تىلشىلەرىمىز ۋاڭ جۋان، چىن تيانجين، اكبار قۇربان

 5 - ايدىڭ  16 - كۇنى 7 - رەتكى مەملەكەتتىك ٴوزىن الۋەتتەندىرۋ ۇلگىلەرى مەن مۇگەدەكتەرگە كومەكتەسۋ وزاتتارىن ماداقتاۋ - سيلاۋ جينالىسىندا قۇلجا اۋدانى قۇديارٴجۇزى قالاشىعى ىلە بايمۋتا ساۋدا شەكتى سەرىكتەستىگىنىڭ جاۋاپتىسى شاۋكەت تىلەۋالدى قايسار جىگەرى مەن قالتقىسىز ۇلەس قوسۋ رۋحىنا سۇيەنىپ، ”ٴوزىن الۋەتتەندىرۋدىڭ مەملەكەتتىك ۇلگىسى“ اتاعىن الدى. ول ٴوزى مۇگەدەك بولسا دا بەرىك بەكىمى مەن ٴىس جۇزىندىك ارەكەتى ارقىلى ”باسقالار جاعىنان كورسەتىلۋدەن“ ”ٴوزىن - ٴوزى كورسەتۋگە“ دەيىنگى وزگەرىستى جاندى ٴتۇسىندىرىپ، مۇگەدەكتەر مەن قيىنشىلىعى بارلارعا كومەكتەسۋ كۇشتەرىن جەبەيتىن تىرەككە اينالدى.

5 ـ ايدىڭ 12 ـ كۇنى ٴتىلشى قۇلجا اۋدانى قۇديارٴجۇزى قالاشىعى قاعىلىق قىستاعىنا بارعاندا، قاشقار ايماعىنداعى بازار تەكسەرىپ ـ زەرتتەۋ جۇمىسىن ەندى عانا تامامداپ، قۇلجا اۋدانىنا قايتىپ كەلگەن شاۋكەتتىڭ دامىلسىز قىزمەتكە كىرىسىپ كەتكەندىگىن كوردى ــ قىستاق فۋتبول كومانداسى ٴۇشىن جارىس كيىمىن تاڭداپ، تاعى ٴبىر رەت كيىمدەردى رەتتەدى ٴارى جاقسى حاباردى اكە ـ شەشەسىنە جەتكىزدى... ”وسى رەت بەيجيڭگە بارىپ ماداقتالىپ ـ سيلانعاندا قاتتى اسەرلەندىم، قاسىمداعى ادامدار دا مەن ٴۇشىن قۋاندى“ دەدى شاۋكەت.

تاعدىرعا، استە، تىزە بۇكپەدى

شاۋكەت قازىر ىلە بايمۋتا ساۋدا شەكتى سەرىكتەستىگىنىڭ باس جوراسى. ول بالالاردا بولاتىن سالدانۋ اۋرۋىنا شالدىعىپ مۇگەدەك بولىپ قالعان، قازىر ول تەك تاياققا سۇيەنىپ جۇرەدى. زايىرلى كوزقاراس بويىنشا، ول الدە قاشان ”ٴالسىز جان“، ”كومەككە مۇقتاج ادام “ دەپ تانىلعانىمەن. الايدا، شاۋكەت ەجەلدەن تاعدىرعا باس يمەگەن - دى، ول مۇگەدەك  اتالۋدان باس تارتىپ، وزىنە ٴتان جولمەن جۇرۋگە بەل بايلاعان. ورتا تەحنيكۋم بىتىرگەننەن كەيىن ۇكىمەت پەن تۋىس - تۋعان، دوس - جاراندارىنىڭ كومەگىندە شاۋكەت ٴبىر شاعىن ماگازين اشىپ، جاپاعا شىداپ ەڭبەكتەنۋ رۋحىمەن، زەرتتەۋگە شەبەر اقىل - پاراساتىمەن، سەنىمدى تيجارات يدەياسىمەن شاعىن ماگازيندى بىرتە - بىرتە ازىق - تۇلىك تولايىم ساتۋ ورنىنا اينالدىرادى. 2019 -  جىلى شاۋكەت ىلە بايمۋتا ساۋدا شەكتى سەرىكتەستىگىن قۇرىپ، نەگىزىنەن ”قۇمارىم“ ماركاسىنداعى دامدەندىرگىشتەر جانە ٴدامدى شاي ساۋداسىمەن شۇعىلداندى. سەرىكتەستىك قۇرىلعان العاشقى مەزگىلدە كوپتەگەن قيىنشىلىقتارعا ٴدوپ كەلدى، مۇنىڭ ىشىندە ساتۋ قيىن بولۋ ماسەلەسى ٴتىپتى دە كورنەكتى بولاتىن. ”ول كەزدە ونىمدەرىمىز نەگىزىنەن ساتىلماي جاتاتىن، توڭىرەكتەگى اۋدان، قالالاردا بولسىن، الدە باسقا جەرلەردە بولسىن وسىنداي جاعداي ەدى“ دەدى سەرىكتەستىكتىڭ باس ديرەكتورى لي شينچۇن ەسكە الىپ. ساتۋ جولىن اشۋ ٴۇشىن، شاۋكەت ٴوزىن مۇگەدەكپىن دەپ ساناماي جۇبايىمەن بىرگە الارمانداردىڭ الدىنا بارىپ، جاقىن ماڭداعى قۇلجا قالاسىنان 1000 كيلومەتر شالعايداعى قاشقارعا بارىپ، ساۋداگەرلەرگە ونىمدەرىن سابىرلىلىقپەن تانىستىردى. ول شىن نيەتىمەن الارمانداردى اسەرلەندىردى ٴارى كاسىپورىندى قيىنشىلىق قىسپاعىنان قۇتىلدىرۋعا تاباندى بولدى.

كونە سەرىگى لي شينچۇننىڭ نازارىندا شاۋكەت ”قۇلامايتىن قۇرىش ادام“ سياقتى ەدى.  ٴبىر جىل ىشىندە شاۋكەت شينجياڭنىڭ ٴارقايسى ساتۋ تۇيىندەرىنە بارىپ 3 - 4 رەت احۋال ۇعىسىپ، ساتۋشىلار اڭىس ەتكەن ۇسىنىس - پىكىرلەردى تىڭداپ، ونىمدەردى رەتتەپ اشادى. قازىر سەرىكتەستىك زەرتتەپ اشقان 88 ٴتۇرلى ٴونىم جەرگىلىكتى ورىننان 72 بۇقارانى ورنىقتى جۇمىستانۋعا باۋرادى، مۇنىڭ ىشىندە 6 مۇگەدەك بار. ونىمدەرى بازاردىڭ قارسى الۋىنا بولەنىپ، قازاقستان سياقتى ەلدەرگە ساتىلىپ، جىلدىق ٴونىم قۇنى 24 ميلليون يۋانعا جەتىپ، جىلىنا ٴبىر ميلليون 100 مىڭ يۋان پايدا تاۋىپ، جەرگىلىكتى ورىنداعى ازىق - تۇلىك سالاسىنىڭ كوش باسشىسىنا اينالدى.

شاۋكەت ەجەلدەن ەكپىندەي ىلگەرىلەگەن قادامىن توقتاتقان ەمەس، قايتا نازارىن ٴتىپتى دە كەڭ سالالارعا اۋدارعان. سەرىكتەستىك قۇلجا اۋدانى قۇديارجۇزى قالاشىعى حوتانتام قىستاعىنان 11 ميلليون 300 مىڭ يۋان قارجى قوسىپ، 4000 شارشى مەترلىك جاڭا زاۆود ٴۇيى مەن قىزمەت عيماراتىن سالدى، وندىرىسكە قوسىلعاننان كەيىن 30 ميلليون يۋان ٴونىم قۇنىن جۇزەگە اسىرىپ، جەرگىلىكتىنىڭ اۋىل شارۋاشىلىق ونىمدەرىن ەگۋگە، ساتۋعا ونان ارى دەم بەردى. سول كەزدە ول 80 ادامنىڭ ورنىقتى جۇمىستانۋىنا تۇرتكى بولعان - دى، مۇنىڭ ىشىندە 20 ادام مۇگەدەك.

العىس سەزىمىمەن قوعامعا قارىمجى قايتاردى

 دەربەس شارۋاشىلىق قۇرۋ، الەۋمەتتىك يگىلىك ىستەرىنە ات سالىسۋ، مۇگەدەكتەرگە كومەكتەسۋ ارەكەتى... ٴوزى مۇگەدەك بولعاندىقتان، شاۋكەت بۇل قىزمەتىنىڭ مۇگەدەكتەر جونىنەن ماڭىزدىلىعىن ابدەن بىلەتىن - دى. كاسىپتە تابىسقا جەتكەننەن كەيىن شاۋكەت ٴالى دە قيىنشىلىق قىسپاعىندا جۇرگەن مۇگەدەك اعا - باۋىر، اپەكە - سىڭلىلەرىن ەستەن شىعارماي، وسى مەيىر - شاپاعاتتى جەتكىزىپ، مۇگەدەكتەر مەن قيىنشىلىعى بارلارعا كومەكتەسەتىن كۇشتەردى ”تىرەكتى كۇشكە“ اينالدىرۋدى ۇيعاردى. سەرىكتەستىكتىڭ قىزمەتكەرى گوھاربانۋم ٴامىرا 4 - دارەجەلى مۇگەدەك ەدى، وسى ارادا 4 جىل قىزمەت ىستەگەن، ايلىق كىرىسى 2500 يۋان اينالاسىندا. وسى قىزمەت بارىسىندا گوھاربانۋم ٴوزىنىڭ قۇنى مەن شاتتىعىن تاپتى.

وتباسى ايەلىنەن قوراپتاۋ سەحىنىڭ قىزمەتكەرى بولعان يرادام ماحمۇت بىلاي دەدى: ”تۇراقتى كىرىس كوپشىلىكتىڭ تۇرمىسىن جاقسارتتى، قازىر  ونەر يگەرگەندىكتەن، كوزايام دا كەڭىدى. شاۋكەتتىڭ بويىنان ٴبىز ونىڭ قۇلشىنعىش، قايسار، اق كوڭىل، ەرجۇرەك قاسيەتىن تەرەڭ سەزىندىك، بۇلار ٴبىزدىڭ ۇيرەنۋىمىزگە تاتيدى“. شاۋكەتتىڭ سەرىكتەستىگىندە يرادام سياقتى قىزمەتكەرلەر وتە كوپ. قازىر 70 تەن استام قىستاق تۇرعىنى وسى ارادا جۇمىستاندى، مۇنىڭ كوبى مۇگەدەك، ەڭ تومەنگى تۇرمىسى قامتاماسىزداندىرىلاتىن وتباسى سياقتى قيىنشىلىعى بار قاۋىم، 10 نەشە جۇمىسشى اۆتوكولىك ساتىپ الىپ، تۇرمىستارىندا جەر مەن كوكتەي وراسان زور وزگەرىستەر تۋىلدى.

مۇگەدەكتەردىڭ جۇمىستانۋىنا دەم بەرۋدەن سىرت، شاۋكەت دەنە تاربيە ىستەرىنە، اسىرەسە، فۋتبول سپورتىنىڭ دامۋىنا بەلسەنە ات سالىستى. كىشكەنتايىنان فۋتبولدى قىزۋ سۇيەتىن ول مۇگەدەك بولعاندىقتان جاسىل الاڭدا جۇيتكىپ جۇرە المايتىن، ٴبىراق ول باسقا ٴبىر ٴتۇرلى تاسىلمەن ارمانىن ورىندادى.  2019 - جىلى شاۋكەت 100 مىڭ يۋان قارجى شىعارىپ، فۋتبول ىستەرىنە قارجىلاي كومەكتەسىپ، جەرگىلىكتى ورىنداعى فۋتبولدى قىزۋ سۇيەتىن بۇقاراعا فوتبول كيىمىن، فوتبول شاقايىن جانە ٴتۇرلى جابدىق ساتىپ الىپ بەردى. وسىدان كەيىن ول قۇلجا اۋدانىنىڭ حۇمارىم ەلشىسى فۋتبول كلۋبىنىڭ جاتتىقتىرۋشىسى ٴدىلشات عۇپۇرجانمەن سەلبەسىپ، ونىڭ فۋتبول كلۋبىنىڭ دامۋىن قولداپ، كلۋبتىڭ الاڭى مەن شارت - جاعدايىن جاقسارتتى، جاتتىقتىرۋشىلار توبى دا بىرتىندەپ ۇلعايدى. سوڭعى جىلدارى كلۋب ٴتۇرلى جارىستاردا ەرەكشە ناتيجەگە قول جەتكىزدى، كوپتەگەن كوماندا مۇشەلەرى فۋتبول مەكتەبى، ٴتۇرلى كلۋبتار جاعىنان تاڭداپ الىندى.

تىلشىلىك بارىسىندا شاۋكەت وتكەن - كەتكەندى ەسكە الا قاتتى تەبىرەنىپ: ”كىشكەنە كەزىمدە شەشەم مەنى ارقالاپ الىپ مەكتەپكە باراتىن، مۇنى كورگەن كوپتەگەن ادام ماعان كومەكتەسەتىن، جازدا ۆەلوسيپەدپەن، قىستا شانامەن مەنى مەكتەپكە سۇيرەيتىن. مەن كىشكەنتايىمنان قازىرگە دەيىن، اسىرەسە، شارۋاشىلىق قۇرۋ بارىسىندا كوپ ادامنىڭ كومەگىنە يە بولدىم، قازىر قابىلەتىم جەتىلدى، باسقالارعا شىن نيەتىممەن كومەكتەسىپ، قوعامعا قارىمجى قايتارىپ، مەيىر ـ شاپاعات كۇشىن جەتكىزۋىم كەرەك“. 

سۋرەتتە: شاۋكەت (ورتادا) قامبادا ٴونىمدى ٴبولىپ تيەۋ جاعدايىن تەكسەرۋدە.   ۋاڭ جۋان فوتوسى