سۋرەتتە: ىلە وزەنى 5 - كوپىرىنىڭ قۇرىلىس ناق مايدانى

لي جيەفىڭ فوتوسى

ٴتىلشىمىز لي يافىڭ حابارلايدى. 9 - ايدىڭ 30 - كۇنى ساعات نولدەن 30 مينۋت وتكەندە ەڭ سوڭعى ٴبىر بەتون قۇيماسىنىڭ دالمە - ٴدال تۇيىلىستىرىلۋىمەن جۇڭگو تەمىر جولى 5 - مەكەمەسىنىڭ ماشينالاندىرۋ سەرىكتەستىگى مىندەتىنە العان ىلە وزەنى 5 - كوپىرى ٴساتتى تۇتاستىرىلىپ، جۇڭحۋا حالىق رەسپۋبليكاسى قۇرىلعاندىعىنىڭ 73 جىلدىعىنا تاماشا ساۋعا تارتۋ ەتتى.

ىلە وزەنىن ەندەي وتكەن 5 - كوپىر قۇرىلىس نىسانىنا جالپى 320 ميلليون يۋان قارجى قوسىلعان، جالپى ۇزىندىعى ٴبىر مىڭ 761 مەتر، كوپىردىڭ كەڭدىگى 28 مەتر، 11 دوعا، 49 دوعاشىقتان قۇرالعان بولىپ، مەملەكەت تاس جولى 218 - لەنياسىنىڭ قۇلجا قالاسى شەكاراسىنان وتەتىن تاس جولىنداعى مەڭگەرۋ سيپاتتى ينجەنەريا.

5 - كوپىردىڭ نەگىزگى كوپىر دوعاسىنىڭ فورماسى الاسا دىڭگەكتى كولبەۋ اسپالى كوپىر، نەگىزگى دىڭگەكتىڭ بيىكتىگى 27.5 مەتر، ٴاربىر نەگىزگى دىڭگەككە 8 جۇپ كولبەۋ بولات ارقان ورناتىلعان، كوپىر جالپى 14 بۋىن بولەگى مەن 3 تۇتاستىرۋ بولەگىنەن قۇرالعان.

ىلە وزەنى 5 - كوپىرى سالىنىپ بولعاننان كەيىن ىلە وزەنىنىڭ وڭتۇستىك - سولتۇستىك ەكى جاعالاۋىن تۇتاستىرىپ، جەرگىلىكتى ورىننىڭ قاتىناس - تاسىمال باسىمىن باسەڭدەتۋمەن قاتار، قۇلجا قالاسى مەن چاپچال سىبە اۆتونوميالى اۋدانىنىڭ سوڭعى مەزگىلدەگى قالا دامۋىنا ٴورىس اشىپ قالماستان، ىلە وزەنىندەگى تاعى ٴبىر كورىنىس لەنياسىنا اينالادى.

سول كۇنى ٴتىلشى ىلە وزەنى 5 - كوپىرىنىڭ قۇرىلىس ناق مايدانىنان قىزمەتكەرلەردىڭ ٴتارتىپتى تۇردە دەنە تەمپەراتۋراسىن ولشەتىپ، سالاماتتىق كودىن جايمالاپ، تىزىمدەتىپ جۇمىس ورنىنا كىرىپ جاتقاندىعىن كوردى. ٴارقايسى جۇمىس تۇيىندەرى ىندەتتەن ساقتانۋ - تىزگىندەۋدىڭ قاتاڭ تالابى بويىنشا ىندەتتەن ساقتانۋ - تىزگىندەۋ قىزمەتىن قاتاڭ، شىنايى، ناقتى ويداعىداي ىستەۋدە.

«ىلە وزەنى 5 - كوپىرى ينجەنەرياسىندا قۇرىلىس جۇرگىزۋ جوسپارى بويىنشا كوپىر ۋاعىندا تۇتاستىرىلىپ، بيىل 12 - ايدىڭ سوڭىندا اۆتوموبيل قاتىناۋ شارت - جاعدايىن ازىرلەۋگە بەرىك نەگىز قالاندى». جۇڭگو تەمىر جولى 5- مەكەمەسى ماشينالاندىرۋ سەرىكتەستىگى مەملەكەت تاس جولى  218 - لەنياسى نىسانىنىڭ جاۋاپتىسى جاڭ چيڭلياڭ بىلاي دەدى: «وسى جولعى ىندەت تۋىلعاننان كەيىن سەرىكتەستىگىمىز ىندەت جاعدايى تۋدىرعان ماتەريال - جابدىقتى جۇمىس الاڭىنا كىرگىزۋ قيىن بولۋ، قىزمەتكەرلەردى ۇيىمداستىرىپ جۇمىس الاڭىنا اكەلۋ قيىن بولۋ سياقتى ٴتيىمسىز فاكتورلاردى بەلسەنە جەڭىپ، جۇمىس الاڭىنداعى 100 نەشە جۇمىسشىنى كۇندىز، كەشكى ەكى جۇمىس كەزەگىنە ٴبولدى. ٴاربىر جۇمىس ورنىنا ارناۋلى حاۋىپسىزدىككە جاۋاپتى قىزمەتكەر ورنالاستىرىپ، جۇمىس ورىندارىندا شارلاۋدى كۇشەيتىپ، 5 - كوپىر قۇرىلىسىنىڭ ٴساتتى، نىق قاداممەن ىلگەرىلەۋىنە كەپىلدىك ەتتىك. كەلەسى قادامدا حاۋىپسىزدىكتى العى شارت، تەحنيكانى ماڭىزدى ٴتۇيىن ەتىپ، اسفالت جاتقىزۋ جانە كوپىردى اشەكەيلەۋ سياقتى قۇرىلىستاردى جۇرگىزىپ، نىساننىڭ جۇمىسىن اياقتاتىپ، كولىك قاتىناۋدى جەدەل ىلگەرىلەتىپ، ساپاعا، سانعا كەپىلدىك ەتىپ، مەملەكەت تاس جولى  218 - لەنياسىن تۇتاستىرۋ مىندەتىن ورىندايمىز».