تىلشىلەرىمىز حۋاڭ يان، ياڭ جيڭ ـ ي حابارلايدى. 62 - رەتكى لەي فىڭنان ۇيرەنۋ، ەسكە ٴتۇسىرۋ كۇنى قارساڭىندا ىلە وبلىستىق حالىق ىستەرى مەكەمەسى ۇيىمداستىرىپ، ىلە قايىر - ساحابات باس قوعامى، ىلە مەينياندا دەنساۋلىق تەكسەرۋ ورتالىعى ۇستىنە الىپ وتكىزگەن ”سالاماتتىقتى قورعاپ، ىلەنى سۇيەمىن“ اتىنداعى الەۋمەتتىك يگىلىك دەنساۋلىق تەكسەرۋ قيمىلى 3 - ايدىڭ 3 - كۇنى ىلە مەينياندا دەنساۋلىق تەكسەرۋ ورتالىعىندا رەسمي باستالدى.

ۇعىسۋعا قاراعاندا، وسى رەتكى قيمىل 3 كۇنگە جالعاسىپ، وتباسىندا قيىنشىلىعى بارلار، جەتىم - جەسىرلەر مەن ”پاناسىز“ قارتتاردان  80 ادامنىڭ دەنساۋلىعىن 800 يۋاندىق قۇنعا يە تەگىن تەكسەرۋمەن قامداپ، ناقتى ارەكەت ارقىلى لەي فىڭ رۋحىن امالياتتا ايگىلەپ، قوعامنىڭ مەيىرىن جەتكىزدى.

قيمىلدىڭ العاشقى كۇنى تاڭەرتەڭ ىلە مەينياندا دەنساۋلىق تەكسەرۋ ورتالىعىنىڭ زالى مەيىرىمگە تولدى. ىلە وبلىستىق قوعامدىق يگىلىك ورنىنىڭ شوعىرلى كۇتىمدەۋ ورنىنان كەلگەن ەرەكشە قيىنشىلىعى بار قارتتار مەن قۇلجا قالاسىنىڭ ٴارقايسى الەۋمەتتىك اۋماقتارىنداعى ”پاناسىز“ قارتتار ەرىكتىلەردىڭ سۇيەمەلدەۋىندە تارتىپپەن تىزىمدەلدى، ەمدەۋ قىزمەتكەرلەرى جالپى بارىس بويىنشا ولاردىڭ دەنساۋلىعىن تەكسەردى. وسى رەتكى دەنساۋلىق تەكسەرتۋدە قان رايى، جۇرەك ەلەكترو كارديوگرامماسى، قۇرساق ٴبولىمى مەن مويىن ارتەرياسىن رەڭدى ۋلترا دىبىس تولقىنى ارقىلى تەكسەرۋ، قان الىپ تەكسەرۋ سياقتى تەكسەرۋ تۇرلەرى قامتىلدى، سونداي ـ اق قارتتاردا بولاتىن قانتتى نەسەپ اۋرۋى، جۇرەك ـ مي قان تامىر اۋرۋلارىنا ارناۋلى تەكسەرۋ جۇرگىزىلدى.

دەنساۋلىق تەكسەرۋ اياقتاعاننان كەيىن ماماندار ناق مايداندا ”سالاماتتىق جونىندە ٴبىر - بىرلەپ  اقىل ـ كەڭەس بەرۋ“ قىزمەتىن ورىستەتىپ، تەكسەرۋ ساندى مالىمەتتەرىنە نەگىزدەلىپ، قارتتارعا ارناۋلى تاماقتانۋ، ۇيلەسىمدى ارەكەت جاساۋ جوباسىن جاسادى. سوڭىنان تەلەفون ارقىلى تەكسەرىلۋ مالىمەتىنە جالعاستى تۇسىنىك جاساۋ، دەنساۋلىق جونىندە اقىل - كەڭەس بەرۋ ارناۋلى لەنياسىن اشۋ سياقتى تاسىلدەر ارقىلى دەنساۋلىق جونىندە ۇزاق مەرزىمدىك قىزمەت وتەيتىن بولدى.

”وسى رەتكى تەگىن دەنساۋلىق تەكسەرۋ قيمىلى قارتتاردىڭ دەنساۋلىعىن كۇتىمدەۋ جاعىنداعى قورعانىس شەبىن بەكەمدەۋمەن بىرگە، ولارعا قوعامنىڭ قامقورلىعىن سەزىندىرىپ، قيىنشىلىعى بار قاۋىمعا قامقورلىق جاساپ، قوعامنىڭ وڭ ەنەرگياسىن جەتكىزۋدى ماقسات ەتتى. ٴبىز لەي فىڭ رۋحىن كۇندەلىكتى قىزمەتپەن توعىستىرىپ، ولاردىڭ سالاماتتىعىنا ۇزدىكسىز نازار اۋدارىپ، اناعۇرلىم كوپ الەۋمەتتىك يگىلىك نىسانىن ورىستەتىپ، قوعامداعى مەيىر باعىشتاۋشى كۇشتەردى ۇيىستىرىپ، لەي فىڭ رۋحىنىڭ جاڭا داۋىردە جاڭا شۇعىلا شاشۋىنا مۇمكىندىك جاسايمىز“ دەدى ىلە قايىر ـ ساحابات باس قوعامىنىڭ جاۋاپتىسى حۋ يان.

سۋرەتتە: قارتتار دەنساۋلىعىن اقىسىز تەكسەرتۋدە.

حۋاڭ يان فوتوسى