وبلىسقا توتە قاراستى ورىندار كوپ ٴتۇرلى شارانى قاتار اتقارىپ، ورنىقتى جۇمىستاندىرىپ، كىرىستى ارتتىرىپ، حالىق تۇرمىسىنا تيىمدىلىك جاسادى

ٴتىلشىمىز ما چىڭلۋ، ەرىكتى ٴتىلشى لي نا حابارلايدى. شينجياڭ اۋىل شارۋاشىلىق داشۋەسىنىڭ حايۋانات، وسىمدىكتەردى كارانتيندەۋ كاسىبىنەن وقۋ ٴبىتىرۋ الدىندا تۇرعان تەكەستىك بويجەتكەن جاميگۇل مىسىرقان قىزى 11 - ايدىڭ 10 - كۇنى بىلاي دەدى: «مەن بيىل وقۋ بىتىرەمىن، اۋداندىق پارتكوم مەن ۇكىمەت جوعارى مەكتەپ بىتىرگەن وقۋشىلاردى جۇمىسقا ورنالاستىرۋ ماسەلەسىنە باسا نازار اۋدارۋدا، بىزگە قىزمەتكەر قابىلداۋ ينفورماتسياسىن ۇنەمى جولداپ تۇرادى، تاعى كاسىپ اشۋعا اقىسىز تاربيەلەدى، ٴبىز ٴىس جۇزىندىك جاعدايىمىزعا قاراي دالمە - ٴدال تاڭداۋ جاسايمىز».

بيىل وبلىسقا توتە قاراستى ورىندار ورنىقتى جۇمىستاندىرۋدى باستان - اياق بۇقارا ٴۇشىن ناقتى، جاقسى ٴىس ىستەۋدىڭ ماڭىزدى مازمۇنى ەتىپ، الەۋمەتتىك جۇمىستاندىرۋعا قىزمەت وتەۋ، جۇمىسقا ورنالاستىرۋ ساياساتىن تياناقتاندىرۋ، تەحنيكاعا تاربيەلەۋ سياقتى ٴتۇيىندى قىزمەتتەردى جالعاستى مىقتى يگەرىپ، جۇمىستاندىرۋ قىزمەتىنىڭ جوعارى ساپالى دامۋىن ۇزدىكسىز جەبەدى.

وبلىستاعى ادام كۇشى بايلىعى جانە قوعامدىق قامتاماسىزداندىرۋ تاراۋلارى وبلىسقا توتە قاراستى ورىندارداعى كاسىپورىن، ٴىسورىن، ادام كۇشى بايلىعىنا قىزمەت وتەۋ كاسىپ باقشاسى، شاعىن، ۇساق كاسىپ سالالارىن جەتىلدىرۋ باقشاسى سياقتىلاردى بەلسەنە ۇلاستىرىپ، كاسىپورىنداردىڭ قىزمەتكەر سۇرانىسى ينفورماتسياسىن دەركەزىندە يەلەدى. ىلە وبلىستىق جۇمىستانۋعا قىزمەت وتەۋ تورابىنان پايدالانىپ، مەرزىمدى ۋاقىتتا جۇمىس ورنى ينفورماتسيالارىن شوعىرلى جاريالادى ٴارى اۋدان - قالالاردىڭ ۇكىمەت توراپ بەكەتى، راديو - تەلەۆيزيا، ٴۇنحات الەۋمەتتىك تەكشەسى سياقتىلارمەن بىرلەستىرىپ، ارناۋلى قيمىل اقپاراتتارىن دەركەزىندە شىعارىپ، قىزمەتكەر قابىلداۋ ارناۋلى قيمىلدارىنىڭ قۇلاقتاندىرۋلارىن جاريالاپ، جەلىدە سايكەستىرۋ قىزمەتىن ٴونىمدى ورىستەتىپ، قىزمەتكەر قابىلداۋشى ورىندارعا لايىق كەلەتىن قالا - اۋىل ەڭبەككۇشتەرىن تانىستىردى.

وبلىسقا توتە قاراستى ورىندارداعى قاتىستى تاراۋلار تاعى قىزمەتكەر قابىلداۋ تىكە تاراتىلىم قيمىلىن ورىستەتىپ، كاسىپورىنداردىڭ كادرلار قىزمەتىنە جاۋاپتى باسقارۋشىلارىن تىكەلەي ەفيرگە ۇسىنىس ەتىپ، جۇمىس ىزدەۋشىلەرمەن بەتپە - بەت پىكىر اۋىستىرىپ، جەلىدە كاسىپورىن، جۇمىس ورنى، ەڭبەكاقى جاعدايى سياقتىلاردى تانىستىرىپ، قىزمەت ىزدەۋشىلەردىڭ سۇراعىنا جاۋاپ بەرۋگە مۇمكىندىك جاسادى. قازىرگە دەيىن وبلىسقا توتە قاراستى ورىندار 7 مايدان - رەت تىكە تاراتىلىم ارقىلى قىزمەتكەر قابىلداۋ قيمىلىن ورىستەتىپ، 127 مەكەمە - ورىندى ۇيىمداستىرىپ، 2 مىڭنان استام قىزمەتكەر قابىلداۋ ينفورماتسياسىن  جاريالادى، تىكە تاراتىلىمدى جيىنى 32 مىڭ ادام - رەت كوردى.

بۇدان سىرت، وبلىسقا توتە قاراستى ورىندار «حالىقتىق كاسىپورىنداردىڭ قىزمەتكەر قابىلداۋ ايى»، «جوعارى مەكتەپ بىتىرگەن ستۋدەنتتەردىڭ جۇمىسقا ورنالاسۋىنا قىزمەت وتەۋ اپتالىعى» سياقتىلاردى تايانىش ەتىپ، ىلە پەداگوگيكا داشۋەسىمەن بىرلەسىپ، «ىلە پەداگوگيكا داشۋەسىندەگى 2021 - جىلعى قىزمەتكەر قابىلداۋ جينالىسىن» وتكىزىپ، 131 كاسىپورىندى قيمىلعا قاتىناسۋعا ۇيىمداستىرىپ، 3 مىڭ 251 جۇمىس ورنىمەن قامدادى، قيمىل كۇنى كاسىپورىندار توراپ تىكە تاراتىلىمى ارقىلى جۇمىس ورنىن تانىستىردى، 8 مىڭ 691 ادام - رەت تىكە تاراتىلىم ارقىلى مەكتەپ اۋلاسىنداعى قىزمەتكەر قابىلداۋ قيمىلىنا قاتىناستى.

«بيىل 1 - ايدا قورعاس اۋداندىق تەحنيك جۇمىسشىلار مەكتەبى ۇيىمداستىرعان مانتيور تاربيەلەۋ كۋرسىنا اقىسىز قاتىناستىم. كۋرسقا قاتىناسقاننان كەيىن مانتيور تەحنيكام اناعۇرلىم جاقساردى ٴارى مەملەكەت مويىندايتىن كۋالىك تە الدىم، بيىل ەلەكترلى موتوتسيكل رەمونتتاۋ دۇكەنىمدە قاريدارلارىم ەسەلەپ كوبەيدى، جىلدىق كىرىسىم 100 مىڭ يۋاننان اسادى دەپ مەجەلەپ وتىرمىن» دەدى قورعاس اۋدانى لۋساۋگۋ قالاشىعىندا رەمونتحانا اشاتىن قىستاق تۇرعىنى تۇراحمەت نۇرمامەت ٴجۇزى باقىتتان بال - بۇل جانىپ.

جىل باسىنان بەرى وبلىسقا توتە قاراستى ورىندارداعى ادام كۇشى بايلىعى جانە قوعامدىق قامتاماسىزداندىرۋ تاراۋلارى نازاردى «ون ٴىرى كاسىپ» پەن اۋدان - قالالارداعى ەرەكشەلىككە يە كاسىپتەرگە شوعىرلاندىرىپ، ەڭبەك شوعىرلانعان كاسىپتەردەگى ٴىرى وبلىس قۇرۋدى جانە «قورعاس قالاسى مەن قورعاس اۋدانىن، قۇلجا قالاسى مەن قۇلجا اۋدانىن» ٴبىر تۇلعالاندىرىپ دامىتۋدى تىعىز توڭىرەكتەپ، ٴارقايسى بۇقارالىق توپتاردى، اسىرەسە، كەدەيلىكتەن ارىلعان ەڭبەككۇشتەر، اۋىل - قىستاقتاعى بوس ەڭبەككۇشتەر سياقتى ٴتۇيىندى جۇمىستاندىرىلاتىن توپتاردى 54 مىڭ 700 ادام - رەت ٴتۇرلى تەحنيكاعا تاربيەلەدى، مۇنىڭ ىشىندە اۋىل - قىستاقتاعى بوس ەڭبەككۇشتەر 35 مىڭ 923 ادام - رەت، قالا - قالاشىقتارداعى جۇمىسسىزدار ٴبىر مىڭ 340 ادام - رەت، كاسىپورىنداردا جۇمىسقا ورنالاسقان جۇمىسشى - قىزمەتكەرلەر 15 مىڭ 542 ادام - رەت، كاسىپ اشۋ كۋرسىنا قاتىناسقاندار ٴبىر مىڭ 895 ادام - رەت تاربيەلەندى. «تاپسىرىس بەرۋ» ۇلگىسىندەگى جۇمىس ورنىن تۇراقتاندىرىپ تاربيەلەۋدەن كۋرسانتتاردىڭ مەملەكەتتە ٴبىر تۇتاس قولدانىلاتىن ٴتىل - جازۋ ورەسى، تەحنيكالىق قابىلەتى، جۇمىسقا ورنالاسۋ، كاسىپ اشۋ قابىلەتى كورنەكتى جوعارىلادى.

نىلقى اۋدانى قاراتوبە اۋىلىنداعى جاس كاسىپكەر ٴالىمتاي داۋلەتقان ۇلى 2019 - جىلى وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى ۇيىمداستىرعان اسپازدىق، ساياحاتتاعى ىسكەرلىككە تاربيەلەۋ كۋرستەرىنە قاتىناسىپ، وقۋىن اياقتاعاننان كەيىن قاراتوبە اۋىلىنان بيشۇي ساياحات كاسىپتىك سەلبەستىك كووپەراتيۆىن قۇرادى، قازىرگە دەيىن كووپەراتيۆكە 50 وتباسى مۇشە بولىپ، 102 ادام جۇمىسقا ورنالاسىپ، كولەمدەنگەن ساياحات كاسىپتىك سەلبەستىك كووپەراتيۆى العاشقى قادامدا قالىپتاستى.

بيىل وبلىسقا توتە قاراستى ورىندار ساياحات كاسىبىن دامىتۋدى توڭىرەكتەپ، كاسىپتىك ساپا مەن تەحنيكالىق ورەنى جوعارىلاتۋدى وزەك، قوناقساراي، ساياحات كووپەراتيۆى، كورىنىس رايونى سياقتى ساياحات كاسىپورىندارىنا تەحنيكالىق قىزمەت وتەۋشىلەردى ٴتۇيىن ەتىپ، ساياحات سالاسىندا جاڭادان ارتقان جۇمىسقا ورنالاسقاندارعا باعىتتاپ تەحنيكالىق كۋرس ۇيىمداستىرىپ، ساياحاتپەن شۇعىلدانۋشىلاردىڭ جالپى تۇلعالىق ساپاسىن بىرتىندەپ جوعارىلاتتى. قازىرگە دەيىن تانىستىرۋشى، جۇڭگوشا اسپازدىق، قوناقساراي قىزمەتكەرى سياقتىلاردان 5 مىڭ 17 ادام تاربيەلەدى.

«2018 - جىلى بانكەدەن قارىز الىپ، شاعىن تاعامجاي اشتىم، بىرنەشە جىلعى تيجاراتىم جاقسى بولىپ كەدەيلىكتەن ارىلدىم، وسى ەكى جىلدا تاعامجايىمنىڭ تيجاراتى تۇرالاي باستادى، ارحيۆ تۇرعىزىلىپ، كارتوچكا ورناتىلعان كەدەيلىكتەن ارىلعان وتباسىلارعا دەربەس كاسىپ اشۋ تولىقتاما قاراجاتى بار ەكەنىن بىلگەننەن كەيىن، الەۋمەتتىك اۋماققا بارىپ ىرىقتى تۇردە ٴوتىنىش ەتىپ، 16 مىڭ يۋان تولىقتاما قاراجاتقا يە بولدىم. قيىنشىلىقتا قالعان كەزىمىزدە ۇكىمەت كومەكتەسىپ، تاعامجاي تيجاراتىن جالعاستىرۋىما قولداۋ كورسەتتى، تۇرمىسىمىز قامتاماسىز ەتىلدى» دەدى چاپچال سىبە اۆتونوميالى اۋدانىنداعى كەدەيلىكتەن ارىلعان وتباسى مۇشەسى پارھات يسامدىن.

وبلىسقا توتە قاراستى ورىندارداعى ادام كۇشى بايلىعى جانە قوعامدىق قامتاماسىزداندىرۋ تاراۋلارى جۇمىستاندىرۋ ساياساتى مەن جۇمىستاندىرۋ قارجىسىنىڭ سۇيمەندىك، جەتەكشىلىك رولىن ساۋلەلەندىرىپ، قوعامدىق قامسىزداندىرۋ قاراجاتى، الەۋمەتتىك يگىلىك سيپاتتى جۇمىس ورنى تولىقتاما قاراجاتى، جۇمىستاندىرۋ كومەك قاراجاتى سياقتى جۇمىسقا ورنالاسۋدى سۇيەمەلدەۋ ساياساتىن تياناقتاندىرىپ، كاسىپ اشۋ، جەتىلدىرۋ بازا قۇرىلىسى، كاسىپ اشۋ كەپىلدىك امانات قارىزى، جۇمىسقا ورنالاسۋ كومەك قاراجاتى، دەربەس كاسىپ اشۋ تولىقتاما قاراجاتى سياقتى جاقتاردان ساياساتتىق قولداۋ كورسەتۋ ارقىلى كاسىپ اشۋ جانە كاسىپ اشۋ ارقىلى جۇمىستاندىرۋ قىزمەتىن جەبەدى.

بيىل وبلىسقا توتە قاراستى ورىنداردا قالا - قالاشىقتارداعى جاڭادان ارتقان جۇمىسقا ورنالاسقاندار 32 مىڭ 402 ادامعا، جاڭادان كاسىپ اشقاندار 8 مىڭ 193 ادامعا، كاسىپ اشۋ ارقىلى جۇمىستاندىرىلعاندار 13 مىڭ 181 ادامعا جەتىپ، جۇمىسقا ورنالاستىرۋ قاراجاتىنان جيىنى 125 ميلليون 354 مىڭ 700 يۋان تاراتىلدى، بۇل ساياساتتان 24 مىڭ 841 ادام يگىلىكتەندى، كاسىپ اشۋ كەپىلدىك قارىز سوماسىنان 87 ميلليون 570 مىڭ يۋان تاراتىلدى.