انار بۇلت \ شينجياڭ گازەتىنىڭ ءتىلشىسى ياۋ گاڭ 5 - ايدىڭ 11 - كۇنى گۋاڭجوۋدان حابارلايدى. ”ءبىزدىڭ شينجياڭ جاقسى جەر! تيانشان الابىنىڭ بارلىق جەرى شۇرايلى جايلىم، ءشول - ءجازيرالار قۇنارلى ەگىنجايعا اينالىپ، قاسات قارلار ەرىسە اتىزداردى سۋارار“... 5 - ايدىڭ 10 - كۇنى كەشتە «ءبىزدىڭ شينجياڭ جاقسى جەر» ءانى گۋاڭجوۋ مۇناراسىندا اۋەلەپ، اسەرلى دە جاعىمدى ءان اۋەنى سول ورىنداعى ساياحاتشىلارعا شينجياڭنىڭ ىستىق ىقىلاسىن سەزىندىردى.

سول كۇنى كولەمدى مۋزيكا، ءبي، ولەڭ، سۋرەت قويىلىمى «جەلەگىڭدى اش − شينجياڭ جاقسى جەر» قويىلىمىنىڭ ءبىر ءبولىم ارتيستەرى مەن قىزمەتكەرلەرى ”شياۋمانياۋ“ دەپ اتالعان گۋاڭجوۋ مۇناراسىنىڭ استىندا كۋايشان ارقىلى كەڭ − بايتاق كورىكتى شينجياڭدى ۇگىتتەپ، شينجياڭدىقتاردىڭ ىقىلاستى قوناعۋارلىعىن ايگىلەدى.

مادەنيەت جانە ساياحات مينيسترلىگى، اۆتونوميالى رايوندىق حالىق ۇكىمەتى بىرلەسىپ جاساعان وسى تەاتر شينجياڭنىڭ الۋان ءتۇرلى تاماشا وڭىرلىك مادەنيەت ەرەكشەلىگى مەن مادەنيەت جاسامپازدىعى جەتىستىكتەرىن ايگىلەدى، بۇل تەاتر 5 - ايدىڭ 13 -، 14 - كۇندەرى گۋاڭجوۋ ۇلكەن تەاترحاناسىندا جۇرتپەن جۇزدەسەدى. وسى رەتكى كۋايشان قيمىلى كونسەرتكە دايىندالۋ قيمىلىنىڭ ءبىرى.

”شينجياڭنان كەلگەن ارتيستەر مۋزيكا جانە اندەرىمەن تاماشا تۇرمىسقا دەگەن تالپىنىسىن ايگىلەدى. ’شياۋمانياۋ‘ گۋاڭجوۋدىڭ ساياحات تەرەزەسى، وسى رەتكى كۋايشان قيمىلى ءتىپتى دە كوپ ادامدى شينجياڭعا بارىپ ارالاۋعا، كورۋگە، شينجياڭعا بارىپ ەرەكشە مادەنيەت كوركەمونەر تارتىمدىلىعىن سەزىنۋگە باۋرادى“، - دەدى گۋاڭجوۋ مۇناراسى مادەنيەت - ساياحاتتى دامىتۋ جارنا شەكتى سەرىكتەستىگىنىڭ باس ديرەكتورى لو جيۋ. ”انشىلەردىڭ داۋىسى وتە اسەم ەكەن، گۋاڭجوۋداعى ساياحاتىمنىڭ ەڭ سوڭعى كۇنى وسىنداي تاماشا ءاندى ەستىپ وتە باقىتتى سەزىندىم، وراي بولسا، ءسوزسىز، شينجياڭعا بارىپ كورەمىن“، - دەدى ەگيپەتتەن كەلگەن ساياحاتشى عاني.

سول كۇنى شينجياڭنىڭ ۆوكالدىق انشىلەرى جۋجياڭنىڭ تۇنگى ساياحات كەمەسىنە شىعىپ، ساياحاتشىلارعا «سىزگە روزا گۇلىن تارتۋ ەتەمىن»، «ءبىر رۋمكا بال شاراپ» سياقتى اندەردى ورىنداپ بەردى. كونسەرتتىڭ اتقارۋشى رەجيسسەرى جاسۇر تۇرسۇن بىلاي دەدى: ”شينجياڭ − ءان - ءبي مەكەنى، بۇكىل ەلدىڭ كوپتەگەن جەرى شينجياڭ ءبيىن ۇيرەنۋدە. كۋايشان ءتاسىلى ارقىلى ءبىز كوپشىلىككە شينجياڭنىڭ مادەنيەت كوركەمونەرىن جانە سالت - ءداستۇرىن ايگىلەپ، كونسەرتكە ۇگىت جاساۋمەن بىرگە، شينجياڭنىڭ جاقسى جەر ەكەنىن دە ۇگىتتەدىك، تانىستىردىق“.