يىڭايات جولىندا قاتىناس قايتا قالپىنا كەلتىرىلدى

قۇلجا قالاسىندا توعىز جول جاڭادان وزگەرتىپ جاسالدى

تىلشىلەرىمىز لي يافىڭ، اراي حابارلايدى. 5 - ايدىڭ 28 - كۇنى قۇلجا قالالىق تۇرعىن ٴۇي جانە قالا - اۋىل قۇرىلىسى مەكەمەسىنەن ۇعىسۋىمىزشا، قۇلجا قالاسىنىڭ يىڭايات جــولىندا 5 - ايدىڭ 30 - كۇنى قاتىناس قالپىنا كەلتىرىلگەن. يىڭايات جولى قۇلجا قالاسىنىڭ كونە قالا رايونىنا ورنالاسقان، قۇلجا قالاسىنىڭ قالاعا كىرەتىن قوسالقى جولى. قالانىڭ دامۋىنا ىلەسە 14 مەتر كەڭدىكتەگى موتورلى كولىك جولى قاتىناۋ قاجەتىن قاناعاتتاندىرا المادى، جول جانە قوسالقى قۇرىلعىلاردىڭ توزۋى دا توڭىرەكتەگى بۇقارانىڭ ٴوندىرىسى مەن تۇرمىسىنا قولايسىزدىق تۋدىرعان - دى. 3 - ايدىڭ 25 - كۇنى قۇلجا قالاسى يىڭايات جولىن كەڭەيتىپ سالۋ نىسانىن باستاپ، باتىستا جەڭىس جولىنىڭ تۇيىلىسىنەن شىعىستاعى نيڭيۋان جولىنىڭ تۇيىلىسىنە دەيىنگى جالپى ۇزىندىعى 2693 مەتر جولدى وزگەرتىپ جاساعان. جول ينجەنەرياسى، زەردەلى قاتىناس قۇرىلعىلارى، جاۋىن سۋى مەن لاس سۋدى ايىرىم ىعىستىرۋ جۇيەسى، ەنەرگيا ۇنەمدەيتىن جول شامى، كورىنىستىك جاسىلداندىرۋ جانە جالپىلىق قۇبىر جەلىسىن جەر استىنا ورنالاستىرۋ سياقتى جۇمىستار اتقارىلعان.

 كەڭەيتىپ سالىنعاننان كەيىن  حوۋتان جولىنان وڭتۇستىك جەڭىس جولىنا دەيىنگى جول بولەگىنىڭ كەڭدىگى 30 مەترگە كەڭەيتىلىپ، قوس باعىتتا 8 اۆتوموبيل قاتىناي الاتىن بولدى. حوۋتان جولىنان نيڭيۋان جولىنا دەيىنگى جولدى قوس باعىتتا 4 اۆتوكولىك جولىنا وزگەرتىپ، قوسىمشا جول سالىپ، تەز جۇرەتىن جول مەن باياۋ جۇرەتىن جول بويىنشا ٴبولىپ ورنالاستىرىلىپ، كونە قالا رايونىنداعى قاتىناستىڭ كەپتەلىس ماسەلەسىن ونان ارى جاقسارتىپ، قالانىڭ شىعىس، باتىس ٴدالىزى فۋنكتسياسىن كۇشەيتتى. سونىمەن بىرگە، ٴبىر تۇلعالانعان جوبا ارقىلى قاتىناس، ەكولوگيا جانە قالا ىستەرى قىزمەت وتەۋىنىڭ  دارەجەسى سايكەستى جوعارىلاتىلعان.

”اۆتوكولىك قاتىناعاننان كەيىن جۇمىس باسىندا جاسىلداندىرۋ بەلدەۋىن جاڭالاۋ، موتورسىز كولىك جولى، جاياۋلار جولى قۇرىلىسى جانە قاتىناس بەلگىلەرىن ورناتۋ، جول جارىقتاندىرۋ قۇرىلعىلارىن ورناتۋ سياقتى قوسىمشا قۇرىلعىلاردى ۇزدىكسىز ىلگەرىلەتىپ، يىڭايات جولىن يقۋاتى كەمەلدى، ورتاسى جانعا جايلى قالا جولى ەتىپ قۇرىپ شىعۋعا كۇش سالىنادى“ دەدى قۇلجا قالالىق قالا قۇرىلىسى شەكتى جاۋاپكەرشىلىك سەرىكتەستىگى 2 ـ بولىمشە سەرىكتەستىگىنىڭ قۇرىلىس جۇرگىزۋشىسى جاي جۇڭجى.

 يىڭايات جولى قۇلجا قالاسىنىڭ قالا جولدارىن جاڭادان وزگەرتىپ سالۋ ينجەنەرياسىنىڭ ىقشام كورىنىسى. قۇلجا قالالىق تۇرعىن ٴۇي جانە قالا - اۋىل قۇرىلىسى مەكەمەسى نىسان كەڭسەسىنىڭ قىزمەتكەرى يۇي حايجيە بىلاي دەپ تانىستىردى: جاڭادان وزگەرتىپ سالىنعان 31 قالا اكىمشىلىك جولىنىڭ جالپى ۇزىندىعى 41.14 كيلومەتر، قۇرىلىس كولەمى ٴبىر ميلليون 884 مىڭ 300 شارشى مەتر. قازىرگە دەيىن حوۋتان جولى، مۋبەي 1 - جولى سياقتى 9 جول سالىنىپ بولدى، گۇيحۋا 1 - جولى، شىنجىن سولتۇستىك جولى سياقتى 11 جولدى جاڭادان وزگەرتىپ سالۋ ينجەنەرياسى جۇرگىزىلۋدە، بيىل تاعى جەڭىس جولى، شينحۋا باتىس جولى، گۋاڭچاڭ كوشەسى، ستالين جولى، تيانشان جولى 1 ـ كوشەسى سياقتى 9 جولدى جاڭادان وزگەرتىپ سالۋ ينجەنەرياسى ورىندالادى.

بۇل جولدار وزگەرتىلىپ بولعاننان كەيىن تۇرعىنداردىڭ ٴجۇرىس ـ تۇرىس ۋاقىتى بارىنشا قىسقارىپ، ٴجۇرىس ـ تۇرىس ونىمدىلىگى جوعارىلاپ، قاتىناس كەپتەلىسىنەن تۋىلاتىن قولايسىزدىقتار ازايىپ، تۇرعىنداردىڭ تۇرمىس ساپاسى جوعارىلاتىلىپ عانا قالماي، قالانىڭ كوركى دە ٴونىمدى جاقسارىپ، جوعارى ساپالى دامۋدىڭ ”جىلدام ارناسى“ بار كۇشپەن قالىپتاستىرىلادى.