انار بۇلت \ شينجياڭ گازەتىنىڭ ٴتىلشىسى سو رۇڭجى 3 ـ ايدىڭ 15 ـ كۇنى سانجىدان حابارلايدى. 3 ـ ايدىڭ 15 ـ كۇنى اۆتونوميالى رايوندىق بازار باقىلاۋ ـ باسقارۋ مەكەمەسى سانجى حۇيزۋ اۆتونوميالى وبلىسى بازار باقىلاۋ ـ باسقارۋ مەكەمەسى سياقتى ورىندارمەن بىرلەسىپ، حۇيجيا شىداي سانجى زات ساتىپ الۋ ورتالىعىندا اۆتونوميالى رايوننىڭ جانە سانجى وبلىسىنىڭ ”تۇتىنۋ ورتاسىن ساپالىلاندىرىپ، رازى بولاتىن تۇتىنۋدى بىرگە سومداۋ“ تاقىرىبىنداعى”15·3“ تۇتىنۋشىلاردىڭ ۇقىق ـ مۇددەسىن قورعاۋ قيمىلىن وتكىزدى.

اۆتونوميالى رايوندىق بازار باقىلاۋ ـ باسقارۋ مەكەمەسىنىڭ 1 ـ دارەجەلى شارلاۋشىسى گاۋ جياندۇڭ تانىستىرىپ بىلاي دەدى: 2024 ـ جىلى اۆتونوميالى رايوننىڭ تۇتىنۋشىلاردىڭ ۇقىق ـ مۇددەسىن قورعاۋ قىزمەتى بويىنشا مەڭگەرمەلەر ارا بىرلەسكەن ماجىلىسىنە مۇشە ورىندار سەلبەسىپ بىرگە باسقارۋدى كۇشەيتىپ، ۇقىق قورعاۋدى باقىلاۋ ـ باسقارۋ سەرپىنىن كۇشەيتىپ، ”تۇتىنۋ ورتاسى قۇرىلىسى جىلى“ قيمىلىن ورىستەتتى.

2024 ـ جىلى بۇكىل رايوندا 12 ٴتۇيىندى كاسىپ سالاسىندا الاڭسىز تۇتىنۋعا ۋادە بەرگەن 5852 ورىن جەتىلدىرىلدى، بۇل سايكەس مەزگىلدەگىدەن %101.5 ارتتى؛ ينتەرنەت جەلىسىنەن تىس زات ساتىپ العاندا زاتتى سەبەپسىز قايتارۋعا ۋادە بەرگەن ورىن 2153كە جەتىپ، سايكەس مەزگىلدەگىدەن %50.6 ارتتى؛ جالپى قايتارىلعان زات سانى 580 مىڭ، جالپى سوماسى 108 ميلليون يۋاننان استام بولدى.

تۇتىنۋ ارىز ـ شاعىم ينفورماتسياسىن اشىق جاريالاۋ قىزمەتى ۇقىق قورعاۋدا جاڭالىق اشۋ ماڭىزدى شاراسى ٴارى 12315 ونىمدىلىك قىزمەتىنىڭ ماڭىزدى قۇرامداس بولىگى. 2024 ـ جىلى رايونىمىز تۇتىنۋ ارىز ـ شاعىم ينفورماتسياسىن اشىق جاريالاۋدا جاريالاۋعا تيىستىلەرىن تۇگەل جاريالاپ، جالپى 145 مىڭ تۇتىنۋ ارىز ـ شاعىم ينفورماتسياسىن جاريالادى.

ٴبىر جىل قۇلشىنۋ ارقىلى شينجياڭدا تۇتىنۋ ۇقىعىن قورعاۋدى قوعامدىق بىرگە باسقارۋ العاشقى ادىمدا ونىمدىلىك كورسەتىپ، تۇتىنۋ ورتاسى قۇرىلىسىن بىرگە باسقارۋ ارناسى ۇزدىكسىز كەمەلدەنىپ، تۇتىنۋ داۋ ـ شارلارىن، قايشىلىقتاردى قاينارىنان شەشۋ قابىلەتى ۇزدىكسىز جوعارىلادى. 2024 ـ جىلى اۆتونوميالى رايوندىق 12315 تۇتىنۋشىلار ارىز ـ شاعىم بەرۋ، اشكەرەلەۋ قولباسشىلىق ورتالىعى 528 مىڭنان استام ارىز ـ شاعىم بەرۋ، اشكەرەلەۋ، كەڭەس سۇراۋ ٴىسىن قابىلداپ ٴبىر جاقتى ەتىپ، تۇتىنۋشىلاردىڭ 68 ميلليون 940 مىڭ يۋاننان استام ەكونوميكالىق زيانىن قايتارىپ اكەلدى.

قيمىل بارىسىندا اۆتونوميالى رايوندىق بازار باقىلاۋ ـ باسقارۋ مەكەمەسى تاعى 2024 ـ جىلدىق تۇتىنۋشىلاردىڭ زاڭدى ۇقىق ـ مۇددەسىنە سۇعاناقتىق جاساعان 10 ٴىرى تيپتىك دەلو مىسالىن جاريالاپ، جالعان، جارامسىز تاۋارلاردى شوعىرلى ورتەۋ جاعدايىن تانىستىردى.

ۇعىسۋعا قاراعاندا، ”15·3“ كەزىندە رايونىمىزدىڭ بازار باقىلاۋ ـ باسقارۋ جۇيەسى فورماسى الۋان ٴتۇرلى ۇگىت قيمىلىن ۇزدىكسىز ورىستەتىپ، تۇتىنۋ بىلىمدەرىن جانە ۇقىق قورعاۋ بىلىمدەرىن جالپىلاستىرىپ، تاراتىپ، تۇتىنۋ ەسكەرتۋى مەن ساقتاندىرۋىن دەر كەزىندە تاراتتى.