تىلشىلەرىمىز جاڭ لياڭ، شاۋكەت حابارلايدى. تاياۋدا ٴتىلشىنىڭ 2025 ـ جىلعى جالپى حالىقتىق دەنە شىنىقتىرۋ كۇنى، دەنە تاربيە ۇگىت اپتالىعى قيمىلى جونىندەگى اقپار جاريالاۋ ماجىلىسىنەن ۇعىسۋىنشا، بيىل ىلە وبلىسى 54 ميلليون 254 مىڭ يۋان قارجى قوسىپ، جالپى حالىقتىق دەنە شىنىقتىرۋ الاڭى قۇرىلىسىن ىلگەرىلەتكەن.
بيىل جىل باسىنان بەرى قۇلجا اۋدانىنىڭ الەۋمەتتىك فۋتبول الاڭى قۇرىلىسى نىسانى، شاپشال سىبە اۆتونوميالى اۋدانىنىڭ ساداق اتۋ دەنە تاربيە مەكتەبىن جوندەۋ، جاڭالاۋ نىسانى، كۇنەس اۋدانىنىڭ جالپى حالىقتىق دەنە شىنىقتىرۋ ورتالىعىنىڭ دارەجەسىن جوعارىلاتۋ، جاڭالاۋ جانە جالپى حالىقتىق دەنە شىنىقتىرۋ الاڭى قۇرىلىسى سياقتى نىساندار جەدەل ىلگەرىلەتىلىپ، جالپى 3 ميلليون 990 مىڭ يۋان قوسىمشا قاراجاتقا قول جەتكىزىپ، ىلە وبلىسىنا توتە قاراستى ورىندارداعى 12 الەۋمەتتىك دەنە تاربيە سارايىنىڭ تومەن اقىمەن نەمەسە تەگىن، ٴتارتىپتى اشىلۋىنا كەپىلدىك ەتىپ، الاڭ ـ ساراي قۇرىلعىلارىنىڭ پايدالانىلۋ مولشەرىن ٴونىمدى جوعارىلاتتى.
2025 - جىلى ىلەدە جالپى حالىقتىق دەنە شىنىقتىرۋ جارىسى ارت - ارتىنان وتكىزىلدى، مۇندا 2025 - جىلعى ”قار - مۇز جىبەك جولى ساۋىتى“ اتىنداعى نارات حالىقارالىق تاۋ شاڭعى ۇسىنىس جارىسى، 2025 - جىلعى مەملەكەتتىك جىگىتتەر باسكەتبول حالىقارالىق باسەكە جارىسى (قۇلجا بەكەتى)، 2015 - جىلعى اۆتونوميالى رايوننىڭ الاڭ ٴبيى جارىسى سياقتى جارىستار ٴساتتى وتكىزىلدى، تەك الدىڭعى جارتى جىلدىڭ وزىندە بۇقارالىق سپورت جارىسى 406 رەت وتكىزىلىپ، قاتىناسقان ادام سانى 160 مىڭ ادام - رەتكە جەتتى. جارىس قيمىلىنىڭ ىقپالىمەن ٴار ۇلت بۇقاراسىنىڭ دەنە شىنىقتىرۋ ىنتاسى تاسقىندادى.
ىلە وبلىستىق دەنە تاربيە تاراۋلارى دەنە تاربيە تۇرىندەگى قوعامدىق ۇيىمداردى سۇيەمەلدەۋ، تاربيەلەۋ جانە ولارعا قىزمەت وتەۋ مەن باسقارۋدى كۇشەيتۋ ارقىلى قوعامداعى دەنە تاربيە جەتەكشىلەرىنىڭ جالپى حالىقتىق دەنە شىنىقتىرۋدىڭ ۇگىتشىسى، عىلمي دەنە شىنىقتىرۋدىڭ جەتەكشىسى، الەۋمەتتىك دەنە اقاۋسىزدىعى قيمىلىنىڭ ۇيىمداستىرۋشىسى، دەنەتاربيە الاڭى قۇرىلعىلارىنىڭ قورعاۋشىسى جانە دەنە شىنىقتىرۋ تۇرمىس ٴتاسىلىنىڭ باستاۋشىسى بولۋداي بەلسەندى رولىن تولىق ساۋلەلەندىرىپ، قوعامدىق دەنە تاربيەگە جەتەكشىلىك ەتۋشىلەردى تاربيەلەۋ قىزمەتىن كۇش سالا ورىستەتىپ، ٴار ۇلت بۇقاراسىنىڭ اناعۇرلىم عىلمي، ساپالى، جان ـ جاقتى، قولايلى دەنە شىنىقتىرۋىنا جەتەكشىلىك ەتتى جانە وعان قىزمەت وتەدى. ساناققا قاراعاندا، قازىر ىلە وبلىسىنا توتە قاراستى ورىنداردا ۇنەمى دەنە شىنىقتىرۋعا قاتىناساتىنداردىڭ سالىستىرماسى %35 كە جەتكەن.
بيىل وبلىس بويىنشا وتكىزىلگەن 26 مايدان دەنە تاربيە جارىسى قيمىلى اۆتونوميالى رايوننىڭ حالىق تۇرمىسىنا قاتىستى ناقتى ىستەر قاتارىنا ەنگىزىلدى، مۇنىڭ ىشىندە حالىقارالىق جانە مەملەكەت دارەجەلى جارىس 2 مايدان، اۆتونوميالى رايون دارەجەلى جارىس 5 مايدان، ايماق، وبلىس دارەجەلى جارىس قيمىلى 19 مايدان بولدى. قازىر 20 مايدان ورىندالىپ بولىپ، ورىندالۋ مولشەرى %76 كە جەتتى.