جۇرەك؛ بار ىقىلاسىن جەكە باسى ءۇشىن ەمەس، قايتا ۇلاعاتتى ۇرپاق باۋلۋعا ارناعان انا كوڭىلى _ تەڭدەسسىز كۇش – قۋاتقا، تۇپ – تۇنىق سەزىمگە باي كوڭىل؛ اقىلمەن بارلىق ءىستى بابىنا كەلتىرەتىن انا داۋىسى __ قاشان دا جاعىمدى، قۇلاق تۇبىندە جاڭعىرىپ تۇراتىن ءتاتتى داۋىس. انا مەيىرى ماڭگىلىك جىرلاناتىن تاۋسىلماس تاقىرىپ. الەمدەگى ەڭ سۇلۋ، ەڭ مەيىربان جاندار انە سول انالار.

جاۋاپتى رەداكتور: جازيرا بولاتباي قىزى