تاجىكستان دەربەس جۇمىسشى ۇيىمى بىرلەستىگىنىڭ ۋاكىلدەر ۇيىرمەسى شينجياڭعا كەلىپ ەكسكۋرسيادا، ساپاردا بولدى −

　　”شينجياڭداعى ءار ۇلت حالقى باقىتتى، الاڭسىز تۇرمىس كەشىرىپ جاتىر ەكەن“

　□ انار بۇلت \ شينجياڭ گازەتىنىڭ ءتىلشىسى لي جياني

8 - ايدىڭ 25 - كۇنىنەن 30 - كۇنىنە دەيىن تاجىكستان دەربەس جۇمىسشى ۇيىمى بىرلەستىگىنىڭ ۋاكىلدەر ۇيىرمەسىندەگىلەر شينجياڭدى ارالاپ، ءۇرىمجى قالاسىنا، قاشقار ايماعىنا، قىزىلسۋ قىرعىز اۆتونوميالى وبلىسىنا بارىپ ەكسكۋرسيادا، ساپاردا بولدى، ارالىقتا ۋاكىلدەر ۇيىرمەسىندەگىلەر كاسىپورىنعا، مۇراجايعا، مەشىتكە جانە اۋىل - قىستاقتا بارىپ، شينجياڭنىڭ ەكونوميكالىق دامۋ، مادەنيەتتى گۇلدەندىرۋ، ءدىن تاتۋلىعى جانە اۋىل - قىستاقتى گۇلدەندىرۋ سياقتى جاقتارداعى ناقتى جاعدايىن ىشكەرىلەي ۇعىستى.

شينجياڭ جۇڭتاي (توبى) شەكتى جاۋاپكەرشىلىك سەرىكتەستىگى سياقتى كاسىپورىنداردى ەكسكۋرسيالاعاندا، ۋاكىلدەر ۇيىرمەسىنىڭ مۇشەلەرى شينجياڭنىڭ كاسىپورىندارىندا كۇشتى عىلىم - تەحنيكالىق ناقتى قۋاتى جانە جاڭالىق اشۋ قابىلەتى بولىپ عانا قويماي، كاسىپورىنداعى قىزمەتكەرلەردىڭ ءتۇرلى ۇقىق - مۇددەسىن قامتاماسىز ەتۋگە دە باسا ءمان بەرىپتى دەپ اۋىز جاپپاي القادى.

جۇڭگو شينجياڭىنىڭ ۇلتتار مۋزيكا اسپابى قىستاعى، قىزىلسۋ وبلىستىق مۇراجاي، ماناس ەپوسى ۇلكەن تەاترحاناسى سياقتى جەرلەردە ۋاكىلدەر ۇيىرمەسىنىڭ مۇشەلەرى تۇسىندىرۋشىگە ىلەسىپ، شينجياڭنىڭ از ۇلتتاردىڭ مادەنيەتىن جالعاستىرۋ، قورعاۋ جاقتارىندا ىستەگەن قىزمەتتەرىن ۇعىستى، سونداي - اق مۋزيكا اسپابىن جاساۋشىلارمەن، مۋزيكا ورىنداۋشىلارمەن ىشكەرىلەي پىكىرۋ اۋىستىرىپ، بىرگە مۋزيكا ورىندادى.

”ءتىل جانە ادەبيەت تۋىندىلارى ءار ۇلت جونىنەن العاندا ەرەكشە ماڭىزدى، ەگەر دە وسىلاردان ايرىلسا، ۇلت تا ەرەكشەلىگىنەن ايرىلادى“. تاجىكستان دەربەس جۇمىسشى ۇيىمى بىرلەستىگى حالىقارا ءبولىمىنىڭ باستىعى يۇنۇسوۆ جامشيد سابيروۆيچ: جۇڭگونىڭ شينجياڭىندا قىرعىز ۇلتىنىڭ تاريحىن ەستەلىككە العان قۇندى مادەني مۇرانى كورگەندىگىمە ەرەكشە قۋانىشتىمىن، ۇكىمەتتىڭ از ۇلتتاردىڭ مادەنيەتىن جالعاستىرۋىنا، دامىتۋىنا قولداۋ كورسەتۋدە جاساعان قۇلشىنىسىن سەزىندىم، - دەدى.

”موينىنداعى بەلگى تاقتايشانى نەگە ىستەتەدى“؟ ”بۇل سيىر قانشا سالماق تارتادى“؟ ”ءبىر مۋ جەردەگى جۇزىمنەن قانشالىق ءونىم الاسىزدار“؟... نانداشين اۋىل شارۋاشىلىق جارنا شەكتى سەرىكتەستىگىندە ۋاكىلدەر ۇيىرمەسىنىڭ مۇشەلەرى مال باعىمشىلىعى اۋماعىن، ءجۇزىم ءۇزۋ اۋماعىن ارالاپ، ناندا سەرىكتەستىگىنىڭ مال شارۋاشىلىعى، ءسۇت ونىمدەرى، اۋىل شارۋاشىلىق سەيىل - سەرۋەن ساياحاتى سياقتى كاسىپ سالالارىنىڭ دامۋ جاعدايىن جاقىننان ۇعىستى.

قىزىلسۋ وبلىسى انچيلا كىلەم شەكتى سەرىكتەستىگىندە ۋاكىلدەر ۇيىرمەسىندەگىلەر كىلەم ءوندىرۋ، جاساۋ تەحنولوگياسىن تاپتەشتەي ۇعىستى، ءارقانداي ورنەكتەگى كىلەمدى توقي الاتىندىعىنان، سونداي - اق 2 كۇن ۋاقىت عانا جۇمساپ جاساپ بولاتىندىعىنان حابار تاپقان كوپشىلىك اڭ - تاڭ بولىپ، ءبىر كىلەم بۇيىرتىپ جاساتىپ، تاجىكستانعا الىپ كەتپەكشى ەكەندىكتەرىن ءبىر اۋىزدان ءبىلدىرىستى.

كۇزدىڭ باس كەزىندەگى شينجياڭدا قاۋىن - قاربىزدىڭ، جەمىس - جيدەكتىڭ حوش ءيىسى اڭقىدى، اتۇش قالاسى مۇناقى ءجۇزىمى ەكولوگيالىق مادەنيەت - ساياحات كورىنىس وڭىرىنە بارساڭىز، جالتىراعان، ءموپ - ءمولدىر، دوڭگەلەنىپ تولىسقان جۇزىمدەر بۇتاقتا سامسىپ تۇرعاندىعىن كورەسىز، كوپشىلىك ءجۇزىم باعىنداعى اينەك شارباق جولمەن ءجۇرىپ، باق اۋماعىنىڭ ەگىمشىلىك كاسىبى مەن ساياحات كاسىبىن ورگانيكالى ۇشتاستىرىپ، ونىمدىلىكتى جوعارىلاتۋدى، شارۋالاردىڭ كىرىسىن ارتتىرۋدى جەبەۋ جاعدايىن ۇعىستى. ازحان ءانجۇر سالت - سانا مادەنيەت - ساياحات كورىنىس وڭىرىندە ۋاكىلدەر ۇيىرمەسىنىڭ مۇشەلەرى ”ءتاتتى ءمانتى“ انجۇردەن تاتىپ كورىپ، ەرەكشەلىككە يە حالىقتىق تۇسەلحانانى ەكسكۋرسيالاپ، جەرگىلىكتى قىستاق تۇرعىندارىنىڭ باقىتتى تۇرمىسىن سەزىندى.

شينجياڭ حالىقارالىق ءماجىلىس - كورمە ورتالىعىندا ۋاكىلدەر ۇيىرمەسىندەگىلەر ”شينجياڭنىڭ لاڭكەستىككە قارسى تۇرۋ جانە ۇشقارىلىقتى الاستاۋ كۇرەسى نەگىزگى تاقىرىپتىق كورمەسىن“ ەكسكۋرسيالادى، قىزمەتكەرلەر سۋرەت، بەينەكەسكىن، ناقتى زاتتار ارقىلى كوپشىلىككە شينجياڭنىڭ لاڭكەستىككە قارسى تۇرۋ جانە ۇشقارىلىقتى الاستاۋ كۇرەسىن زاڭ بويىنشا ورىستەتۋدە ىستەگەن قىزمەتتەرى مەن جاساعان قۇلشىنىستارىن تانىستىردى.

”مەيلى تاجىكستان، الدە جۇڭگو بولسىن، ءبىزدىڭ نىسانامىز بىرەۋ عانا، ياعني لاڭكەستىككە، ۇشقارىلىققا قارسى تۇرىپ، حالىقتى باقىتقا كەنەلتۋ“، تاجىكستان دەربەس جۇمىسشى ۇيىمى بىرلەستىگىنىڭ ءبىرىنشى ورىنباسار ءتوراعاسى فايديزودا يسمەر بىرنەشە جەردە ەكسكۋرسيادا، ساپاردا بولعاننان كەيىن مىنالاردى ءبىلدىردى: مەن شينجياڭنىڭ ۇزدىكسىز دامىعان، العا باسقان ءوڭىر ەكەندىگىن، شينجياڭداعى ءار ۇلت حالقىنىڭ باقىتتى، الاڭسىز تۇرمىس كەشىرىپ جاتقاندىعىن كوردىم، تاجىكستان دا وسى بەتالىسقا قاراي قۇلشىنادى.

6 كۇندىك ەكسكۋرسيا، ساپار جۇڭگوعا تۇڭعىش رەت كەلگەن تاجىكستان حيميا كاسىپ سالاسى جۇمىسشى ۇيىمىنىڭ ءتوراعاسى زابيروۆ جامشيد حانزاروۆيچيعا تەرەڭ اسەر قالدىردى. ول بىلاي دەدى: ”قاتتى تاڭ قالدىم! ەكسكۋرسيا ارقىلى جۇڭگو ۇكىمەتىنىڭ كاسىپورىنداردىڭ دامۋىن بار كۇشپەن قولداعان بەكىمىن سەزىندىم ءارى ءار ۇلت بۇقاراسىنىڭ تاتۋ - ءتاتتى، جاراسىمدى وتكەن تاماشا جاعدايلارىن كوردىم، وسىنىڭ ءبارى جۇڭگونىڭ كەرەمەت تابىستارعا قول جەتكىزۋىندەگى كەم بولسا بولمايتىن ءبىر بولىگى“.