— 2025 ـ جىلعى شينجياڭ 15 ـ ناۋرىز حالىقارالىق اۆتوكولىك كورمەسىنەن اۆتوكولىك بازارىنىڭ جاڭا بەتالىسىنا كوز جىبەرگەندە

انار بۇلت \ شينجياڭ گازەتىنىڭ ٴتىلشىسى حي حۇڭۋي

3 ـ ايدىڭ 16 ـ كۇنى 2025 ـ جىلعى شينجياڭ 15 ـ ناۋرىز حالىقارالىق اۆتوكولىك كورمەسى ۇرىمجىدە تابىسپەن اياقتادى. 6 كۇندىك كورمە مەزگىلىندە كورمەنى تاماشالاۋشى 197 مىڭ ادامنان (رەت) اسىپ، اۆتوكولىك كورمە ورنىندا ساۋدالانعان جانە الدىن الا تاپسىرىس بەرىلگەن تاپسىرىس 16 مىڭ 27 اۆتوكولىككە، جالپى ساتىلىم سوماسى شامامەن 2 ميلليارد 400 ميلليون يۋانعا جەتىپ، سايكەس مەزگىلدەگىدەن %20 ارتىپ، تاريحتاعى تىڭ دەڭگەيگە جەتتى. مەملەكەت بويىنشا بيىلعى تۇڭعىش B دارەجەلى اۆتوكولىك كورمەسى رەتىندە، وسى كەزەكتى اۆتوكولىك كورمەسىندە اۆتوكولىك تۇتىنۋىنىڭ كوپتەگەن جاڭا بەتالىسى جارىققا شىقتى.

ساياساتتىڭ قاباتتاسۋى اۋىستىرۋدىڭ قوزعالىس قۋاتىن تاراتتى

وسى كەزەكتى اۆتوكولىك كورمەسى ٴدال 2025 ـ جىلعى شينجياڭ ساۋدا ىستەرى سالاسىنىڭ تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ساياساتىن اتقارۋ مەزگىلىنە تۋرا كەلگەندىكتەن، اۆتوكولىكتەردى جاراقسىزعا شىعارىپ جاڭالاۋ جانە اۆتوكولىكتەردى اۋىستىرىپ جاڭالاۋ قوسىمشا قاراجاتى ساياساتى ٴارقايسى ٴىرى اۆتوكولىك زاۆودتارىنىڭ باعانى ارزانداتىپ پايدا بەرۋىمەن قوس قابات تيىمدىلىك قالىپتاستىرىپ، زور مولشەردەگى تۇتىنۋشىلاردى كەلىپ اۆتوكولىك تاڭداۋعا، اۆتوكولىك ساتىپ الۋعا باۋرادى.

ٴۇرىمجى قالاسىنىڭ تۇرعىنى ليۋ تاۋ اۆتوكولىك كورمەسىندە ەسەپ جاسادى، ول ساتىپ الۋدى ويلاپ جۇرگەن ٴبىر جاڭا ەنەرگيالى اۆتوكولىكتى مەملەكەتتىڭ قوسىمشا قاراجات بەرۋى جانە كاسىپورىننىڭ تيىمدىلىك جاساۋى سىندى قوس قابات تيىمدىلىكتە 50 مىڭ يۋان ارزانداتىپ ساتىپ الا الادى ەكەن، بۇل %80تىك باعامەن ساتىپ العانعا بارابار.

تۇتىنۋشىلاردىڭ ساياساتتى اناعۇرلىم قانىق ٴبىلۋى ٴۇشىن، اۆتونوميالى رايونداعى ساۋدا ىستەرى تاراۋلارى شينجياڭ حالىقارالىق ٴماجىلىس ـ كورمە ورتالىعىنىڭ 5 ـ ٴنومىرلى سارايىندا كونەسىنىڭ ورنىنا جاڭاسىن اۋىستىرۋ ساياساتى جونىندە كەڭەس سۇراۋ قىزمەت وتەۋ تۇعىرىن ورناتتى.

بيىل شينجياڭ تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ساياساتىنىڭ كولەمىن كۇش سالا كەڭەيتتى، مۇنىڭ ىشىندە اۆتوكولىكتەردى جاراقسىزعا شىعارىپ جاڭالاۋ قوسىمشا قاراجاتى، ەڭ جوعارى بولعاندا، 20 مىڭ يۋانعا، اۆتوكولىكتەردى اۋىستىرىپ جاڭالاۋ قوسىمشا قاراجاتى، ەڭ جوعارى بولعاندا، 15 مىڭ يۋانعا جەتتى. شارتقا ۇيلەسەتىن تۇتىنۋشىلار ”مەملەكەتتىك اۆتوكولىك اينالىمى ينفورماتسياسىن باسقارۋ“ جۇيەسى سايتى نەمەسە ”اۆتوكولىكتىڭ كونەسىنىڭ ورنىنا جاڭاسىن اۋىستىرۋ“ شاعىن باعدارلاماسى ارقىلى قوسىمشا قاراجات ٴوتىنىش ەتۋىنە بولادى.

”ساياسات جوباسى اناعۇرلىم دالمە ـ ٴدال، جوعارى ٴونىمدى بولدى“. اۆتونوميالى رايوندىق ساۋدا ىستەرى مەڭگەرمەسى پارتيا باسشىلىق گرۋپپاسىنىڭ مۇشەسى، 1 ـ دارەجەلى شارلاۋشى جۋ حىشياڭ تانىستىرىپ بىلاي دەدى: بيىل ساۋدا ىستەرى تاراۋلارى ٴوتىنىش ەتۋ جانە تەكسەرۋ بۋىنىن كەمەلدەندىردى، سونىمەن بىرگە اۆتوماتتى تەكسەرۋ بۋىنىن قوسىپ، قاراجاتتى تۇعىردان تىكە جەكە ادامعا اۋدارىپ بەرەدى، قارقىن ٴتىپتى دە تەزدەدى.

ساندى مالىمەتتە كورسەتىلۋىنشە، 3 ـ ايدىڭ 7 ـ كۇنى ٴوتىنىش ەتۋ تۇعىرى ىسكە قوسىلعاننان بەرى، بۇكىل شينجياڭدا 7526 اۆتوكولىككە جاراقسىزعا شىعارىپ جاڭالاۋ قوسىمشا قاراجاتىنا جانە اۋىستىرىپ جاڭالاۋ قوسىمشا قاراجاتىنا ٴوتىنىش تاپسىرىلدى.

ساياساتتىڭ قاباتتاسۋ اسەرى تۇتىنۋشىلاردىڭ اۆتوكولىك ساتىپ الۋ قىزعىندىلىعىن قوزعاپ عانا قالماي، اۆتوكولىكتەردىڭ ساتىلىم مولشەرىن دە زور مولشەردە ارتتىردى. وسى رەتكى اۆتوكولىك كورمەسى ەل ٴىشى ـ سىرتىنداعى 100دەن استام ايگىلى ماركالى اۆتوكولىكتى كورمەگە قاتىناسۋعا باۋرادى. جيلي اۆتوكولىگى 1077 اۆتوكولىك ساتىپ، وسى رەتكى اۆتوكولىك كورمەسىنىڭ ساتىلىم مولشەرىندە اعالاپ العا شىقسا، گۋاڭجوۋ اۆتوكولىك توبىنىڭ تويوتا اۆتوكولىگى مەن بييادي اۆتوكولىگى جەكە ـ جەكە 1000 اۆتوكولىك جانە 750 اۆتوكولىك ساتىپ، ودان كەيىنگى ورىنداردى يەلەپ، كۇشتى بازار باسەكەلىك قۋاتىن ايگىلەدى.

زەردەلى كولىك جۇرگىزۋ توڭكەرىسى ساپارلاۋ كەشىرمەسىن جاڭالادى

جاڭا ەنەرگيالى اۆتوكولىك وسى كەزەكتى اۆتوكولىك كورمەسىنىڭ شارتسىز ”باس كەيىپكەرىنە“ اينالدى، قىرۋار جاڭا ەنەرگيا ماركاسى وسى ارادا الدىڭعى لەكتەگى عىلىم ـ تەحنولوگيا مەن جاڭالىق اشۋ جەتىستىگىن ايگىلەدى، اۆتوماتتى كولىك جۇرگىزۋ، زەردەلى ينتەرنەتتىك جالعاسۋ سياقتى الدىڭعى لەكتەگى عىلىم ـ تەحنولوگيا باسەكەلەسە كوز تارتىپ، اۆتوكولىك كاسىبى دامۋىنىڭ جاڭا بەتالىسىنا جەتەكشى بولدى.

كورمە سارايىنا كىرسەڭىز، زەردەلى كولىك جۇرگىزۋدى سىناپ كورۋ اۋماعىندا باستان ـ اياق ۇزىننان ـ ۇزاق قاتارعا تۇرعان ادامداردى كورەسىز. بييادي اۆتوكولىگىنىڭ ەڭ جاڭا شىعارعان زەردەلى كولىك جۇرگىزۋ تۇرپاتىنداعى كولىككە ”تيانشىن جىيان“ اتتى جوعارى دەڭگەيدەگى جۇيە ورناتىلعان، بۇل جۇيە ەلىكتەمەلى قالا جولىندا كەدەرگى زاتتاردى دالمە ـ ٴدال تانىپ، اۆتوماتتى تۇردە كولىكتى ورنىنا اپارىپ توقتاتادى.

بييادي اۆتوكولىگى ۋاڭچاۋ تورابى شينجياڭ ۇلكەن رايونى تيجارات ورنىنىڭ ديرەكتورى ۋاڭ شياۋفەي تانىستىرىپ بىلاي دەدى: وسى رەت الا كەلگەن زەردەلى كولىك جۇرگىزۋ تۇرپاتىنداعى 7 ٴتۇرلى كولىك تۇگەلدەي ناقتى ۋاقىتتا شوفەردىڭ حال ـ جايىن باقىلاپ ـ تەكسەرە الادى، نازارى بولىنگەن ۋاقىت 3 سەكۋندتان اسسا بولعانى ساقتاندىرادى، بۇل كولىك جۇرگىزۋ حاۋىپسىزدىگىن زور مولشەردە جوعارىلاتتى.

اۆتوكولىك كورمەسىن ۇيىمداستىرۋ كوميسسياسىنىڭ ساناعىنا قاراعاندا، وسى كەزەكتى اۆتوكولىك كورمەسىندە جيىنى 80 ٴتۇرلى جاڭا اۆتوكولىك تۇڭعىش كورمەگە قويىلعان، مۇنىڭ %70ىنە زەردەلى بولمە جۇيەسى ورناتىلسا، %50ىنە جوعارى دەڭگەيدەگى كومەكشى كولىك جۇرگىزۋ يقۋاتى سەپتەلگەن.

زەردەلى يىڭپاي SUV — فاڭچىڭباۋباۋ8گە ورناتىلعان ۇشقىشسىز ۇشاق جۇيەسى سياقتى ”قارا تەحنولوگيا“ بوي كورسەتىسىمەن تۇتىنۋشىلاردىڭ قىزۋ قارسى الۋىنا بولەندى.

ٴۇرىمجى فاڭچىڭباۋ اۆتوكولىك ساتۋ شەكتى سەرىكتەستىگىنىڭ باس ديرەكتورى سۋ شان تانىستىرىپ بىلاي دەدى: فاڭچىڭباۋباۋ8دىڭ توبەسىندە زەردەلى ۇشاقحانا بار، ۇشقىشسىز ۇشاق اۆتوماتتى تۇردە ۇشىپ ـ قونا الادى، سونداي ـ اق اۆتوكولىككە ىلەسىپ ٴجۇرىپ بەينەجازبا تۇسىرە الادى، مەيلى ٴوز كولىگىمەن ساياحاتتاۋ ٴتۇسىرىلىمى، جول جاعدايىن بارلاۋ، اۆتوكولىك قوسىنىن باستاۋ بولسىن، الدە تىكە تاراتۋ ٴتۇسىرىلىمى، جەر بەدەرىن كەسكىندەۋ بولسىن، بارلىعىندا ٴداستۇرلى اۆتوكولىكتەردى باسىپ وزعان كەشىرمەمەن قامدايدى.

ميلليون يۋاندىق دارەجەدەگى ەلىمىزدە وندىرىلگەن جاڭا ەنەرگيالى اۆتوكولىك ياڭۋاڭ U8، U9 اۆتوكولىك تۇرپاتى دا ٴبىرسىپىرا ”قارا تەحنولوگياعا“ سۇيەنىپ تۇتىنۋشىلاردى باۋرادى. وسى ەكى تۇردەگى اۆتوكولىك يقۋات، مەڭگەرۋ جانە حاۋىپسىزدىك سياقتى جاقتاردا تۇگەلدەي ماڭداي الدى ورىندا تۇرادى، شينجياڭنىڭ تۇتىنۋ بازارىنداعى بەينەسى دە سونداي تاماشا بولدى.

ٴۇرىمجى ياڭۋاڭ ورتالىق دۇكەنىنىڭ باستىعى جاڭ شينۋي مىنالاردى ٴبىلدىردى: شينجياڭنىڭ ساياحات بايلىعى مول، ياڭۋاڭ ماركاسىنىڭ شينجياڭداعى ساتىلۋ مولشەرى بارعان سايىن جوعارىلاۋدا. بيىل ياڭۋاڭ ماركاسىن سەزىنۋ ورتالىعى رەسمي ىسكە قوسىلىپ، شينجياڭداعى تۇتىنۋشىلاردى اناعۇرلىم ويداعىداي ساتۋدان كەيىنگى قىزمەت وتەۋ سەزىنۋىن سيلايدى.

سونىمەن بىرگە ٴداستۇرلى اۆتوكولىك كاسىپورىندارى دا جاڭا ەنەرگيا جارىس جولىندا جاڭا تۇرلەردى ورتاعا سالدى. حۇڭچي تيانگۇڭ 08دىڭ قالقىمالى توبەسى، تىڭشى N9دىڭ كوبەلەك قانات ەسىگى جوباسى ەستەتيكالىق گەندى ەلەكترلىلەندىرۋگە ويىستىرۋعا ەنگىزدى. دۇڭفىڭ رىچان كولىكتە باسى اينالۋدان ساقتانۋ تەحنيكاسىن ورتاعا سالىپ، ديناميكالى شىعارىلعان قيسىق سىزىقتى زەردەلى رەتتەۋ ارقىلى موتورلى كولىككە وتىرعاندا جايسىزدانۋ ماسەلەسىن شەشتى.

بازاردىڭ كۇسەت بولۋى كاسىپ سالاسىنىڭ دەڭگەيىن وسىرۋگە جەتەكشى بولدى

زەردەلى ينتەرنەتتىك جالعاسۋ تەحنولوگياسىنىڭ جالپىلاسۋىنا، اۋىستىرىپ ساتىپ الۋ ساياساتىنىڭ تەرەڭدەۋىنە، دارالانعان قاجەتتىلىكتىڭ ارتۋىنا ىلەسە، وسى جولعى جىل باسىنداعى اۆتوكولىك كورمەسى تۇتىنۋ قىزعىندىلىعىن قوزعاپ عانا قويماي، شينجياڭ اۆتوكولىك كاسىپ سالاسىن جوعارى ساپالى دامىتۋدىڭ سارا جولىن دا سالدى.

شينجياڭدا زاۆود قۇرعان اۆتوكولىك كاسىپورنى رەتىندە، گۋاڭجوۋ اۆتوكولىك توبى چۋانچي ماركالى اۆتوكولىك تۇرپاتى جەرگىلىكتى تۇتىنۋشىلاردىڭ ايرىقشا نازارىن اۋداردى. كورمە ورنىندا گۋاڭجوۋ اۆتوكولىك توبى چۋانچي ماركالى اۆتوكولىك شىعارعان DeepSeek تىلدىك دىبىس سەپتەلگەن ٴىرى مودەلدى جاڭا اۆتوكولىك تۇرپاتى S7 كوپتەگەن تۇتىنۋشىنى باۋرادى.

گۋاڭجوۋ اۆتوكولىك توبى چۋانچي اۆتوكولىك شەكتى سەرىكتەستىگى شينجياڭ بولىمشە سەرىكتەستىگى قازىر باس قۇراستىرۋ سەحى، ماي قۇيۋ پۋنكتى، سىناق كولىك جۇرگىزۋ جولى سياقتىلاردى قامتىعان سايكەستى قۇرىلعىلاردى ورناتتى، چۋانچي M8، چۋانچي GS8، چۋانچي E8، يىڭكۋ سياقتى 20عا تارتا اۆتوكولىك تۇرپاتى تۇگەلدەي زور مولشەردە ٴوندىرۋدى جۇزەگە اسىردى، اسىرەسە، MPV جەلىسىندەگى چۋانچي M8، يىڭكۋ سياقتى اۆتوكولىك تۇرپاتى شينجياڭنىڭ ساياحات بازارىنىڭ قارسى الۋىنا بولەندى.

”بيىل جاڭا ەنەرگيا تولىمدىلىعى بەكىتۋدەن وتسە، ٴبىز تاعى ٴبىرسىپىرا جاڭالانعان اۆتوكولىك تۇرپاتىن ەنگىزىپ، ۇرىمجىدە وندىرمەكشىمىز“. وسى سەرىكتەستىكتىڭ باس ديرەكتورى لو حايتيان بىلاي دەدى: كوپتەگەن اۆتوكولىك تۇرپاتىنىڭ شينجياڭعا ەنگىزىلۋىنە بايلانىستى، سەرىكتەستىگىمىز تاعى ماڭايىمىزداعى مەملەكەتتەردىڭ بازارىنا ۇزدىكسىز ٴورىس اشپاقشى ٴارى شەتەلدىك قاريدارلارعا باعىتتاپ تاپسىرىستى اۆتوكولىك تۇرپاتىن شىعارىپ، جەرگىلىكتى ورىندا وندىرىلگەن اۆتوكولىكتەردىڭ شەتەلگە شىعارىلۋىن ىلگەرىلەتەدى.

سوڭعى جىلدارى شينجياڭنىڭ جاڭا ەنەرگيالى اۆتوكولىكتەرىنىڭ بازاردا يەلەيتىن مولشەرى بىرتىندەپ جوعارىلادى. جاڭا ەنەرگيالى اۆتوكولىكتەردىڭ ساقتالۋ مولشەرىنىڭ ارتۋىنا ىلەسە، تۇتىنۋ بازارىنىڭ زاريادتاۋ باعاناسىنىڭ يقۋاتىنا دەگەن تالابى دا ۇزدىكسىز جوعارىلادى.

مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى جاريالاعان ساندى مالىمەتتە كورسەتىلۋىنشە، قازىرگە دەيىن شينجياڭدا 1104 اۋىل ـ قالاشىقتا الەۋمەتتىك زاريادتاۋ قۇرىلعىسى ورناتىلىپ، قامتۋ مولشەرى 2024 ـ جىلدىڭ باسىنداعىمەن سالىستىرعاندا %50 جوعارىلاعان. مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگىنىڭ ەلەكترمەن قامداۋ تيجارات ٴوڭىرى ىشىندەگى بارلىق اكىمشىلىك اۋداندار الەۋمەتتىك زاريادتاۋ قۇرىلعىسىمەن تۇگەلدەي قامتۋدى جۇزەگە اسىرعان، اۋىل ـ قالاشىقتاردى قامتۋ مولشەرى %90تەن اسقان، جيىنى 7912 زاريادتاۋ باعاناسى اۆتونوميالى رايونداعى زەردەلى زاريادتاۋ قىزمەت وتەۋ تۇعىرىنا ەنگىزىلگەن.

مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى جوسپارلاۋ بويىنشا ساتۋ قىزمەت وتەۋ ورتالىعى جاڭادان گۇلدەنگەن كاسىپتەردى زەرتتەۋ ٴبولىمىنىڭ كاسىپتىك باسقارۋشىسى ليۋ ۋىنجۇڭ مىنالاردى ٴبىلدىردى: قازىرگە دەيىن مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى شەت ـ شالعاي اۋىل ـ قىستاقتارداعى بۇقاراعا 394 زاريادتاۋ قۇرىلعىسىن اشىپ بەردى، مۇندا 214 تۇراقتى توك باعاناسى، 180 اينىمالى توك باعاناسى بار. بۇكىل شينجياڭداعى زاريادتاۋ قۇرىلعىسى تورىنىڭ ۇزدىكسىز كەمەلدەنۋى زاريادتاۋ كولەمىنىڭ ۇزدىكسىز كەڭەيۋىنە دە جەتەكشى بولدى.