سايكەس مەزگىلدەگىدەن %9.5 ارتتى

انار بۇلت \ شينجياڭ گازەتىنىڭ ٴتىلشىسى لۋ فىڭباۋ 9 ـ ايدىڭ 1 ـ كۇنى ۇرىمجىدەن حابارلايدى. جۇڭگو تەمىر جولى ٴۇرىمجى مەكەمەسى توبى شەكتى سەرىكتەستىگىنەن ۇعىسۋىمىزشا، جازعى تاسىمال مەزگىلىندە شينجياڭ تەمىر جولى جيىنى 11 ميلليون 507 مىڭ 300 جولاۋشى (رەت) جونەلتكەن، بۇل بۇرىنعى جىلدارداعى سول تۇستاعىمەن سالىستىرعاندا ەڭ جوعارى دەڭگەيگە جەتىپ، سايكەس مەزگىلدەگىدەن %9.5 ارتىپ، ارتۋ مولشەرى بۇكىل ەلدەگى تەمىر جولداردىڭ الدىڭعى لەگىنە وتكەن.

بيىلعى جازعى تاسىمال 7 ـ ايدىڭ 1 ـ كۇنىنەن 8 ـ ايدىڭ 31 ـ كۇنىنە دەيىن جالعاستى، جازعى تاسىمال مەزگىلىندە شينجياڭ تەمىر جول تاراۋلارى 12306 بەلەت ساتۋ جانە بەلەتتى تولىقتاپ ساتىپ الۋدىڭ ۇلكەن ساندى مالىمەتىنەن ويداعىداي پايدالانىپ، جولاۋشىلاردىڭ ساپار قاجەتىنە ىشكەرىلەي تالداۋ جاساپ، پويەزدىڭ قاتىناۋ جوباسىن يكەمدى ساپالىلاندىرىپ، ۋاقىتشا جولاۋشىلار پويەزىن كوبەيتۋ، موتورلى ۆاگوندار قۇراماسىن قايتالاي بىرىكتىرۋ، جاي قارقىندى جولاۋشىلار پويەزىنە تىركەمەلى ۆاگون قوسۋ سياقتى تاسىلدەر ارقىلى قاۋىرت مەزگىل، باعىت جانە ٴوڭىر ارالىق بويىنشا تاسىمال قۋاتىن دەر كەزىندە ارتتىرىپ، جيىنى 8725 كەزەك جولاۋشىلار پويەزىن جونەلتتى، بۇل سايكەس مەزگىلدەگىدەن 740 كەزەك ارتىپ، ارتۋ مولشەرى %9.3كە جەتتى. سونىمەن بىرگە، ”شيندۇڭفاڭ جۇردەك پويەزى“، ”تيانشان ٴنومىرلى“، ”تارىمدى اينالىپ ساياحاتتاۋ“ سياقتى ساياحات ونىمدەرى ۇزدىكسىز مولايىپ، جيىنى 32 كەزەك ساياحات ارناۋلى پويەزى قاتىناپ، شينجياڭعا كەلەتىن 62 كەزەك ساياحات ارناۋلى پويەزىن قابىلدادى، بۇل سايكەس مەزگىلدەگىدەن %50كە جۋىق ارتتى، 50 مىڭعا جۋىق ساياحاتشى (رەت) پويەزبەن تيانشان الابىنداعى كوركەم كورىنىستەردى تاماشالادى.

جازعى تاسىمال مەزگىلىندە شينجياڭ تەمىر جول تاراۋلارى جولاۋشى تاسىمالى جونىنەن قىزمەت وتەۋ ساپاسىن ٴۇرتىس جوعارىلاتتى، ٴارقايسى نەگىزگى ستانسيالار بەلەت ساتۋ زالى، قىزمەت وتەۋ تۇعىرى قاتارلى ورىندارداعى نۇسقاۋشىلىق جانە قىزمەت وتەۋ قىزمەتكەرلەرىن كوبەيتىپ، ٴجۇرىپ ـ تۇرۋى قولايسىز نەمەسە جول سەرىگى جوق ٴتۇيىندى جولاۋشىلارعا الدىن الا كەلىسىم بويىنشا قىزمەت وتەدى، بوران، نوسەر قاتارلى توسىننان تۋىلاتىن قالىپسىز اۋا رايى جونىندە تاسىمالدى توقتاتۋ، قارقىندى شەكتەۋ، وراعىتىپ ٴوتۋ سياقتى شارالاردى كۇنى بۇرتىن قولدانىپ، حاۋىپ ـ قاتەردەن ىرىقتىلىقپەن ساقتاندى ٴارى پويەز توقتاۋ، كەشىگۋ سياقتى جاعدايلاردى دەر كەزىندە جاريالاپ، بەلەت قايتارۋ، بەلەتتىڭ ۋاقىتىن وزگەرتۋ سياقتى قىزمەت وتەۋلەردى ويداعىداي ىستەپ، جولاۋشىلاردىڭ حاۋىپسىز، ٴتارتىپتى ساپارلاۋىنا كەپىلدىك ەتتى.

جولاۋشى تاسىمال مولشەرىنىڭ ارتۋى كورنەكتى بولىپ عانا قويماي، جازعى تاسىمال مەزگىلىندە شينجياڭ تەمىر جولىنىڭ جۇك جونەلتۋ مولشەرى 39 ميلليون 698 مىڭ تونناعا جەتىپ، سايكەس مەزگىلدەگىدەن %11.1 ارتتى.

شينجياڭ تەمىر جول تاراۋلارى جوعارعى، تومەنگى بۋىنداعى كاسىپورىندارمەن سەلبەستىكتى كۇشەيتىپ، كومىر، مۇناي، مەتال قورىتۋ، حيميا ونەركاسىبى، اۋىل شارۋاشىلىق زاتتىق ماتەريالدارى بولىكتەرى وداعى سەلبەستىك تۇعىرىن قۇرىپ، تاسىمال قاجەتىن دالمە ـ ٴدال يگەردى؛ ”ٴبىر تالون تۇزىمىندەگى“ تەمىر جول، تەڭىز جولى بىرلەسكەن تاسىمالى بويىنشا 3 كەزەك ارناۋلى پويەز ۇيىمداستىرىپ جۇرگىزىپ، ارناۋلى پويەز تاسىمال ۋاقىتىن 78 ساعات ىشىندە تىزگىندەدى؛ كومەسكى كۇشتى ىشكەرىلەي اشىپ، ونىمدىلىكتى جوعارىلاتىپ، وڭتۇستىك شينجياڭ تەمىر جولىنىڭ اقسۋدان قاشقارعا دەيىنگى بولىگىندە 10 مىڭ توننالىق پويەزدى تۇراقتى قاتىناتتى، اقسۋدان قاشقارعا دەيىنگى بولىگىندە، جىڭ _ قورعاس تەمىر جولىندا جۇك پويەزىنىڭ جىلدامدىعىن تەزدەتتى؛ گولمۋد _ كورلا تەمىر جولىنىڭ (شينجياڭ بولىگى) يقۋاتىن ارتتىرۋ، جاڭالاۋ ينجەنەرياسى بويىنشا 28 ايىرعى بەكەت قوسىپ، مەرزىمىنەن 50 كۇن بۇرىن بارلىعىن اشىپ، تاسىمال قۋاتىن %110 ارتتىردى؛ شينجياڭ ىشىندە جولاۋشىلار پويەزى ۇلگىسىندە كومىردى اينالمالى تاسۋ كولەمى كەڭەيتىلىپ، كۇنىنە ورتا ەسەپپەن 78 مىڭ توننا مولشەرىندە كومىر تاسىلدى، شينجياڭنىڭ كومىرىن سىرتقا تاسۋ تەبىنى ارتتىرىلىپ، جازعى تاسىمال مەزگىلىندە كۇنىنە ورتا ەسەپپەن 233 مىڭ توننا كومىر تاسىلدى.