ٴتىلشىمىز ليۋ چۇنشيڭ حابارلايدى. 8 - ايدىڭ 10 ـ كۇنىنەن 8 - ايدىڭ 11 ـ كۇنىنە دەيىن وتكىزىلەتىن 2024 شينجياڭ نارات زىجين مۋزيكا مەرەكەسىنىڭ ٴتۇرلى دايىندىق قىزمەتتەرىنىڭ اياق الىسى قالاي بولىپ جاتىر؟ ٴتىلشى 8 ـ ايدىڭ 5 ـ كۇنى وسى جونىندە  تىلشىلىك ىستەدى.

سول كۇنى تۇستەن كەيىن ٴتىلشى نارات كورىنىس رايونى وزەن اڭعارى ساحارا حالىقارالىق بايگە الاڭىنان جۇڭگو بىرلەسپە ينتەرنەت حابارلاسۋ شەكتى سەرىكتەستىگى كۇنەس اۋداندىق بولىمشە سەرىكتەستىگىنىڭ بىرنەشە قىزمەتكەرىنىڭ ساحنا ماڭىنا وپتيكالىق كابەل ورناتۋدىڭ قاربالاستىعىندا ەكەنىن كوردى.

”اناۋ بازالىق ستانسيالارعا قاراڭىزشى، جيىنى 36 سى بار، وسىلاردى قۇرىپ بولعان سوڭ وپتيكالىق كابەلدى سىناقتان وتكىزەمىز، سونان سوڭ پايدالانۋعا بولادى“. جۇڭگو بىرلەسپە ينتەرنەت حابارلاسۋ شەكتى سەرىكتەستىگى كۇنەس اۋداندىق بولىمشە سەرىكتەستىگىنىڭ نىسان مەڭگەرۋشىسى ديڭ سۇڭلين تىلشىگە بىلاي دەدى: ”سول كەزدە 5G سيگنالى كەمىندە اينالاداعى 3 كيلومەتر اۋماقتى شارپيدى، مۋزيكا مەرەكەسىندە ۇستىنەن تاراتۋ، كورەرمەننىڭ دوۋيىندا تاراتۋى سياقتىلاردىڭ بارلىعى كەدەرگىسىز بولادى،  10 مىڭ ادامنان اسسا دا ىقپالعا ۇشىرامايدى“.

ساحنا دا سالىنۋ ۇستىندە، جۇمىس باسىنداعى 70 كە جۋىق قۇرىلىس جۇرگىزۋشىلەر ۇستەمە جۇمىس ىستەپ، سورەنى، شىراق جابدىقتارىن ورناتۋمەن قاربالاس، سوڭىنان L E D ەكرانىن، دىبىس ۇلعايتقىشتاردى ورناتىپ، 8 - ايدىڭ 8 - كۇنى بارلىق جۇمىستى بىتىرەدى. ”بۇل جولى ٴبىز 1144 شارشى مەترلىك ساحنا جاسادىق، التى LED ەكرانىنىڭ كولەمى جالپى 500 شارشى مەتردەن اسادى“ دەدى نانجيڭ شىيە ينجەنەريا شەكتى سەرىكتەستىگى نىسانىنىڭ مەڭگەرۋشىسى لياڭ جاۋ تىلشىگە.

2024 شينجياڭ نارات زىجين مۋزيكا مەرەكەسىنىڭ ساحناسى وزەن اڭعارى ساحارا حالىقارالىق ات بايگە الاڭىنا سالىنعان، وڭتۇستىگى قاراعايقورا، سولتۇستىگى كۇنەس وزەنىنە تۇتاسادى، شىعىسى ورمان باقشاسى، باتىسى ديگلاس كورىنىس ٴتۇيىنى، اشىق اسپان، اقشا بۇلت، ورمان، ساحارا، سىلدىراي اققان وزەن مەن بۇلاقتار، اقبوز ۇيلەرمەن كومكەرىلگەن كوركەم كورىنىس، مۋزيكا مەرەكەسى مىنە، وسى ارادا وتكىزىلەدى.

”ٴبىز ەل ىشىندە كوپتەگەن كولەمدى مۋزيكا مەرەكەسىنىڭ ساحناسىن جاسادىق، وسى جولى تۇڭعىش رەت ساحارادا وتكىزىلمەك. بۇل ارادا مۋزيكا مەرەكەسىنىڭ وتكىزىلۋى كورەرمەننىڭ كوز ايىمى بولماق“  دەدى لياڭ جاۋ.

نارات كورىنىس ٴوڭىرىن باسقارۋ كوميتەتى قۇرىلىس ٴبولىمىنىڭ باستىعى حۋاڭ پيڭنىڭ تانىستىرۋىنشا، قازىر سۋ، ەلەكتر سياقتى نەگىزدىك قۇرىلعى قۇرىلىسى اياقتالىپ، سىناق كەزەڭىنە وتكەن؛ جاڭادان 180 بولمەلى الەۋمەتتىك تازالىق دارەتحاناسى، تاعى 24 بولمەلى 3 جىلجىمالى دارەتحانا سالىنعان، بۇل سول جەردەگى ادامداردىڭ دارەتحاناعا بارۋ قاجەتىنەن شىعا الادى ەكەن. سونىمەن بىرگە، جۇمىس باسىنا 20 مىڭ شارشى مەترلىك جاساندى كوگال جانە 15 مىڭ شارشى مەترلىك ماتا توسەلىپ، ەكولوگيانى قالپىنا كەلتىرۋ قىزمەتى جۇرگىزىلىپ، كوپتەگەن قىزمەت تارتىپپەن ىلگەرىلەتىلۋدە ٴارى بىرتىندەپ ورىندالۋدا ەكەن.