شي جينپيڭ مەملەكەت وردەنىنە جانە مەملەكەت داڭق اتاعىنا يە بولعاندارعا وردەن، مەدال تابىس ەتتى ٴارى ماڭىزدى ٴسوز سويلەدى

　　لي چياڭ، جاۋ لىجي، ۋاڭ حۋنيڭ، ديڭ شۋەشياڭ، لي شي، حان جىڭ قاتىناستى، ساي چي باسقاردى

9 - ايدىڭ 29 - كۇنى جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت داڭق اتاعىن تابىس ەتۋ سالتى بەيجيڭ حالىق سارايىنىڭ جينسى زالىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەملەكەت وردەنىنە جانە مەملەكەت داڭق اتاعىنا يە بولعاندارعا وردەن، مەدال تابىس ەتتى ءارى ماڭىزدى ءسوز سويلەدى.

□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

9 - ايدىڭ 29 - كۇنى جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت   داڭق اتاعىن  تابىس  ەتۋ سالتى بەيجيڭ  حالىق  سارايىنىڭ جينسى زالىندا سالتاناتپەن وتكىزىلدى. شي جينپيڭ قاتارلى باسشى جولداستار مەملەكەت وردەنىنە جانە مەملەكەت داڭق اتاعىنا يە بولعاندارمەن بىرگە ەستەلىك سۋرەتكە ءتۇستى.

□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

شينحۋا اگەنتتىگىنىڭ 9 ـ ايدىڭ 29 ـ كۇنى بەيجيڭنەن بەرگەن حابارى. جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت داڭق اتاعىن تابىس ەتۋ سالتى 9 ـ ايدىڭ 29 ـ كۇنى تۇستەن بۇرىن بەيجيڭ حالىق سارايىنىڭ جينسى زالىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ مەملەكەت وردەنىنە جانە مەملەكەت داڭق اتاعىنا يە بولعاندارعا وردەن، مەدال تابىس ەتتى ٴارى ماڭىزدى ٴسوز سويلەدى. شي جينپيڭ بىلاي دەپ باسا دارىپتەدى: ۇلى ٴداۋىر قاھارماندارعا ۇندەۋ سالادى، قاھارمانداردى سومدايدى. قاھارماندار تولاسسىز جارىققا شىقسا، پارتيا مەن حالىق ىستەرى گۇلدەنىپ ـ تولىسىپ، باياندى كوركەيەدى. ٴار دارەجەلى پارتكوم مەن ۇكىمەت قاھارمان ۇلگىلەرگە كوڭىل ٴبولىپ، قامقورلىق جاساپ، بۇكىل قوعامنىڭ قاھارمانداردى ارداقتاۋىن، قاھارمانداردان ۇيرەنۋىن، قاھارمان بولۋعا تالپىنۋىن ىلگەرىلەتۋى كەرەك. ماداقتالىپ ـ سيلانعان جولداستاردىڭ داڭقتى قاستەرلەپ، كۇش ۇستىنە كۇش قوسىپ، اناعۇرلىم زور داڭققا قول جەتكىزۋىن ٴۇمىت ەتەمىن.

لي چياڭ، جاۋ لىجي، ۋاڭ حۋنيڭ، ديڭ شۋەشياڭ، لي شي، حان جىڭ تابىس ەتۋ سالتىنا قاتىناستى، ساي چي باسقاردى.

ساعات 9 مولشەرىندە، مەملەكەت وردەنىنە جانە مەملەكەت داڭق اتاعىنا يە بولعاندار قۇرمەتتى قوناقتار كولىگىنە توپتىق وتىرىپ، تۇرعان جەرلەرىنەن جولعا شىعىپ، قۇرمەتتى قوناقتاردى قورعاۋ موتوتسيكل اترەتىنىڭ قورعاۋىندا حالىق سارايىنا قاراي بەت الدى. حالىق سارايىنىڭ شىعىس قاقپاسىنىڭ سىرتىندا قۇرمەت قاراۋىلى جولدىڭ ەكى جاعىنا بولىنە قاتار تۇزەدى، جاستار مەن ورەندەر قىزۋ مەرەيمەن الاقايلاپ قۇرمەت ٴبىلدىردى. مەملەكەت وردەنىنە جانە مەملەكەت داڭق اتاعىنا يە بولعاندار قىزىل كىلەمدى بويلاي باسپالداقپەن جوعارى كوتەرىلىپ، حالىق سارايىنا كىردى. پارتيا مەن مەملەكەتكە ەڭبەك سىڭىرگەندەردى، داڭق اپەرگەندەردى ماداقتاۋ ـ سيلاۋ قىزمەت كوميتەتىندەگى قاتىستى باسشى جولداستار قاتارلىلار وسى ارادا ولاردى توپتىق قارسى الدى.

حالىق سارايىنىڭ جينسى زالى ايبىندى دا دۋماندى بەينەگە شومدى. قىزىل ٴتۇستى الىپ ارتقى كورىنىستىك تاقتاداعى رەسپۋبليكا وردەنى، دوستىق وردەنى، مەملەكەت داڭق اتاعى مەدالىنىڭ ورنەگى جارقىراپ تۇر. ارتقى كورىنىستىك تاقتا الدىنا 18 بەس جۇلدىزدى نارت قىزىل تۋ ەكى جاققا بولىنە قويىلىپتى، 18 ەر تۇلعالى قۇرمەت قاراۋىلى مىلتىقتارىن سەرت ۇستاپ، قاسقايىپ تۇر.

ساعات 9دان 58 مينۋت وتكەندە، شات مەرەيلى مۋزيكا ۇنىنە ىلەسىپ، شي جينپيڭ مەملەكەت وردەنىنە جانە مەملەكەت داڭق اتاعىنا يە بولعاندارمەن بىرگە ٴماجىلىس الاڭىنا كىرگەندە، تۇتاس الاڭداعىلار ورىندارىنان تۇرىپ، قىزۋ شاپالاق سوقتى.

ٴدال ساعات 10دا، اسكەري وركەستردىڭ كەرنايشىلارىنىڭ سالت كەرنايىن ۇرلەۋىمەن تابىس ەتۋ سالتى باستالدى. «ەرىكتىلەر مارشى» ورىندالىپ، بۇكىل الاڭداعىلار مەملەكەت ٴانىن اسقاقتاتا شىرقادى.

ساي چي شي جينپيڭ قول قويعان جۇڭحۋا حالىق رەسپۋبليكاسى ٴتوراعاسىنىڭ بۇيرىعىن وقىدى. ٴتوراعا بۇيرىعىندا مىنالار اتاپ كورسەتىلدى: جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاپ، جاڭا جۇڭگونىڭ قۇرىلىسى مەن دامۋىنا كورنەكتى ۇلەس قوسقان، ەڭبەك سىڭىرگەن ۇلگىلى قايراتكەرلەردى سالتاناتپەن ماداقتاۋ ـ سيلاۋ، ۇلت رۋحىن جانە ٴداۋىر رۋحىن اسقاقتاتۋ ٴۇشىن، 14 ـ كەزەكتى مەملەكەتتىك حالىق قۇرىلتايى تۇراقتى كوميتەتى 11 ـ ٴماجىلىسىنىڭ قاۋلىسىنا ساي، ۋاڭ يۇڭجى قاتارلى 4 ادامعا ”رەسپۋبليكا وردەنى“ بەرىلدى، ديلما روسەۆكە ”دوستىق وردەنى“ بەرىلدى، ۋاڭ شياۋمو قاتارلى 10 ادامعا مەملەكەت داڭق اتاعى بەرىلدى.

2 تۋ كوتەرۋشى بەس جۇلدىزدى قىزىل تۋدى بيىك ۇستاپ، 3 قۇرمەت قاراۋىلى رەسپۋبليكا وردەنىن، دوستىق وردەنىن جانە مەملەكەت داڭق اتاعى مەدالىن قولدارىنا الىپ، نىق قاداممەن سالت وتەتىن ناق مايدانعا كىردى.

ايبىندى «وتان قاھارماندارىنا قۇرمەت» مۋزيكاسى ۇنىمەن بىرگە شي جينپيڭ مەملەكەت وردەنىنە جانە مەملەكەت داڭق اتاعىنا يە بولعاندارعا وردەندى، مەدالدى تابىس ەتتى ٴارى ولارمەن ىقىلاسپەن قول الىسىپ، قۇتتىقتادى، تۇتاس الاڭدا قىزۋ شاپالاق ٴۇنى تولاستامادى. پيونەرلەر وسى ەڭبەك سىڭىرگەن ۇلگىلى قايراتكەرلەرگە جايناعان گۇل شوقتارىن ۇسىنىپ، سالەم بەرىپ، قۇرمەت ٴبىلدىردى.

تۇتاس زالداعىلاردىڭ قىزۋ شاپالاق ٴۇنى ىشىندە شي جينپيڭ ماڭىزدى ٴسوز سويلەدى. ول الدىمەن پارتيا ورتالىق كوميتەتى، مەملەكەتتىك حالىق قۇرىلتايى، مەملەكەتتىك كەڭەس جانە ورتالىق اسكەري ىستەر كوميتەتى اتىنان ”رەسپۋبليكا وردەنىنە“ جانە مەملەكەت داڭق اتاعىنا يە بولعان قاھارمان ۇلگىلەردى، ”دوستىق وردەنىنە“ يە بولعان حالىقارالىق دوستاردى قىزۋ قۇتتىقتاپ، ولارعا وسكەلەڭ قۇرمەت ٴبىلدىردى.

شي جينپيڭ بىلاي دەپ اتاپ كورسەتتى: جاڭا جۇڭگو قۇرىلعان 75 جىلدان بەرى، جۇڭگو كوممۋنيستىك پارتياسى بۇكىل ەلدەگى ٴار ۇلت حالقىن ىنتىماقتاستىرىپ، باستاپ، ەكونوميكا تەز قارقىنمەن دامىعان جانە قوعام ۇزاق ۋاقىت ورنىقتى بولعان ەكى ۇلكەن كەرەمەتتى جاراتتى، ۇلى وتانىمىزدا وراسان زور وزگەرىستەر تۋىلىپ، جۇڭحۋا ۇلتىنىڭ ۇلى گۇلدەنۋى بوگەۋ بەرمەس تاريحي ۇردىسكە قادام تاستادى. وسى ايبىنى اسقاق دامۋ بارىسىندا ٴارقايسى شەپتە توپ ـ توپ قاھارمان ۇلگىلەر جارىققا شىقتى. بۇگىن ماداقتالىپ ـ سيلانعان جولداستار وسىلاردىڭ كورنەكتى ۋاكىلدەرى. ولاردىڭ ىزگى ىستەرى مەن كورنەكتى ۇلەستەرى رەسپۋبليكا تاريحىنا ماڭگى جازىلادى، ولاردىڭ ادال، تاباندى، قاراپايىم تاڭداۋلى قاسيەتى بۇكىل پارتيا، بۇكىل ەلدەگى ٴار ۇلت حالقىنىڭ ۇيرەنۋىنە تاتيدى.

شي جينپيڭ بىلاي دەپ باسا دارىپتەدى: ەلىمىز جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدىڭ شەشۋشى مەزگىلىندە تۇر. بۇكىل پارتيا، بۇكىل ەلدەگى ٴار ۇلت حالقى قاھارمان ۇلگىلەردى ونەگە ەتىپ، ىنتىماقتاسا ەكپىندەي ىلگەرىلەپ، قايراتتانا العا باسىپ، مەملەكەتتى قۇدىرەتتەندىرۋ كەلەلى ىسىنە بىرگە كىرىسۋدىڭ تەلەگەي كۇشىن ۇيىستىرۋى كەرەك. مەملەكەتتى قۇدىرەتتەندىرۋ مۇراتىن كوكەيدە ساقتاپ، مەملەكەتتىڭ باي ـ قۇدىرەتتى بولۋىن ويلاپ، حالىقتىڭ باقىتىن كوكسەپ، وتاندى ادالدىقپەن ٴسۇيىپ، وتاننىڭ ٴۇمىتىن اقتاۋعا بەل بايلاپ، ٴوزىن مەملەكەت ىستەرىنە ارناپ، مەملەكەت ٴۇشىن بورىشىن اتقارۋ، حالىق ٴۇشىن قىزمەت ىستەۋ بارىسىندا وزىندىك قۇنىن جۇزەگە اسىرىپ، ٴومىر كەلبەتىن ايگىلەۋ كەرەك. مەملەكەتتى قۇدىرەتتەندىرۋ قابىلەتىن جەتىلدىرىپ، ٴداۋىر دامۋىنىڭ جاڭا تالابىنا ۇيلەسىپ، جاڭا بىلىمدەردى ۇيرەنىپ، جاڭا شەبەرلىكتى يگەرىپ، ناعىز قابىلەتتى شىڭداپ، قايسى كاسىپتى ىستەسە، سول كاسىپتى ٴسۇيىپ، قاي سالانى زەرتتەسە، سول سالانىڭ مامانى بولىپ، ٴىس تىندىرىپ، ناتيجە شىعارۋعا شەبەر جۇمىس ورنى شەبەرى، مايتالمان مامان بولۋعا قۇلشىنۋ كەرەك. مەملەكەتتى قۇدىرەتتەندىرۋگە باتىلدىقپەن ۇلەس قوسىپ، ۋاقىتپەن جارىساتىن تاريحي ىرىقتىلىق، قوجايىندىق جاۋاپكەرشىلىك ارقالاۋ ارقىلى قايراتتانا العا ۇمتىلىپ، قيىندىققا قارسى اتتانىپ، ۇزدىك بولۋعا تالپىنىپ، كەمەلدىلىككە ۇمتىلىپ، قاراپايىم قىزمەت ورنىندا كەرەمەت ناتيجەلەر جاراتىپ، دامۋداعى قيىن ماسەلەلەردى شەشۋ، رەفورمانىڭ قيىن وتكەلدەرىنەن قامال الۋ، قوعامنىڭ جاراسىمدىلىعىن، ورنىقتىلىعىن قورعاۋ جاعىندا ۇزدىكسىز ناتيجە جاراتۋ كەرەك.

شي جينپيڭ بىلاي دەپ اتاپ كورسەتتى: 75 جىلدان بەرى دۇنيە جۇزىندە جۇڭگو حالقىمەن ساپارلاس، مۇراتتاس بولىپ، تار جول، تايعاق كەشۋلەردى بىرگە وتكەرگەن كوپتەگەن كونە دوستار، جاقسى دوستار بولدى، بۇگىن ”دوستىق وردەنى“ بەرىلگەن ديلما روسەۆ حانىم سولاردىڭ كورنەكتى ۋاكىلى. جۇڭگو حالقى جۇڭگونىڭ دامۋىنا، جۇڭگو حالقىنىڭ ٴار ەل حالقىمەن دوستىعىن نىعايتۋعا كورنەكتى ۇلەس قوسقان حالىقاراداعى دوستاردى ماڭگى ۇمىتپايدى. جۇڭگو حالقى دۇنيە جۇزىندەگى ٴار ەل حالقىمەن قول ۇستاسىپ، دۇنيە ٴجۇزىنىڭ بەيبىتشىلىگىن قورعاپ، بىرگە دامۋدى جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ادامزاتتىڭ اناعۇرلىم جارقىن بولاشاعىن اشۋدى قالايدى.

شي جينپيڭ بىلاي دەپ باسا دارىپتەدى: جاڭا كارتينا ٴبىزدىڭ بىرگە كەسكىندەۋىمىزدى قاجەت ەتەدى، جاڭا تاريح ٴبىزدىڭ بىرگە جاراتۋىمىزدى قاجەت ەتەدى. نىسانانى كوزدەپ، ٴبىر نيەتپەن كۇش قوسىپ، ٴورىس اشا العا ىلگەرىلەپ، حالىق رەسپۋبليكاسىنىڭ اناعۇرلىم كوركەم دە تارتىمدى جاڭا تاراۋىن بىرگە جازايىق.

تابىس ەتۋ سالتىندا، ”رەسپۋبليكا وردەنىنە“ يە بولعان حۋاڭ زۇڭدى، ”دوستىق وردەنىنە“ يە بولعان ديلما روسەۆ مەملەكەت وردەنىنە جانە مەملەكەت داڭق اتاعىنا يە بولعاندار اتىنان لەبىز ٴبىلدىردى.

تابىس ەتۋ سالتىنان كەيىن، شي جينپيڭ قاتارلى باسشى جولداستار مەملەكەت وردەنىنە جانە مەملەكەت داڭق اتاعىنا يە بولعاندارمەن بىرگە ەستەلىك سۋرەتكە ٴتۇستى.

بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ٴبىر ٴبولىم ورىنباسار باستىقتارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ٴبىر ٴبولىم ورىنباسار ٴتوراعالارى، ورتالىق اسكەري ىستەر كوميتەتىنىڭ مۇشەلەرى تابىس ەتۋ سالتىنا قاتىناستى.

ورتالىقتاعى پارتيا، ۇكىمەت، ارميا، بۇقارالىق ۇيىمداردىڭ قاتىستى تاراۋلارىنداعى جانە بەيجيڭ قالاسىنداعى جاۋاپتى جولداستار، مەملەكەت وردەنىنە جانە مەملەكەت داڭق اتاعىنا يە بولعانداردىڭ تۋىس ـ تۋعاندارىنىڭ ۋاكىلدەرى، تۇرعان ورىندارىنىڭ ۋاكىلدەرى، بۇرىن ەڭبەك كورسەتىپ، داڭققا يە بولىپ ماداقتالىپ ـ سيلانعانداردىڭ ۋاكىلدەرى، قاتىستى مەملەكەتتەردىڭ جۇڭگودا تۇراتىن ەلشىلەرى، ٴار سالا كادر ـ بۇقارا ۋاكىلدەرى سياقتىلاردان 1000عا تاياۋ ادام تابىس ەتۋ سالتىنا قاتىناستى.