انار بۇلت \ شينجياڭ گازەتىنىڭ ءتىلشىسى ۋاڭ جيڭجيڭ، ەرىكتى تىلشىلەر ۋاڭ جۇن، چاڭ ي 7 - ايدىڭ 2 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، بيىل قۇربان ايت مەرەكەسى دەمالىسى كەزىندە بۇكىل شينجياڭ بويىنشا جالپى 9 ميلليون 477 مىڭ 200 ساياحاتشى (رەت) قابىلدانىپ، ساياحات كىرىسى 9 ميلليارد 193 ميلليون يۋانعا جەتكەن.

قۇربان ايت مەرەكەسى دەمالىسى كەزىندە شينجياڭداعى كوپتەگەن كورىنىس وڭىرلەرى، كورىنىس تۇيىندەرى ەرەكشە قيمىل وتكىزىپ، ساياحاتشىلارعا ۇلتتىق سالت - سانانى تەرەڭ سەزىندىردى. تيانشان ۇلكەن اڭعارى كورىنىس وڭىرىندە ءۇرىمجى قالالىق چينجۇي تەاترى ۇيىرمەسىنىڭ (شينجياڭ چينجۇي تەاترى ۇيىرمەسى) ادەبيەت - كوركەمونەر ساڭلاقتارى كورىنىس وڭىرلەرىندە ويىن قويدى. ”شينجياڭعا تۇڭعىش رەت كەلىپ وتىرمىن، كوپتەگەن ادامنىڭ مەرەكەلىك كيىمدەرىن كيىپ ساياحاتتاعاندىعىن كوردىم، سونداي - اق تارتىمدى تەاتر ويىندارىن تاماشالادىم، وتە دۋماندى ەكەن“! سىچۋاندىق ساياحاتشى دۇڭ ليدى بىلاي دەدى: وتباسىمداعىلارمەن بىرگە شينجياڭعا كەلىپ جارتى اي ساياحاتتادىم، ءوز كولىگىممەن سولتۇستىك شينجياڭ ۇلكەن اينالمالى جەلىسىن ارالادىم، ساپارىم باستالىسىمەن ءساتى ءتۇسىپ قۇربان ايت مەرەكەسىنە تۋرا كەلەرىمدى ويلاماپپىن.

اقسۋ قالاسى لۇڭتانحۋ باقشاسىنىڭ ۇيشە اۆتوموبيل لاگەرىندە وسى قالانىڭ حۇڭچياۋ ءمالىسى شۋاڭيۇڭ الەۋمەتتىك اۋماعىنىڭ تۇرعىندارى مەن شينجياڭنىڭ ءىشى - سىرتىنداعى ۇيشە اۆتوموبيلدەرى ساياحاتشىلارى مەرەكەنى بىرگە تويلادى. قاربىز، بالكۇلشە، پالاۋ... كوپشىلىك بىرگە وتىرىپ ءدامدى تاعامنان اۋىز ءتيىپ، ءان - بيدەن ءلاززاتتاندى. ”شينجياڭدىقتار قاتتى مەيماندوس ەكەن، وسىنشاما كوپ ءدامدى تاعامنان ءدام تاتىپ، دۋماندى ءان - بيلەردەن ءلاززات الدىم، وسى اراعا كەلگەندە توتەنشە قۋانىشتى كوڭىل كۇيدە ءجۇردىم. بۇدان كەيىن ۇنەمى كەلىپ تۇرامىن، دوستارىمدى دا شاقىرامىن“. جياڭشي ولكەسى شاڭراۋ قالاسىنان كەلگەن ساياحاتشى جاڭ حۇڭپيڭ مەن وتباسىنداعىلار لۇڭتانحۋ باقشاسى ۇيشە اۆتوموبيل لاگەرىنە بارعاندا، وسى قيمىلعا ۇلگىردى. ول اقسۋ قالالىق مادەنيەت - ساياحات مەكەمەسىنىڭ كادرلارى اكەلگەن ساياحات ۇگىت كىتاپشالارىن اقتارىپ، ءسوز جوق، اقسۋدا بىرنەشە كۇن تۇرىپ، ىشكەرىلەي ساياحاتتايتىندىعىن ايتتى.

بىرنەشە كۇننىڭ الدىندا، شينجياڭداعى ادام كوپ باراتىن كورىنىس وڭىرلەرىنە سوقپايتىن جاز ماۋسىمىندا شينجياڭ ىشىندە ساياحاتتاۋدىڭ 8 جاڭا جەلىسىن جاريالادى، كوپتەگەن ساياحاتشى مۇنى سىناپ كوردى. S101 جەلىسى بويىنداعى انجيحاي ۇلكەن اڭعارى كورىنىس وڭىرىندە قايشالىسقان جىرا - جىلعالار، ءجيى ورنالاسقان قۇزار شىڭدار، تەرەڭ شاتقالدار، الۋان ءتۇستى عاجايىپ تاستار اسەم سۋرەت قالىپتاستىرىپ، قىرۋار فوتوسۋرەت اۋەسكەرلەرىن جانە ءوز كولىگىمەن ساياحاتتاۋ اۋەسكەرلەرىن باۋرادى. ”ءبىز وتباسىمىزداعى ۇشەۋىمىز كورلادان سولتۇستىك شينجياڭعا كەلىپ وينادىق، ارنايى انجيحاي ۇلكەن اڭعارىنا بارىپ، ۇلى تابيعاتتىڭ كەرەمەتىن سەزىندىك“. كورلالىق ساياحاتشى قۇربانجان تۇرعۇن بىلاي دەدى: ەندى عانا ۇشقىشسىز اپپارات ساتىپ الىپ، اڭعاردا اۋەدەن سۋرەتكە ءتۇسىردىم، ءار جولى تۇسىرگەن ءبىر بەينە كەسكىنىمنىڭ ءوزى ءبىر كينو فيلمگە بەرگىسىز دەسەم دە بولادى.

ساۋاننىڭ ۇلۋجان كورىنىس وڭىرىندە جاسىل شوپتەر جايقالا ءوسىپ، تاۋ گۇلدەرى قۇلپىرا اشىلىپ، كوپتەگەن كوڭىل اشۋ نىساندارى ساياحاتشىلاردىڭ القاۋىنا بولەندى. گۋاڭجوۋلىق ساياحاتشى لي حاڭ - ي اتقا ءمىنىپ جايلاۋدا قۇيعىتقاننان كەيىن شاتىردا وتىرىپ ۇلۋجانعا كوز سالدى، ”بۇل مەنىڭ شينجياڭعا 3 - رەت كەلۋىم، ادامداردان وڭاشالانىپ، شينجياڭداعى شاعىن كورىنىس تۇيىندەرىن ارالادىم، ادام از، كورىنىسى كوركەم ەكەن، كوڭىلىم جادىراپ قالدى“.

دەمالىس كەزىندە شينجياڭداعى كوپتەگەن ساياحاتشى تۋىس - تۋعان، دوس - جاراندارىن شاقىرىپ، شارۋالار اۋلاسىنا كەلىپ كوركەم كورىنىستى تاماشالاپ، ءدامدى تاعامداردان اۋىز ءتيىپ، شارۋالار تۇرمىسىن سەزىنىپ، باۋ - باقشانى تاماشالاپ، اۋىل - قىستاق ساياحاتىنىڭ دۋمانىن اسىردى. 6 - ايدىڭ 29 - كۇنى شەريا اۋدانى ۇلىساي اۋىلى اقچىع قىستاعىندا ەرەكشە ۇلتتىق سالت - سانا ادەبيەت - كوركەمونەر كونسەرتى قويىلىپ، ءان - بيدەن ءلاززاتتانۋ، ءدامدى تاعامداردان ءدام تاتۋ، كادەن اۆتوكولىگىن ويناۋ، التىباقان تەبۋ سياقتى ءبىر قىدىرۋ قيمىلدار وتكىزىلىپ، ساياحاتشىلارعا جازعى شاتتىق سيلادى. موري قازاق اۆتونوميالى اۋدانى شيجىر قالاشىعى شۇيموگوۋ قىستاعىنىڭ جاسىلدىعى كوز سۇرىندىرەدى، سۋ تيىرمەننىڭ جانىندا قىستاق تۇرعىندارى وزدەرى جاساعان ءدامدى تاعامدارىن جايماعا قويىپ، كوپتەگەن ساياحاتشىنى ءدام تاتۋعا باۋرادى. قىستاق تۇرعىنى پان جۇيليان بىلاي دەدى: ”دەمالىس كەزىندە ساياحاتشىلار كوبەيدى، مەن ءوز ءۇيىمنىڭ سيىر سۇتىنەن ايران ۇيىتىپ، تاعى باۋىرساق، ايران شۇيىرتپەك، لياڭفىن، لياڭميان سياقتىلاردى ساتىپ، كۇنىنە 200 − 300 يۋان كىرىس كىرگىزەمىن“.