جاڭ جينفىڭ (ٴوز ٴتىلشىمىز)
«قىسقى عىلىم - تەحنيكا»، «عىلىم - تەحنيكا جالپىلاستىرۋ قيمىلى اپتالىعى» سياقتى قيمىلدار اۋىل - قىستاق عىلىم - تەحنيكا جالپىلاستىرۋىنداعى ماڭىزدى شارا. تاياۋ جىلداردان بەرى اۆتونوميالى وبلىس «قىسقى عىلىم - تەحنيكا»، «عىلىم - تەحنيكا جالپىلاستىرۋ قيمىلى اپتالىعى» قيمىلىن كۇش سالا ورىستەتىپ، عىلىم - تەحنيكانى، ونەردى وتباسىنا دەيىن جەتكىزىپ، شارۋالاردىڭ ۇيرەنۋىنە، پايدالانۋىنا مۇمكىندىك جاسادى. وبلىستىڭ ەكى ماجىلىسىندە ۋاكىلدەر مەن مۇشەلەر « قىسقى عىلىم - تەحنيكا» سياقتى عىلىم - تەحنيكا جالپىلاستىرۋ قيمىلىنا ەرەكشە نازار اۋداردى.
2021 - جىلى وبلىستىق، اۋدان - قالالىق عىلىم - تەحنيكا قوعامدارى ٴتۇرلى تاقىرىپتىق عىلىم - تەحنيكا جالپىلاستىرۋ قيمىلىن كۇش سالا ورىستەتىپ، جالپى حالىقتىڭ عىلمي ساپاسىن كۇشەيتتى. عىلىم ـ تەحنيكا جالپىلاستىرۋدى اۋىل ـ قىستاققا، مال شارۋاشىلىق رايوندارىنا، مەكتەپتەرگە، الەۋمەتتىك اۋماقتارعا، ورگاندارعا جەتكىزۋ سياقتى «بەستى جەتكىزۋ» قيمىلىن كۇش سالا ورىستەتىپ، ادامدى ارقاۋ ەتۋ تاقىرىبىن كورنەكتىلەندىرىپ، بارلىق ادامنىڭ عىلىم ـ تەحنيكاعا ات سالىسۋىن جەبەپ، تۇتاس قوعام عىلىم ـ تەحنيكانى جالپىلاستىرۋعا ٴمان بەرەتىن تاماشا اۋقىم قالىپتاستىردى.
بىلتىر قىس پەن بيىل كوكتەمگى «قىسقى عىلىم - تەحنيكا» قيمىلى 2021 - جىلى 12 - ايدىڭ باسىندا باستالعاننان بەرى، وبلىسقا توتە قاراستى ورىندار الۋان ٴتۇرلى ۇيرەنۋ قيمىلىن جاپپاي ورىستەتىپ، شارۋالاردىڭ عىلىم - تەحنيكا ۇيرەنۋ، ونەر ۇيرەنۋ ورلەۋىن كوتەردى. وبلىسقا توتە قاراستى اۋدان - قالالار ٴىس جۇزىندىك جاعدايمەن ۇشتاستىرىپ، شارۋالارعا مال باعىمشىلىعى، ەگىس داقىلدارىن ەگۋ، ومارتاشىلىق سياقتى جاقتارداعى تەحنيكالاردى جەتكىزدى، 4 ايعا جالعاسقان «قىسقى عىلىم ـ تەحنيكا» قيمىلىندا مەجەمەن رەت سانى بويىنشا 120 مىڭ شارۋا كۋرسقا قاتىناسادى.
1 ـ ايدىڭ 21 ـ كۇنى قۇلجا اۋدانى ٴۇشون حۇيزۋ ۇلتتىق اۋىلى جوعارعى ٴۇشون قىستاعى ومارتاشى شارۋالارعا 3 - رەت كۋرس اشىپ، 37 تۇرعىن كۋرسقا قاتىناستى. قىستاق تۇرعىنى ما چياڭ كۋرسقا قاتىناسۋ ارقىلى ومارتاشىلىق تەحنيكاسىن يگەرىپ، جىلىنا 80 دە 90 مىڭ يۋان كىرىس كىرگىزەتىنىن، بيىل تاعى 50 ارا ساندىعىن كوبەيتۋدى كوزدەپ وتىرعاندىعىن ايتتى.
قۇلجا قالاسى توعىراق اۋىلى قاراجەر قىستاعىنىڭ تۇرعىنى مامەتجان امۇت بىلاي دەدى: «قىستاقتا ٴبيداي، جۇگەرى ەگۋ تەحنيكاسى جانە باعىمشىلىق كۋرسى اشىلىپ، اۋىل شارۋاشىلىق، مال شارۋاشىلىق ماماندارى قولدانىلمالىلىعى كۇشتى ساباق بەردى».
وبلىستىق حالىق قۇرىلتايىنىڭ ۋاكىلى تۇرسىنجان احىمەت قۇلجا قالاسى قارا ٴدوڭ اۋىلى جىرعالاڭ قىستاعىنداعى ەرەكشە ەگىمشىلىكپەن شۇعىلداناتىن وتباسى، ونىڭ شيە ەككەنىنە 15 جىل بولعان، ەككەن جەرى العاشقى كەزدەگى 5 مۋدان قازىرگى 28 مۋعا جەتىپ، جىلدىق كىرىسى 400 مىڭ يۋاننان اسقان. بيىل تۇرسىنجان 60 مۋ جەتىلدىرۋ بازاسىن قۇرىپ، باسقا قىستاق تۇرعىندارىن ەگىمشىلىكپەن اينالىسۋعا باستاۋدى جوسپارلاپ وتىر. ول بىلاي دەدى: «عىلمي جولمەن ەگۋ مەن اتىز باسىندا باسقارۋ توتەنشە ماڭىزدى، تىڭايتقىشتى قالاي بەرۋ، قالاي بۇتاۋ، توپىراق قۇرامىنداعى ميكرو ەلەمەنتتەردى تەكسەرۋ، دەرت - دەربەزدەن ساقتانۋ سياقتىلاردىڭ بارلىعىنا عىلىم - تەحنيكا قاجەت، ٴار جىلى وبلىستىڭ، قالانىڭ ورمان، جەمىس - جيدەك ماماندارى بازاعا كەلىپ تەحنيكالىق جاقتان جەتەكشىلىك ەتەدى. <قىسقى عىلىم - تەحنيكا> قيمىلى شارۋالاردىڭ ەسىك الدىندا تەحنيكا ۇيرەنۋىنە مۇمكىندىك جاسادى».
وبلىستىق ساياسي كەڭەستىڭ مۇشەسى پان تاۋ بىلاي دەدى: عىلىم ـ تەحنيكا - ٴبىرىنشى وندىرگىش كۇش. بۇدان بىلاي «قىسقى عىلىم - تەحنيكا» قيمىلىن ۇزدىكسىز دانەكەر ەتىپ، ەگىنشىلىك، ورمانشىلىق، مال شارۋاشىلىق ماماندارىن ۇسىنىس ەتىپ، تەحنيكالىق تاربيەلەۋ، ناق مايداندا ۇلگى كورسەتۋ، لەكسيا جاساۋ، عىلىم - تەحنيكا جالپىلاستىرۋ كورمە بۇيىمدارىن كورمەگە قويۋ سياقتى تاسىلدەر ارقىلى عىلىم - تەحنيكانى جالپىلاستىرىپ، ٴار ۇلت بۇقاراسىنىڭ عىلىم - تەحنيكاعا سۇيەنىپ اۋقاتتانۋ قابلەتىن جوعارىلاتىپ، اۋىل - قىستاقتىڭ گۇلدەنۋىنە دەم بەرۋ كەرەك. سونىمەن بىرگە، جاس وسپىرىمدەردىڭ عىلىم - تەحنيكا جالپىلاستىرۋ تاربيەسى قىزمەتى مەن عىلىم - تەحنيكا جالپىلاستىرۋ الاڭ، ساراي قۇرىلىسىن دا كۇشەيتۋ كەرەك. ول بىلاي دەپ قارادى: «عىلىم - تەحنيكا سارايى − ۇكىمەتتىڭ بۇقاراعا عىلىم - تەحنيكا جالپىلاستىرۋ ۇگىت - تاربيەسىن جۇرگىزۋىندەگى قاجەتتى نەگىزدىك قۇرىلعى، ماڭىزدى دانەكەر جانە تۇراقتىلىق، ۇزاق مەرزىمدىك سيپاتقا يە باقشا، سونداي - اق قالانىڭ عىلىم - تەحنيكا جالپىلاستىرۋ قيمىلىنىڭ نەگىزدىك تەكشەسى».