جالپى مولشەرى ٴۇرتىس تىڭ ساتىعا كوتەرىلدى، قۇرىلىمى ساپالىلانىپ، دارەجەسى جوعارىلادى

　　_ جاڭا جۇڭگو قۇرىلعان 75 جىلدان بەرگى ەكونوميكالىق دامۋ تابىستارى جونىندە جالپى شولۋ

　بەتاشار

2024 ـ جىلى _ جاڭا جۇڭگو قۇرىلعاندىعىنىڭ 75 جىلدىعى. 75 جىلدان بەرى جۇڭگو كوممۋنيستىك پارتياسىنىڭ پارمەندى باسشىلىعىندا، بۇكىل ەلدەگى ٴار ۇلت حالقى ٴبىر نيەت، ٴبىر تىلەكتە بولا وتىرىپ، قاجىرلىلىقپەن كۇرەس جۇرگىزىپ، دۇنيەنى جالت قاراتقان ۇلى تابىستارعا قول جەتكىزىپ، جۇڭحۋا ۇلتىنىڭ ۇلى گۇلدەنۋىنىڭ جاڭا جورىعىندا ارشىندى قادام باسۋدا. 75 جىلدان بەرى شينجياڭ وتانىمىزبەن بىرگە ەكپىندەي ىلگەرىلەپ، بىرگە ەسەيىپ ـ ەرجەتىپ، بىرگە ىنتىماقتاسا كۇرەس جۇرگىزگەن، بىرگە دامىپ گۇلدەنگەن داڭعىل جولعا ٴتۇستى.　

بۇگىننەن باستاپ، انار بۇلت \ شينجياڭ گازەتى ”مەملەكەتتى قۇدىرەتتەندىرۋ جولىندا ەكپىندەي ىلگەرىلەۋ، جاڭا جورىققا ارشىندى قادام تاستاۋ“ ارناۋلى ستونىن اشىپ، جاڭا جۇڭگو قۇرىلعان 75 جىلدان بەرى قول جەتكەن ۇلى تابىستاردى، اسىرەسە، پارتيا 18 ـ قۇرىلتايىنان بەرى پارتيا مەن مەملەكەتتىڭ ٴتۇرلى ىستەرىندە قول جەتكەن تاريحي سيپاتتى تابىستاردى، تۋىلعان تاريحي سيپاتتى وزگەرىستەردى جان ـ جاقتى حابارلاپ، جاڭا داۋىردەگى پارتيانىڭ شينجياڭدى باسقارۋ جالپى جوباسىنىڭ جەتەكشىلىگىندە شينجياڭنىڭ بايتاق دالاسىندا تۋىلعان تەرەڭ وزگەرىستەردى جاندى ايگىلەپ، تۇتاس رايونداعى ٴار ۇلت كادرلارى مەن بۇقاراسىن شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، جۇڭگو　ۇلگىسىندەگى وسىزامانداندىرۋدىڭ شينجياڭ تاراۋىن قۇلشىنا جازۋعا جىگەرلەندىرەدى.

　　□ شينحۋا اگەنتتىگىنىڭ تىلشىلەرى چىن ۋيۋي، شىن چىڭ، زوۋ دوۋي

2024 ـ جىلى جاڭا جۇڭگو 75 جىلدىق مەرەي تويىن قارسى الادى.

تار جول، تايعاق كەشۋلەردەن ٴوتىپ، كوكتەمدە گۇلدەپ، كۇزدە جەمىس بەردى. 75 جىلدان بەرى جۇڭگو كوممۋنيستىك پارتياسىنىڭ پارمەندى باسشىلىعىندا، جۇڭگو ٴيىنى كيىمگە، قارنى اسقا جارىماۋدان جاپپاي دوڭگەلەك داۋلەتتىلىككە قادام تاستاپ، كەدەي ٴارى دارمەنسىزدىكتەن گۇلدەنىپ ـ كوركەيۋگە، بايۋعا، قۇدىرەتتەنۋگە قادام تاستاپ، ادامزاتتىڭ دامۋ تاريحنداعى ۇلى كەرەمەتتى جاراتتى.

قايراتتانا العا ۇمتىلىپ، جەلكەن جايىپ ەكپىندەي ىلگەرىلەدى. پارتيا 18 ـ قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى ۇزاق بولاشاقتى كوزدەپ، جالپى جاعدايدى ٴبىر تۇتاس مەڭگەرىپ، اۋقىمدى يگەرىپ، جۇڭگو ەكونوميكاسى الىپ كەمەسىنىڭ تولقىن جارا العا تارتىپ، نىق قاداممەن الىسقا جەتۋىن ىلگەرىلەتتى.

　　ەكونوميكا كولەمى ٴۇرتىس تىڭ ساتىعا كوتەرىلىپ، جالپىلىق مەملەكەت قۋاتىندا تاريحي قارىشتاۋ جۇزەگە اسىرىلدى

كۇز باسى مەزگىلى، ليڭديڭياڭدا وركەشتى تولقىندار الىستان بۋىرقانىپ، تەڭىز بەن اسپان ٴبىر تۇسكە ەنگەن. شىنجىن _ جۇڭشان جولى بەينە الىپ ايداعارداي، كوڭىلدىر تەڭىز بەتىندە يرەلەڭدەپ سوزىلىپ جاتىر. دۇنيە ٴجۇزىن جالت قاراتقان وسى ەرەكشە ينجەنەريادا بيىل 6 ـ ايدىڭ 30 ـ كۇنى رەسمي كولىك قاتىناپ، دۇنيە جۇزىندەگى تۇڭعىش ”كوپىر، ارال، تۋنەل، سۋ استىن ٴوزارا تۇتاستىرۋ“ ٴبىر تۇلعالانعان تەڭىز اتتاعان شوعىرلى ينجەنەرياعا اينالدى.

كەلەلى ينجەنەريا _ ەكونوميكالىق قۋاتتىڭ جانە جالپىلىق مەملەكەت قۋاتىنىڭ شوعىرلى ايگىلەنۋى، جۇڭگو ەكونوميكاسىن ٴتۇسىنۋدىڭ كىلتى.

جاڭا جۇڭگو قۇرىلعان 75 جىلدان بەرى جۇڭگو ەكونوميكاسى سەرپىنى قۋاتتى، كۇللى الەمدى تاڭ قالدىرعان تاريح جاراتتى. اسىرەسە، پارتيا 18 ـ قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى جاڭا دامۋ ۇستانىمىن جەتەكشى ەتىپ، جوعارى ساپالى دامۋدىڭ قوزعاۋشى كۇشىن، ومىرشەڭدىك كۇشىن، كومەسكى كۇشىن كۇش سالا تاسقىنداتىپ، العا باسۋ جولىنداعى ٴتۇرلى حاۋىپ ـ قاتەرگە، سىن ـ سايىستارعا ٴونىمدى توتەپ بەرىپ، ەكونوميكانىڭ ۇزدىكسىز اقاۋسىز دامۋىن پارمەندى جەبەدى.

75 جىلدان بەرى ەلىمىزدىڭ ەكونوميكا كولەمى ٴۇرتىس تىڭ ساتىعا كوتەرىلدى.

1952 ـ جىلى ەلىمىزدىڭ ىشكى ٴوندىرىس جالپى ٴونىم قۇنى نەبارى 67 ميلليارد 900 ميلليون يۋان بولاتىن. رەفورما جاساعان، ەسىك اشقاننان بەرى ەكونوميكا تەز قارقىنمەن دامىپ، ەكونوميكانىڭ جالپى مولشەرى 1986 ـ جىلى ٴبىر تريلليون يۋاننان استى، 2000 ـ جىلى 10 تريلليون يۋان ۇلكەن وتكەلدەن ٴوتتى، 2010 ـ جىلى جاپونيادان وزىپ دۇنيە ٴجۇزى بويىنشا 2 ـ ۇلكەن ەكونوميكالىق تۇلعاعا اينالدى.

پارتيا 18 ـ قۇرىلتايىنان بەرى ەلىمىزدىڭ ەكونوميكالىق قۋاتى ۇزدىكسىز كۇشەيدى. 2020 ـ جىلى ەكونوميكانىڭ جالپى مولشەرى 100 تريلليون يۋان وتكەلدەن ٴوتتى، 2023 ـ جىلى 126 تريلليون يۋاننان استى. تۇراقتى باعا بويىنشا ەسەپتەگەندە، 2023 ـ جىلى ەكونوميكانىڭ جالپى مولشەرى 1952 ـ جىلداعىدان 223 ەسە ارتىپ، جىلدىق ورتاشا ارتۋى %7.9 بولدى.

75 جىلدان بەرى ەلىمىزدىڭ دامۋ نەگىزى بارعان سايىن بەكەمدەلدى.

استىقتىڭ جالپى ٴونىم مولشەرى 1949 ـ جىلعى 113 ميلليون 180 مىڭ توننادان 2023 ـ جىلى 695 ميلليون 410 مىڭ تونناعا جەتىپ، اس كەسەسىن ٴوز قولىمىزدا مىقتاپ ۇستاپ، اۋىل شارۋاشىلىعىنىڭ نەگىزدىك ورنى ۇزدىكسىز كۇشەيدى؛ 2023 ـ جىلى ەلىمىزدىڭ جاساۋ كاسىبىنىڭ ارتقان قۇنى 33 تريلليون يۋانعا جەتىپ، كولەمى ٴۇرتىس 14 جىل دۇنيە ٴجۇزىنىڭ ەڭ الدىڭعى ورنىندا تۇرىپ، ونەركاسىپ ٴوندىرىس قۋاتى ۇزدىكسىز جوعارىلادى؛ جاڭا كاسىپ سالاسى، جاڭا كاسىپ كۇيى تولاسسىز جارىققا شىعىپ، قىزمەت وتەۋ كاسىبى بىرتىندەپ حالىق شارۋاشىلىعىنىڭ ٴبىرىنشى ۇلكەن كاسىپ سالاسىنا اينالدى.

75 جىلدان بەرى ەلىمىزدىڭ ەكونوميكالىق ىقپال كۇشى ۇزدىكسىز ارتتى.

2023 ـ جىلى جۇڭگو ەكونوميكاسىنىڭ جالپى مولشەرىنىڭ دۇنيە جۇزىندە يەلەگەن سالىستىرماسى %17 مولشەرىنە كوتەرىلدى. 2013 ـ جىلدان 2023 ـ جىلعا دەيىن جۇڭگو ەكونوميكاسىنىڭ دۇنيە ٴجۇزى ەكونوميكاسىنىڭ ارتۋىنا ورتاشا ۇلەس قوسۋ مولشەرى %30تەن اسىپ، دۇنيە ٴجۇزى ەكونوميكاسىنىڭ ارتۋىنداعى ەڭ ۇلكەن قوزعاۋشى كۇش قاينارى بولدى.

زات ساۋداسىنداعى ٴبىرىنشى ٴىرى ەل، قىزمەت وتەۋ ساۋداسىنداعى ەكىنشى ٴىرى ەل، تاۋار تۇتىنۋىنداعى ەكىنشى ٴىرى ەل، شەتەل اقشاسى قورىنداعى ٴبىرىنشى ٴىرى ەل... بۇگىنگى تاڭداعى جۇڭگو ەكونوميكاسى سان الۋان بەينەسىن ايگىلەدى.

باس شۋجي شي جينپيڭ بىلاي دەپ اتاپ كورسەتتى: جۇڭگو كوممۋنيستىك پارتياسىنىڭ 100 جىلدان استام ۋاقىت جۇڭگو حالقىن ىنتىماقتاستىرىپ، باستاپ، ۇلتتى گۇلدەندىرۋگە تالپىنۋ تاريحىنىڭ ٴوزى _ وسىزامانداندىرۋ جولى جونىندە ۇزدىكسىز ىزدەنىس جاساۋ تاريحى. سان ۇرپاقتىڭ قاجىماي ـ تالماي قۇلشىنۋىنىڭ ارقاسىندا، ٴبىز جۇڭگو ۇلگىسىندەگى وسىزامانداندىرۋ جولىنا تۇستىك.

ەۆروپانىڭ «وسى زامانعى ديپلوماتيا» سايتىنداعى ماقالادا بىلاي دەپ باعا بەرىلدى: 75 جىلدان بەرى جۇڭگو كەدەي مەملەكەتتەن دۇنيە ٴجۇزى بويىنشا ەكىنشى ۇلكەن ەكونوميكالىق تۇلعاعا اينالىپ، دۇنيە جۇزىندەگى ەڭ ۇلكەن جاساۋ كاسىبى جۇيەسىنە يە بولدى. جۇڭگو كوممۋنيستىك پارتياسىنىڭ 18 ـ قۇرىلتايىنان بەرى بۇكىل ەل حالقىنىڭ قۇلشىنىسى جەتىستىككە قول جەتكىزىپ، جۇڭگودا تاريحي سيپاتتى وزگەرىس تۋىلىپ، وسىزامانداندىرۋ قۇرىلىسىنىڭ جاڭا كەزەڭىنە ٴساتتى قادام تاستادى.

　　ەكونوميكالىق قۇرىلىم ۇزدىكسىز ساپالىلانىپ، جوعارى ساپالى دامۋ تىڭعىلىقتى ىلگەرىلەتىلدى

بيىل 7 ـ ايدا جۇڭگو 1 ـ اۆتوكولىك توبى دەربەس زەرتتەپ جاساعان 9 ميلليونىنشى جيەفاڭ ماركالى جۇك اۆتوموبيلى جيلين ولكەسىنىڭ چاڭچۇن قالاسىنداعى زەردەلى زاۆودتان لەنيادان شىقتى. 70 نەشە جىلدىڭ الدىندا، جۇڭگو 1 ـ اۆتوكولىك توبى نولدەن باستاپ قۇلشىنىپ، 3 جىلدا سالىنىپ وندىرىسكە قوسىلىپ، جاڭا جۇڭگونىڭ اۆتوموبيل جاساي الماۋ تاريحىن اياقتاتتى.

جيەفاڭ ماركالى جۇك اۆتوموبيلى جەتى ۇرپاق جاڭالانۋ ارقىلى جۇڭگو اۆتوموبيل ونەركاسىبىنىڭ جوقتان بار بولۋعا، السىزدەن كۇشەيۋگە دەيىنگى دامۋ جەتىستىگىنە كۋا بولدى. 1 ـ اۆتوكولىك توبىنىڭ دەربەس جاڭالىق اشۋى، ساپاسىنىڭ سالتاناتتى تۇرلەنۋىنىڭ ٴوزى دە جۇڭگو ەكونوميكاسىنىڭ تيپ جاڭالاپ، دارەجەسىن ٴوسىرۋىنىڭ ىقشام كورىنىسى.

جاڭا جۇڭگو قۇرىلعان 75 جىلدان بەرى ەلىمىز ەكونوميكاسىنىڭ قۇرىلىمى جالاڭ بولۋدان سان ـ سالالى كاسىپ بولىپ گۇلدەنۋگە دەيىن ەكونوميكانىڭ دامۋىنىڭ جالپى بەتتىلىگى، سايكەسىمدىلىگى جانە باياندىلىعى ۇزدىكسىز كۇشەيدى.

اسىرەسە، پارتيا 18 ـ قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى جوعارى ساپالى دامۋ نىساناسىن كوزدەپ، ەكونوميكا قۇرىلىمىن ستراتەگيالىق رەتتەۋدى جەدەل ىلگەرىلەتىپ، دامۋ تاسىلىنە وزگەرىس جاساۋدا، ەكونوميكا قۇرىلىمىن ساپالىلاندىرۋدا ماندىك ىلگەرىلەۋشىلىككە قول جەتكىزدى.

بۇل ەكونوميكا قۇرىلىمى ۇزدىكسىز ساپالىلانعان 75 جىل _

كاسىپ سالاسى قۇرىلىمىندا تەرەڭ وزگەرىس تۋىلىپ، اۋىل شارۋاشىلىعىن نەگىز ەتۋدەن 3 كاسىپ سالاسىن سايكەستى دامىتۋعا بۇرىلىس جاساۋدى جۇزەگە اسىردى؛ سۇرانىس قۇرىلىمى ۇزدىكسىز جاقسارىپ، سۇرانىس دارمەنسىز بولۋدان ”ٴۇش تەگەرشىك“ سايكەسە كۇش شىعارۋعا قاراي بۇرىلىس جاساۋدى جۇزەگە اسىردى؛ قالا مەن اۋىلدى ٴبولىپ تاستاۋدان ٴبىر تۇتاس جوسپارلاپ ىلگەرىلەتۋگە دەيىن ٴوڭىردىڭ قۇرىلىمىن ساپالىلاندىرىپ قايتا قۇردى.

پارتيا 18 ـ قۇرىلتايىنان بەرى ەكونوميكانىڭ قۇرىلىمىن ساپالىلاندىرۋدى ىلگەرىلەتۋدىڭ اياق الىسى جىلدام، قادامى ورنىقتى بولدى. ٴداستۇرلى كاسىپ سالالارىنىڭ تيبىن وزگەرتۋدى جەدەلدەتىپ، جاڭادان گۇلدەنگەن كاسىپ سالاسى قارىشتاپ دامىپ، قىزمەت وتەۋ كاسىبىنىڭ كولەمى ۇزدىكسىز زورايدى. 2023 ـ جىلى ەڭ سوڭعى تۇتىنۋ شىعىسىنىڭ ەكونوميكانىڭ ارتۋىنا ۇلەس قوسۋ مولشەرى %82.5كە جەتىپ، تۇتىنۋدىڭ ”نەگىزگى قوزعالتقىشتىق“ رولى اناعۇرلىم كۇشەيدى. وڭىرلەردى سايكەستى دامىتۋ ستراتەگياسى مەن وڭىرلەردىڭ كەلەلى ستراتەگياسى ىشكەرىلەي اتقارىلىپ، جاڭا ارتۋ ۇيەگى، ارتۋ بەلدەۋى ۇزدىكسىز قالىپتاستى. 2023 ـ جىلدىڭ سوڭىندا تۇرعىلىقتى حالىقتى قالا ـ قالاشىقتاندىرۋ سالىستىرماسى 2012 ـ جىلدىڭ سوڭىمەن سالىستىرعاندا 13.06 پايىز جوعارىلاپ، قالا مەن اۋىلدىڭ دامۋ پارقى اناعۇرلىم ازايدى.

بۇل دامۋدىڭ قوزعاۋشى كۇشى ۇزدىكسىز كۇشەيگەن 75 جىل _

”دۇڭفاڭحۇڭ ـ 1“ جاساندى سەرىكتى ٴساتتى ۇشىرعاننان ”تيانگۇڭنىڭ“ عارىشتى شارلاۋىنا دەيىن، ودان C919 ٴىرى ۇشاعىنىڭ ساۋدالىق ۇشۋدى جۇزەگە اسىرۋىنا دەيىن جۇڭگونىڭ جاڭالىق اشۋ قۋاتى ۇزدىكسىز جوعارىلادى.

2023 ـ جىلى ەلىمىزدە تۇتاس قوعامنىڭ زەرتتەۋ جانە تاجىريبەنى دامىتۋ قاراجاتىنىڭ شىعىس كولەمى ورنىقتى تۇردە دۇنيە ٴجۇزى بويىنشا ەكىنشى ورىندا تۇرىپ، 2012 ـ جىلمەن سالىستىرعاندا 2.2 ەسە ارتتى؛ دۇنيە جۇزىندەگى جاڭالىق اشۋ كورسەتكىشى 2012 ـ جىلداعى 34 ـ ورىننان 2023 ـ جىلى 12 ـ ورىنعا كوتەرىلىپ، الدىڭعى 30 ورىنداعى بىردەن ـ ٴبىر ورتاشا كىرىستى ەكونوميكالىق تۇلعا بولدى... پارتيا 18 ـ قۇرىلتايىنان بەرى جاڭالىق اشۋ جوعارى ساپالى دامۋعا توقتاۋسىز قوزعاۋشى كۇش ۇستەدى.

بۇل دامۋ كەڭىستىگى ۇزدىكسىز كەڭەيگەن 75 جىل _

كەڭ كولەمدە ”ەنگىزۋدەن“ ارشىندى قاداممەن ”سىرتقا شىعارۋعا“، ودان اشىق ەكونوميكانىڭ جاڭا ٴتۇزىلىسىن قۇرۋعا دەيىن ەلىمىزدىڭ ەكونوميكالىق دامۋى ۇزدىكسىز جاڭا كەڭىستىك اشتى.

پارتيا 18 ـ قۇرىلتايىنان بەرى ەلىمىزدىڭ زات ساۋداسى كولەمى ىركەس ـ تىركەس تىڭ دەڭگەي جاراتتى. 2023 ـ جىلى شەتەل ساۋداگەرلەرى تىكە قوسقان 163 ميلليارد 300 ميلليون دوللار قارجىدان ناقتى پايدالانىپ، 1983 ـ جىلمەن سالىستىرعاندا 176 ەسە ارتىپ، كولەمى ٴۇرتىس كوپ جىل دۇنيە جۇزىندە الدا ٴجۇردى. ”ٴبىر بەلدەۋ، ٴبىر جولدى“ بىرگە قۇرۋدىڭ دوستار شەڭبەرى بەكەمدەلدى، كەڭەيدى، 22 ەركىن ساۋدا سىناق رايونىن توپقا ٴبولىپ قۇرىپ، جاپپاي ەسىك اشۋدىڭ جاڭا ارناسىن جەدەل قالىپتاستىردى.

قىم ـ قۋىت، كۇردەلى حالىقارالىق جانە ەل ٴىشى جاعدايى الدىندا، بۇگىنگى تاڭداعى جۇڭگو جۇڭگو ۇلگىسىندەگى وسىزامانداندىرۋدى ىلگەرىلەتۋدى تىعىز ارقاۋ ەتىپ رەفورمانى ونان ارى جاپپاي تەرەڭدەتىپ، جەرگىلىكتى جاعدايعا قاراي جاڭاشا وندىرگىش كۇشتى دامىتىپ، جوعارى ساپالى دامۋدى ىلگەرىلەتۋگە ۇزدىكسىز جاڭا قوزعاۋشى قۋات ۇستەۋدە.

　　حالىق تۇرمىسىنىڭ قۇت ـ ىرىسى ۇزدىكسىز ارتىپ، حالىقتىڭ تۇرمىس ورەسى ۇزدىكسىز جوعارىلادى

اتى قۇلاققا ”ٴجونسال“ ەستىلگەنىمەن، قىستاق ەرەكشە ”وزىق“. يۇننان ولكەسى حۇڭحى وبلىسى كاييۋان قالاسىنىڭ حينيدي الەۋمەتتىك اۋماعىنا بارساڭىز، ۇيلەردىڭ جاسىل اعاش، قۇلپىرعان گۇلدەرمەن كومكەرىلگەندىگىن، كۇن شۋاعىنا شومعان ٴۇي توبەلەرىنىڭ رەتتى بولىپ، جولدارى كەڭ دە تازا ەكەندىگىن، الۋان ٴتۇستى تۇرعىندار تۇراعىنىڭ نۇرعا بولەنىپ تۇرعاندىعىن كورەسىز.

كەزىندەگى ”جولدارى شىرما ـ شاتۋ، لاس سۋلار جايىلىپ اعاتىن، قوقسىقتاردى جەل ۇشىرىپ تۇراتىن“ كەدەي قىستاق بۇگىنگى كۇندە ساياحاتتىڭ يگىلىگىن كورىپ، تاماشا تۇرمىسقا كەنەلدى، بيىل الدىڭعى جارتى جىلداعى ساياحات كىرىسى 700 نەشە مىڭ يۋان بولدى... حينيديدىڭ وزگەرىسى اۋىل ـ قىستاقتى گۇلدەندىرۋدىڭ شىنايى بەينەسى.

جاڭا جۇڭگو قۇرىلعان 75 جىلدان بەرى ەلىمىز باستان ـ اياق حالىق تۇرمىسىنىڭ قۇت ـ ىرىسىن ارتتىرۋدى ەكونوميكانى دامىتۋدىڭ شىعار ٴتۇيىنى جانە تابان تىرەر تياناعى ەتتى.

اسىرەسە، پارتيا 18 ـ قۇرىلتايىنان بەرى حالىقتىڭ كۇن سايىن ارتىپ وتىرعان تاماشا تۇرمىس قاجەتىنە ساي، شي جينپيڭ جولداستى ۇيتقى ەتكەن پارتيا ورتالىق كوميتەتى حالىقتى وزەك ەتكەن دامۋ يدەياسىنا تاباندى بولىپ، حالىق تۇرمىسىن قامتاماسىز ەتۋدەگى ولقىلىقتاردى ۇزدىكسىز تولىقتاپ، حالىق بۇقاراسىنىڭ تابىس سەزىمىنىڭ نەگىزى اناعۇرلىم جەتەرلىكتەي بولدى، باقىت سەزىمى اناعۇرلىم باياندى بولدى، حاۋىپسىزدىك سەزىمى اناعۇرلىم قامتاماسىز ەتىلدى.

مۇلدە كەدەيلىك ماسەلەسى تاريحي سيپاتتى شەشىلدى _

جاڭا جۇڭگو قۇرىلعان باستاپقى مەزگىلدە مەملەكەت كەدەي ٴارى دارمەنسىز، حالىق جاپپاي كەدەي ەدى. تالاي جىل قاجىماي ـ تالماي كۇرەس جۇرگىزۋ ارقىلى كەدەيلەر جان سانى كورنەكتى ازايدى. پارتيا 18 ـ قۇرىلتايىنان بەرى ەلىمىز كەدەيلىكتەن ارىلتۋدان قامال الۋ شايقاسىن جاپپاي باستادى. 2020 ـ جىلدىڭ سوڭىندا قازىرگى ولشەمدەگى 98 ميلليون 990 مىڭ اۋىل ـ قىستاق كەدەي جان سانى بۇكىلدەي كەدەيلىكتەن ارىلىپ، 832 كەدەي اۋدان تۇگەل كەدەيلىك قالپاعىن الىپ تاستاپ، وڭىرلىك سيپاتتى تۇتاس كەدەيلىك ماسەلەسى شەشىلدى، مۇلدە كەدەيلىكتى جويۋ سىندى اۋىر مىندەت ورىندالدى.

حالىقتىڭ تۇرمىسىندا وراسان زور وزگەرىستەر تۋىلدى _

49.7 يۋان، بۇل 1949 ـ جىلعى بۇكىل ەل تۇرعىندارىنىڭ جان باسىندىق قولداعى تابىسى؛ 1978 ـ جىلى رەفورما جاساعان، ەسىك اشقان باستاپقى مەزگىلدە دە نەبارى 171 يۋان بولدى. 2023 ـ جىلى بۇكىل ەل تۇرعىندارىنىڭ جان باسىندىق قولداعى تابىسى 39 مىڭ 200 يۋانعا جەتىپ، زات باعاسى فاكتورىن شىعارىپ تاستاعاندا، 1949 ـ جىلداعىدان، ٴىس جۇزىندە، 76 ەسە ارتىپ، جىلىنا ورتا ەسەپپەن %6 ارتتى.

پارتيا 18 ـ قۇرىلتايىنان بەرى جۇمىستاندىرۋدى الدىمەن ويلاستىرۋ ستراتەگياسى ىشكەرىلەي اتقارىلىپ، 2013 ـ جىلدان 2023 ـ جىلعا دەيىن قالا ـ قالاشىقتاردا جاڭادان جۇمىستاندىرىلعان ادام جيىنى 140 ميلليوننان استى. تۇرعىنداردىڭ كىرىسى ورنىقتى ارتىپ، تۇرمىس ساپاسى ۇزدىكسىز جوعارىلاپ، تۇرعىنداردىڭ ٴار 100 وتباسىنداعى وتباسىلىق اۆتوكولىك سانى 2013 ـ جىلعى 16.9دان 2023 ـ جىلى 49.7گە جەتتى. ەلىمىز ەكولوگيالىق وركەنيەت قۇرىلىسىن بۇرىن بولىپ كورىلمەگەن سەرپىنمەن ىلگەرىلەتىپ، اۋىر دارەجەدە لاستانعان كۇن سانى كورنەكتى ازايىپ، سۋ ورتاسىنىڭ ساپاسى كورنەكتى جاقسارىپ، توپىراق ورتاسىنىڭ حاۋىپ ـ قاتەرى ٴونىمدى باسقارىلىپ ـ تىزگىندەلىپ، تابيعاتقا تاۋى جاسىل، سۋى تۇنىق، اسپانى اشىق، توپىراعى تازا تاماشا ٴتۇپ بوياۋ قوسىلدى.

قوعامدىق قامتاماسىزداندىرۋ تورى بارعان سايىن ٴجيى توقىلدى _

جاڭا جۇڭگو قۇرىلعان باستاپقى مەزگىلدە ەلىمىزدىڭ قوعامدىق قامتاماسىزداندىرۋى ٴالى دە اقتاڭداق كۇيدە ەدى. رەفورما جاساعان، ەسىك اشقاننان بەرى ەلىمىزدىڭ قوعامدىق قامتاماسىزداندىرۋ ٴتۇزىمى بىرتىندەپ ورناتىلىپ، قامتۋ كولەمى ۇزدىكسىز كەڭەيدى.

پارتيا 18 ـ قۇرىلتايىنان بەرى قوعامدىق قامتاماسىزداندىرۋ جۇيەسى قۇرىلىسى تەز ارناعا ٴتۇسىپ، ەلىمىز دۇنيە ٴجۇزى بويىنشا كولەمى ەڭ ۇلكەن قوعامدىق قامتاماسىزداندىرۋ جۇيەسىن قۇردى. 2023 ـ جىلدىڭ سوڭىندا نەگىزگى زەينەتكەرلىك، نەگىزگى ەمدەۋ، جۇمىس ۇستىندە جارالانۋ، جۇمىسسىزدىق قامسىزداندىرۋىنا قاتىناسقان ادام سانى جەكە ـ جەكە ٴبىر ميلليارد 70 ميلليونعا، ٴبىر ميلليارد 330 ميلليونعا، 300 ميلليونعا، 240 ميلليونعا جەتتى. تۇرعىن ۇيمەن قامتاماسىز ەتۋ سەرپىنى ارتىپ، قارتتاردى كۇتىمدەۋ بويىنشا قىزمەت وتەۋى جەدەل دامىپ، بالالار يگىلىگى جانە ازامات جاسىنا تولماعانداردى قورعاۋ جۇيەسى ۇزدىكسىز كەمەلدەندىرىلدى.

75 جىل تار جول، تايعاق كەشۋلەردەن تايسالماي ٴوتىپ، 75 جىل سان وزگەرىستى باستان كەشىردى. وتكەنگە قايىرىلا قاراساق، جۇڭگو ەكونوميكاسى كەرەمەتتەر جاراتىپ، قارىشتاۋدى جۇزەگە اسىردى؛ بولاشاققا كوز جىبەرسەك، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، جۇڭگو ەكونوميكاسىنىڭ جوعارى ساپالى دامۋدا نىق قادام باسىپ، اناعۇرلىم نۇرلى دامۋ بولاشاعىن اشاتىندىعى داۋسىز.

(شينحۋا اگەنتتىگىنىڭ 9 ـ ايدىڭ 8 ـ كۇنى بەيجيڭنەن بەرگەن حابارى)