راك اۋرۋىن كۇنى بۇرىن ەكشەپ تەكسەرۋ داۋىرىندە مىنا بىلىمدەردى بىلمەسەڭىز بولمايدى

  • كەلۋ قاينارى: ىلە گازەتى
  • 04:19:58 15/05/2019

    تيان شياۋحاڭ، چىن سۇڭ (شينحۋا اگەنتتىگىنىڭ تىلشىلەرى)

    

    جاقىنعى جىلداردان بەرى راك اۋرۋىنا شالدىققان ناۋقاستار سانىنىڭ كۇرت ارتۋى ادامداردىڭ راك سىندى ءولىم مولشەرى جوعارى اۋرۋعا دەگەن قورقىنىشىن كۇشەيتتى ءارى بۇل اۋرۋدى كۇنى بۇرىن ەكشەپ تەكسەرتۋ جۇرتشىلىقتىڭ نازارىن اۋداردى.

    راك اۋرۋىن كۇنى بۇرىن ەكشەپ تەكسەرتۋ قانشالىق ماڭىزدى؟ ەڭ جاڭا ەكشەپ تەكسەرۋ تەحنيكاسى قايسىلار؟ ەكشەپ تەكسەرتۋدى قانداي ادامدار جاساتۋى قاجەت؟ مەملەكەتتىك 25 – رەتكى وسپە اۋرۋلارىنان ساقتانۋ ۇگىت اپتالىعى كەلۋ قارساڭىندا تىلشىلەر قاتىستى ماماندارمەن سۇقپاتتاسىپ، سىزدەردى مازالاعان سۇراقتاردىڭ جاۋابىن تاپقان.

    راك اۋرۋىن «جورگەگىندە جويۋ» ءۇشىن ەلىمىز ەكشەپ تەكسەرۋ نىسانىنىڭ قامتۋ كولەمىن ۇزدىكسىز كەڭەيتۋدە

    «دەنساۋلىقتىڭ ءبىرىنشى قاندى قولى» اتانعان راك اۋرۋى _ ادامزاتتىڭ ۇزاق ۋاقىتتان بەرگى ۇرەيلى ءتۇسى. مەملەكەتتىك راك اۋرۋلارى ورتالىعىنىڭ ەڭ جاڭا ساندى مالىمەتىندە كورسەتىلۋىنشە، 2015 – جىلى ەلىمىزدە قاتەرلى وسپە اۋرۋىمەن اۋىرعان ناۋقاستار سانى مولشەرمەن 3 ميلليون 929 مىڭ ادام بولىپ، مۇنىڭ ىشىندە 2 ميلليون 338 مىڭ ادام قايتىس بولعان. ەلىمىزدە راك اۋرۋىنا شالدىققان ناۋقاستار سانى جىلدان جىلعا ارتقاندىقتان، ءار جىلعى قاتىستى ەمدەۋ قاراجاتى 220 ميلليارد يۋاننان اسقان.

    «ادامداردىڭ >راكتىڭ ءتۇسى وزگەرىپ بارادى< دەۋىنىڭ ماڭىزدى ءبىر سەبەبى - راك اۋرۋىنا شالدىققان كوپتەگەن ناۋقاستار راك اۋرۋىنىڭ ورتا نەمەسە سوڭعى باسقىشىنا بارعاندا عانا ەمدەلەدى دە، ەمدەۋ كەزەڭىنىڭ التىن مەزگىلىن وتكىزىپ الادى»، - دەيدى مەملەكەتتىك راك اۋرۋلارى ورتالىعى راك اۋرۋىنا ەرتە دياگنوز قويۋ جانە ونى العاشقى باسقىشتا ەمدەۋ كەڭسەسىنىڭ مەڭگەرۋشىسى چىن ۋانچيڭ.

    وسپەنىڭ العاشقى مەزگىلدەگى كولەمى كىشكەنتاي بولادى، بۇل مەزگىلدە باسقا ورىنعا كوشپەيدى دە كەسىپ الىپ تاستاۋ ءبىرشاما وڭاي بولادى، سوندىقتان قاتەرلى وسپە تىكانى قانشا ەرتە بايقالسا، ناۋقاستىڭ امان قالۋ ورايى دا سولعۇرلىم جوعارى بولادى. جۇڭگو مەديتسينا عىلىمى اكادەمياسى وسپە اۋرۋلارى شيپاحاناسى جۇڭگوشا ەمدەۋ ءبولىمىنىڭ مەڭگەرۋشىسى فىڭ لي بىلاي دەپ تانىستىردى: وكپە راگىن مىسالعا الىپ ايتار بولساق، كلينيكالىق ساندى مالىمەتتەردەن مىنانى ايقىن اڭعارۋعا بولادى: ەرتە بايقالعان وكپە راگىنىڭ 5 جىل ءومىر ءسۇرۋ مولشەرى ورتا ەسەپپەن سوڭعى كەزەڭدە بايقالعان ناۋقاستارعا قاراعاندا كورنەكتى جوعارى بولادى.

    دۇنيە جۇزىلىك دەنساۋلىق ساقتاۋ ۇيىمى مىنانى العا قويدى: راك اۋرۋىنىڭ ۇشتەن ءبىرىن العاشقى كەزەڭدە بايقاۋ ارقىلى تۇبەگەيلى ەمدەپ جازۋعا بولادى. جۇيەلى تۇردەگى ەكشەپ تەكسەرۋ ارقىلى ەرتە بايقاۋعا ءارى وپەراتسيا جاساپ ەمدەۋگە بولادى، وسى ارقىلى راك اۋرۋى ناۋقاسىنىڭ اۋرۋ ازابى مەن ەكونوميكالىق اۋىرتپالىعىن ءونىمدى جەڭىلدەتۋگە بولادى. سوندىقتان مەديتسينا سالاسى راك اۋرۋىن كۇنى بۇرىن ەكشەپ تەكسەرتۋگە ايرىقشا باسا ءمان بەرەدى.

جاۋاپتى رەداكتور: جازيرا بولاتباي قىزى