سۋرەتتە: كەستەشىلىك ونەر باسەكەسى.          قۇلجا قالالىق پارتكوم ۇگىت ٴبولىمى

4 - ايدىڭ 2 - كۇنى قۇلجا اۋداندىق ايەلدەر بىرلەستىگى مەن قۇلجا اۋداندىق قولونەر بۇيىمدارى قوعامى بىرلەسىپ قازاق كەستەشىلىك ونەرى باسەكەسىن وتكىزدى. قۇلجا اۋدانىنىڭ اۋىل - قىستاقتارىنان، الەۋمەتتىك اۋماقتارىنان كەلگەن كەستەشى ايەلدەر ٴبىر ساحنادا كەلبەتىن ايگىلەپ، قازاقتىڭ ٴداستۇرلى كەستەشىلىك ونەرىن جالعاستىردى.

قازاق كەستەشىلىك ونەرى ۇزاق تاريحقا يە، 2008 - جىلى قازاقتىڭ سىرماعى مەن كەستەسى 2 - توپتاعى مەملەكەت دارەجەلى بەيزاتتىق مادەنيەت مۇرالار تىزىمىنە ەنگىزىلدى.

سول كۇنى قۇلجا اۋدانى تۇرپانجۇزى اۋىلىنداعى شياڭحى ورىك باعىندا ٴساندى كيىم كيگەن 15 كەستەشى ايەل الدىمەن قولمەن سۋرەت نوبايلارىن ەشقانداي كومەكشى قۇرالىنسىز رەتتى سىزىپ الادى. وسىدان كەيىن ينەمەن ورنەكتەۋ ادىستەرى ارقىلى كەستە بۇيىمدارىن دايىنداپ شىعاردى.

بۇل رەتكى جارىستا نەگىزىنەن قازاقتىڭ ٴداستۇرلى كەستەشىلىگى نەگىز ەتىلىپ، ٴتۇستى ٴجىپ ارقىلى كەزدەمەگە ٴتۇسى اشىق، ورنەگى كوركەم قولونەر بۇيىمدارىن كەستەلەدى. ورنەك ۇلگىلەرىن تىگەتىن جىپتەردى ايەلدەردىڭ وزدەرى يىرگەن جانە بوياعان، ورنەگى باي، بوياۋى اسا كوركەم.

كەستەشىلىك ونەر باسەكەسى 2 ساعاتقا جالعاستى، ەڭ سوڭىندا ٴبىر ادام 1 - دارەجەلى، 2 ادام 2 - دارەجەلى، 3 ادام 3 - دارەجەلى، 9 ادام ۇزدىك تۋىندى سيلىعىن ەنشىلەدى.

”بۇگىن مەن 3 - دارەجەلى سيلىق ەنشىلەپ، ايرىقشا قۋاندىم، بۇدان كەيىن كەستەشىلىك ونەرىن ۇزدىكسىز جالعاستىرامىن“ دەدى قاراعاش اۋىلى قۇجىرتى قىستاعىنىڭ تۇرعىنى انارگۇل ايداقىن قىزى.

”ٴبىز ونەر باسەكەسى ارقىلى ۇيرەنۋدى جەبەپ، كەستەشىلىك قوسىنىمىزدى جەتىلدىرىپ، زورايتىپ، اناعۇرلىم كوپ سارا تۋىندى جاراتۋدى جەبەيمىز. سەلبەستىك كووپەراتيۆىن قۇرۋ ارقىلى كەستەشىلىك ونەرىن كادەگە جاراتىپ، قۇلجا اۋدانىنىڭ كەستەشىلىك كاسىبىن اناعۇرلىم دامىتامىز جانە زورايتامىز“ دەدى قۇلجا اۋداندىق ايەلدەر بىرلەستىگى پارتيا باسشىلىق گرۋپپاسىنىڭ شۋجيى، ٴتورايىمى ميھىراي قيۇم.