ٴتىلشىمىز ٴپاتيما حابارلايدى. 2 - ايدىڭ 25 - كۇنى ىلە وبلىستىق جانە قۇلجا قالالىق ايەلدەر بىرلەستىگى قۇلجا قالالىق ادام كۇشى بايلىعى جانە قوعامدىق قامتاماسىزداندىرۋ مەكەمەسىمەن بىرلەسىپ وتكىزگەن «كوكتەم سامالىندا جۇمىس ورنىن ازىرلەپ، جۇمىستاندىرۋ ارقىلى جۇرت كوڭىلىن مەيىرگە بولەۋ» اتىنداعى ارناۋلى قىزمەتكەر قابىلداۋ جينالىسى قۇلجا قالالىق تەحنيك جۇمىسشىلار مەكتەبىندە وتكىزىلىپ، قالىڭ ايەلدەرگە جۇمىسقا ورنالاسۋ تەكشەسىن ازىرلەپ بەرىپ، جۇمىستانۋ ارناسىن كوبەيتتى.

قىزمەتكەر قابىلداۋ ورنىندا قىزمەت ىزدەۋشى ايەلدەر ٴارقايسى كاسىپورىنداردىڭ كورمە تەكشەسىنىڭ الدىنا بارىپ قىزمەتكەر قابىلداۋ حابارلاندىرۋىن كورىپ، قىزمەتكەر قابىلداۋشى كاسىپورىندارمەن بەتپە - بەت اڭگىمەلەسىپ، قىزمەت ورنى ينفورماتسياسىن ۇعىسىپ، قىسقاشا بايانىن كەستەگە تولتىرىپ تاپسىردى.

وبلىستىق ايەلدەر بىرلەستىگىنىڭ قىزمەتكەرلەرى سول جەردە «ايەل جۇمىسشى - قىزمەتشىلەر ەڭبەك قورعاۋ بەلگىلەمەسى»، «ايەلدەردىڭ ۇقىق - مۇددەسىن قورعاۋ زاڭى» سياقتى ۇگىت ماتەريالدارىن تاراتىپ، جۇمىس ىزدەۋشى ايەلدەرگە ايەلدەردىڭ ۇقىق - مۇددەسىن قورعاۋ، جۇمىستانۋعا كومەكتەسۋ، كاسىپكە جەتەكشىلىك ەتۋ سياقتى ايەلدەر قاۋىمى قىزمەتىن جەبەيتىن جۇمىستانۋعا قىزمەت وتەدى.

«ايەلدەرگە باعىتتالعان مۇنداي ارناۋلى قىزمەتكەر قابىلداۋ جينالىسى اناعۇرلىم اشىق، اناعۇرلىم باعىتتامالى بولادى ەكەن، وزىمە لايىقتى بىرنەشە جۇمىس ورنىن كورۋىمە مۇمكىندىك بولدى، تاعى دا كەڭەس سۇراپ، وسىلاردىڭ ىشىنەن بىرەۋىن تاڭدايمىن» دەدى قىزمەتكەر قابىلداۋ جينالىسىنا قاتىناسقان ەسىلام قىزىروللا قۋانىشتى بەينەدە.

ۇعىسۋعا قاراعاندا، وسى رەتكى قىزمەتكەر قابىلداۋ جينالىسىنا 21 كاسىپورىن قاتىناسىپ، بۇعالتىرلىق، حاتشىلىق، اس - سۋ، قامبا باسقارۋ، ساتۋشى سياقتى ٴبىر مىڭ 500 دەن استام جۇمىس ورنى ازىرلەنگەن، جۇمىس ىزدەۋشىلەردىڭ ٴبىر ٴبولىمى سول جەردىڭ وزىندە كاسىپورىندارمەن العاشقى قادامدا جۇمىستانۋ كەلىسىمىنە قول قويىپتى.

«وسى رەتكى قىزمەتكەر قابىلداۋ جينالىسىندا باستىسى، قالا - قالاشىقتارداعى جۇمىسقا ورنالاسۋى قيىن ايەلدەردى، اۋىل - قىستاقتارداعى ەڭبەكشى ايەلدەردى، قىز ستۋدەنتتەردى ٴتۇيىندى قىزمەت وتەۋ وبيەكتىسى ەتتىك، مۇنداعى ماقسات − ايەلدەردىڭ ۇقىق - مۇددەسىن قورعاۋ، ايەلدەردىڭ جۇمىستانۋىن جەبەۋ، سونىمەن بىرگە، وسىنى وراي ەتىپ، بۇكىل قوعامدى ايەلدەرگە قامقورلىق جاساۋ، ايەلدەردىڭ جۇمىستانۋ ماسەلەسىنە نازار اۋدارۋعا ۇندەۋ». وبلىستىق ايەلدەر بىرلەستىگى ۇقىق - مۇددە قورعاۋ ٴبولىمىنىڭ باستىعى حان يەحۇڭ بىلاي دەدى: كەيىنگى باسقىشتا، باسقا دا 10 اۋدان، قالادا ايەلدەردى قىزمەتكە قابىلداۋ ارناۋلى جينالىسىن ىركەس - تىركەس وتكىزۋدى قولعا الىپ، ايەل جۇمىسشى - قىزمەتشىلەردىڭ ەڭبەگىن قورعاۋ جاعىنداعى ساياسات، زاڭ - ەرەجەلەر جونىندەگى ۇگىتتى كۇشەيتەمىز.