انار بۇلت \ شينجياڭ گازەتىنىڭ ءتىلشىسى حي حۇڭۋي 9 - ايدىڭ 3 - كۇنى ۇرىمجىدەن حابارلايدى. اۆتونوميالى رايوندىق ساۋدا ىستەرى مەڭگەرمەسىنەن ۇعىسۋىمىزشا، الدىڭعى 7 ايدا شينجياڭنىڭ تۇتىنۋ بازارى ورنىقتى قالپىنا كەلۋ كۇيىن جالعاستىرىپ، بۇكىل رايوننىڭ قوعامدىق تۇتىنۋ بۇيىمدارىنىڭ بولشەك ساتىلۋ جالپى سوماسى 205 ميلليارد 617 ميلليون يۋان بولىپ، سايكەس مەزگىلدەگىدەن％ 5.4 ارتىپ، ارتۋ قارقىنى الدىڭعى جىلعى سول تۇستاعىدان 3.5 پايىز جوعارى بولعان. بۇكىل رايونداعى شەكتى نورمادان جوعارى ورىنداردىڭ قوعامدىق تۇتىنۋ بۇيىمدارىنىڭ بولشەك ساتىلۋ جالپى سوماسى 107 ميلليارد 646 ميلليون يۋان بولىپ، سايكەس مەزگىلدەگىدەن ％7. 5 ارتقان.

تيجارات ورىندارى تۇرعان جەر بويىنشا بولگەندە، 1 - ايدان 7 - ايعا دەيىن بۇكىل رايونداعى شەكتى نورمادان جوعارى قالا - قالاشىق ورىندارىنداعى تۇتىنۋ بۇيىمدارىنىڭ بولشەك ساتىلۋ جالپى سوماسى 101 ميلليارد 363 ميلليون يۋان بولىپ، سايكەس مەزگىلدەگىدەن ％7. 5 ارتقان؛ شەكتى نورمادان جوعارى اۋىل - قىستاق ورىندارىنداعى تۇتىنۋ بۇيىمدارىنىڭ بولشەك ساتىلۋ جالپى سوماسى 6 ميلليارد 283 ميلليون يۋان بولىپ، سايكەس مەزگىلدەگىدەن ％5. 5 ارتقان.

تۇتىنۋ ءتۇرى بويىنشا بولگەندە، 1 - ايدان 7 - ايعا دەيىن بۇكىل رايونداعى شەكتى نورمادان جوعارى ورىندارداعى تاۋارلاردىڭ بولشەك ساتىلۋ سوماسى 101 ميلليارد 708 ميلليون يۋان بولىپ، سايكەس مەزگىلدەگىدەن ％3. 5 ارتتى؛ شەكتى نورمادان جوعارى ورىنداردىڭ اس - سۋ كىرىسى 5 ميلليارد 938 ميلليون يۋان بولىپ، سايكەس مەزگىلدەگىدەن ％3. 12 ارتتى.

بيىل جىل باسىنان بەرى اۆتونوميالى رايوندىق ساۋدا ىستەرى مەڭگەرمەسى اۆتونوميالى رايوننىڭ ساۋدا سالاسىنداعى ”14 - بەسجىلدىق“ بويىنشا ىشكى سۇرانىستى كەڭەيتۋدى اتقارۋدىڭ ناقتى ەرەجەسىن جاسادى ءارى جۇيەلى ۇيىمداستىرىپ اتقاردى؛ جەر - جەردىڭ تۇتىنۋدى جەبەپ، ارتۋدى جەدەلدەتۋ ساياساتتىق شاراسىن شىعارۋىنا جەتەكشىلىك ەتكەن سانجى حۇيزۋ اۆتونوميالى وبلىسى، ىلە قازاق اۆتونوميالى وبلىسى، بايىنعولين موڭعۇل اۆتونوميالى وبلىسى سياقتى جەرلەر اۆتوكولىك سالاسىندا تۇتىنۋدى جەبەۋ، اس - سۋ بويىنشا تۇتىنۋدى جەبەۋ، ساياحات بويىنشا تۇتىنۋدى جەبەۋ، ەلەكتروندى ساۋدا بويىنشا تۇتىنۋدى جەبەۋ، شەگىن كوتەرىپ، جۇيەگە ەنگىزۋ، كەشكى ەكونوميكانى گۇلدەندىرۋ سياقتى جاقتاردا ناقتى شارا شىعاردى؛ ءۇرىمجى قالاسى، قارامايلى قالاسى سياقتى جەرلەر نازاردى ”كەشكى ساتىپ الۋ، كەشكى كوڭىل اشۋ، كەشكى اس - سۋ، كەشكى قونالقى“ سىندى 4 ۇلكەن سالاعا شوعىرلاندىرىپ، ءارقايسى ءىرى ساۋدا شەڭبەرلەرىندە، كوشە اۋماقتارىندا ءار ءتۇرلى ەرەكشە ونىمدەر كورمە اۋماعى، ۇساق تاۋارلار كەشكى بازارى سياقتىلاردى جوبالاۋدى توڭىرەكتەي وتىرىپ، ساۋدا كەشەندەرىنىڭ تيجارات ۋاقىتىن ۇزارتۋىن ىلگەرىلەتىپ، تۇرعىنداردىڭ تۇتىنۋ قولايلىلىعىن ارتتىردى.

رايونىمىز تاعى ”2023 - جىلعى تۇتىنۋدى جەبەۋ جىلى“ جەلىلەس قيمىلىن ورىستەتىپ، ”اپتا سايىن كورىنىس بولۋ، اي سايىن قيمىل وتكىزۋ، ماۋسىم سايىن نەگىزگى تاقىرىپ بولۋ“ ارقىلى تولقىندى تۇتىنۋ ورلەۋىن قالىپتاستىردى. جىل باسىنان بەرى ءار دارەجەلى ساۋدا ىستەرى تاراۋلارى تۇتاس سالالىق تۇتىنۋدى جەبەۋ قيمىلىن 300 نەشە رەت باستاماشىلدىقپەن نەمەسە ات سالىسىپ ورىستەتىپ، ءار سالاداعى ساۋداگەرلەردى 1500 نەشە رەت تۇتىنۋدى جەبەۋ قيمىلىن ورىستەتۋگە ۇيىمداستىردى، جەتەكتەدى. جەر - جەر كەمىندە بەدەل كوتەرۋ اسەرى بار 2 − 3 تۇتىنۋ كورىنىسىن تۇلعالاپ، تۇتىنۋدىڭ ومىرشەڭدىگىن تۋىنداتتى، تۇرپان، حوتان، ءۇرىمجى سياقتى جەرلەر مۋزيكا فەستيۆالى، شىراق شوۋى، كەشكى اۆتوكولىك كورمەسى، ادەبيەت - كوركەمونەر كونسەرتى سياقتىلار ارقىلى الارماندار لەگىن قالىپتاستىردى.

اۆتونوميالى رايوندىق ساۋدا ىستەرى مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى حى گوچيڭ مىنانى ءبىلدىردى: اۆتونوميالى رايوندىق ساۋدا ىستەرى مەڭگەرمەسى باستاماشىلدىقپەن ءۇي جيھازدارى تۇتىنۋىن جەبەۋدىڭ ءبىرقانشا شاراسىن اتقارۋ جوباسى، كونە ماركانى كۋالاندىرۋ، باسقارۋ ءادىسى سياقتى ءبىر قىدىرۋ ساياسات - شارالاردى شىعارادى؛ ”2023 - جىلعى تۇتىنۋدى جەبەۋ قيمىلىن“ ۇزدىكسىز ىلگەرىلەتىپ، جەرگىلىكتى ەرەكشەلىككە يە ءبىر توپ ايگىلى ماركالى قۇتتىقتاۋ قيمىلدارىن وتكىزىپ، تۇتىنۋ بازارىنىڭ ومىرشەڭدىگىن ونان ارى قاۋلاتادى.