جالپى ۇزىندىعى 15.7 كيلومەتر! ەل ىشىندەگى تۇڭعىش مۇزدىقتى كەسىپ وتكەن تاس جول تۋنەلى −

موڭعۇلكۇرە - ونسۋ تاس جول تۋنەلىن قازۋ جۇمىسى قاۋىرت جۇرگىزىلۋدە

سۋرەتتە: جۇمىس تەكشەسىندە قۇرىلىس جۇرگىزۋشىلەر دانەكەرلەۋ جۇمىسىن جۇرگىزۋدە.    ليۋ چۇنشيڭ فوتوسى

ٴتىلشىمىز ليۋچۇنشيڭ، ەرىكتى ٴتىلشى رىن جيڭ حابارلايدى. 3 - اي كىرىسىمەن، جۇرت نازارىنداعى G219 لەنياسى موڭعۇلكۇرە - ونسۋ تاس جول نىسانىنداعى قۇرىلىسشىلار قاقاعان سۋىق اۋا رايىنىڭ ىقپالىن جەڭىپ، نىسان قۇرىلىسى اياق الىسىن بەلسەنە ىلگەرىلەتتى.

قازىر سالىنىپ جاتقان G219 لەنياسىنىڭ موڭعۇلكۇرە - ونسۋ تاس جول باتىس تيانشان ەرەكشە ۇزىن تۋنەلى قازىرگە دەيىن دۇنيە ٴجۇزى بويىنشا ەڭ تەرەڭ ۇلكەن قيما بەتتى تاس جول تۋنەلى، سونداي - اق ەل ىشىندەگى تۇڭعىش مۇزدىقتى كەسىپ وتكەن ٴبىرىنشى دارەجەلى تاس جول ەرەكشە ۇزىن تۋنەلى جانە تۇڭعىش رەت بۇيىرىنەن اۋا الماستىرىپ، ىس - ٴتۇتىندى ىعىستىراتىن ٴۇش ۇڭگىرلى تاس جول تۋنەلى. 3 - ايدىڭ 14 - كۇنى تۇستەن بۇرىن ٴتىلشى جۇڭگو قاتىناس جول قۇرىلىسى سالعان G219 لەنياسى موڭعۇلكۇرە - ونسۋ تاس جول نىسانى باتىس تيانشان ەرەكشە ۇزىن تۋنەلىنىڭ كىرەر اۋزىندا تۋنەلدىڭ سىرتىندا تاۋلاردىڭ اق قار قىمتاپ جاتقانىن، ال تۋنەل ٴىشى ـ سىرتىندا ماشينا جابدىقتارىنىڭ ٴتارتىپتى جۇمىس ىستەپ، تاسىمال اۆتوموبيلدەرى ارلى ـ بەرلى قايشالىسىپ، دۋماندى كورىنىس قالىپتاستىرعاندىعىن كوردى.

وسى نىساننىڭ سول جاق ۇڭگىرىنىڭ قۇرىلىس الاڭىندا، دوعاشا ٴدارى قويۋ تەكشەسى بولات ارقالىقتى كوتەرىپ، ەندى عانا قازىپ بولعان تۋنەلدىڭ توبەسىنە ورناتىپ، بەكەمدەۋ جۇمىسىن جۇرگىزۋدە. ەندى ٴبىر جاعىندا، جۇمىس تەكشەسىنىڭ ۇستىندە قۇرىلىسشىلار دانەكەرلەۋ جۇمىسىمەن ابىگەر. تۋنەلدىڭ باسقا وڭىرلەرىندەگى جۇمىسشىلار ٴتارتىپتى تۇردە اۋا الماستىرۋ، ماتەريال تاسىمالداۋ سياقتى قوسىمشا جۇمىستاردى قاربالاس ىستەپ، ٴارقايسى جۇمىس تۇرلەرى تىعىز سايكەستىرىلىپ، تۋنەل جۇمىسىن ورتاق ىلگەرىلەتتى.

وسى نىساننىڭ تەگىس جول ۇڭگىرى جۇمىس ورنىندا، وراسان زور ”موڭعۇلكۇرە ٴنومىرلى“ T B M نىڭ داۋىسى گۇرىلدەپ توقتاۋسىز جۇمىس ىستەپ، پىشاقتى ديسكا جىلدام بۇرعىلاپ، قاتتى تاۋ جىنىستارىن جونىپ، تاس قالدىقتارىن تاسىمال جۇيەسى ارقىلى ۇڭگىردىڭ سىرتىنا ۇزدىكسىز تاسىپ شىعارۋدا. مەڭگەرۋ بولمەسىندە تەحنيكتەر بار زەيىنىمەن ٴتۇرلى ساندى مالىمەتتەردى باقىلاپ، جۇمىس بارىسىنىڭ حاۋىپسىز، دالمە - ٴدال بولۋىنا كەپىلدىك ەتۋدە. وسى نىسان جۇمىس باستاعاننان بەرى، نىسان توبى دەن قويا ۇيىمداستىرىپ، قاتاڭ جوبالاۋ جانە قۇرىلىس مىندەتىن دالمە - ٴدال اتقارۋ ارقىلى ٴبىر قىدىرۋ تەحنيكالىق قيىن ماسەلەلەر مەن قۇرىلىس جۇرگىزۋدەگى قيىن تۇيىندەردەن ٴساتتى قامال الدى.

موڭعۇلكۇرە - ونسۋ تاس جول نىسانى 1 - مەردىگەرلىك نىسانىنىڭ جالپىلىق كورمە ورتالىعىندا حاۋىپسىزدىك قىزمەتكەرلەرى باقىلاۋ - مەڭگەرۋ ەكرانىنان تۋنەل قازۋ جۇمىسىنىڭ بارىسىن كورۋدە. نىسان ۇجىمى باسقارۋ ۇلگىسى وزىق، جابدىق تەحنولوگياسى جەتىلگەن ”زەردەلى جۇمىس ورنىن“ باسقارۋ جۇيەسىن ەنگىزىپ، زەردەلى باقىلاۋ - مەڭگەرۋ كامەراسى، BDS ورىن بەلگىلەۋ جۇيەسى سياقتىلار ارقىلى قۇرىلىس الاڭىنىڭ كەسكىنىن دەر كەزىندە باقىلاۋ - مەڭگەرۋ ورتالىعىنىڭ ۇلكەن ەكرانىنا جەتكىزىپ، حاۋىپسىزدىك قىزمەتكەرلەرىنىڭ قۇرىلىس الاڭىنىڭ حاۋىپسىزدىگىن باسقارۋىنا كومەكتەستى. 

موڭعۇلكۇرە - ونسۋ تاس جول نىسانى موڭعۇلكۇرە اۋدانىنان باستالىپ، ونسۋ اۋدانىنان اياقتايدى، جالپى ۇزىندىعى 237 كيلومەتر كەلەدى. مۇنىڭ ىشىندە باتىس تيانشان ەرەكشە ۇزىن تۋنەلى تۇتاس لەنياداعى شەشۋشى مەڭگەرۋ سيپاتىنداعى ينجەنەريا، جالپى ۇزىندىعى 15.7 كيلومەتر، موڭعۇلكۇرە - ونسۋ 1 - مەردىگەرلىك نىسان بولەگى ۇستىنە الىپ سالعان تۋنەلدىڭ كىرەر اۋزىنىڭ سول جاعىنداعى ۇڭگىردىڭ ۇزىندىعى 6870 مەتر، وڭ جاعىنداعى ۇڭگىردىڭ ۇزىندىعى 6856 مەتر، جاناما تۋنەلدىڭ ۇزىندىعى 6835 مەتر. مۇندا ”وڭ - سول جاق نەگىزگى تۋنەل + سول جاق بۇيىردەگى جاناما تۋنەل“ سىندى ٴۇش تۋنەل قازۋ جوباسى قولدانىلىپ، وڭ - سول نەگىزگى تۋنەلدە بۇرعىلاپ قوپارۋ ٴادىسى قولدانىلسا، جاناما تۋنەلدە قاتتى تاۋ جىنىسىن قازۋ ماشيناسى (TBM) ىستەتىلىپ، جاناما تۋنەل ارقىلى وڭ - سول جاقتاعى نەگىزگى تۋنەلدىڭ قوسالقى جۇمىس جۇرگىزۋ اۋماعى اشىلىپ، «ۇزىن تۋنەلدى قىسقا مەرزىمدىك قازۋ، قىسقا تۋنەلدى تەز قازۋدى» جۇزەگە اسىرىپ، قۇرىلىس جۇرگىزۋ ونىمدىلىگىن بارىنشا جوعارىلاتتى.

موڭعۇلكۇرە - ونسۋ تاس جولى 1 - مەردىگەرلىك نىسان ٴبولىمى T B M نىڭ باس ينجەنەرى لي گاڭ بىلاي دەدى: قازىرگە دەيىن موڭعۇلكۇرە - ونسۋ تاس جول نىسانىنىڭ باتىس تيانشان ەرەكشە ۇزىن تۋنەلىندە جۇمىس قالپىنا كەلدى، مەجەمەن تومەن تەمپەراتۋرانىڭ ىقپالىنا ۇشىرايتىن جول، كوپىر قۇرىلىس نىساندارىندا 4 - ايدا جاپپاي جۇمىس قالپىنا كەلەدى. قازىر سول جاق تۋنەلدىڭ 743 مەترى، وڭ جاق تۋنەلدىڭ 788 مەترى، جاناما تۋنەلدىڭ 747 مەترى بۇرعىلانىپ جاتىر.

لي گاڭ بىلاي دەدى: نىسان توبىنىڭ ٴبىر جىلدان استام ۋاقىت دەن قويا ۇيىمداستىرۋى ارقىلى 2025 - جىلى باتىس تيانشان ەرەكشە ۇزىن تۋنەلىن سالۋداعى ەڭ ماڭىزدى ورنىقتى وتپەلى كەزەڭى بولماق، ساپاعا، سانعا كەپىلدىك ەتۋ ٴارى حاۋىپسىزدىككە كەپىلدىك ەتىپ، مەڭگەرۋگە بولاتىن العى شارت استىندا، بيىل سول جاق تۋنەل جيىنى 1970 مەتر، وڭ جاق تۋنەل جيىنى 2060 مەتر، جاناما تۋنەل جيىنى 3700 مەتر بۇرعىلانۋى مەجەلەنىپ،  2027 - جىلى اۆتوموبيلدىڭ ٴساتتى قاتىناۋىنا بەرىك نەگىز قالايمىز.

G219 جەلىسى موڭعۇلكۇرە - ونسۋ تاس جول نىسانى سالىنعاننان كەيىن، قۇلجا قالاسىنان اقسۋ قالاسىنا دەيىنگى تاس جولدىڭ قاشىقتىعى 445 كيلومەترگە قىسقارىپ، كۇنى بويى اۆتوكولىك قاتىناۋدى جۇزەگە اسىرىپ، تيانشاننىڭ تۇستىگى مەن تەرىستىگىن تۇتاستىراتىن ماڭىزدى شەكارا جەلىسى جولىنا اينالىپ، اۋىل - قىستاقتى گۇلدەندىرۋدى ىلگەرىلەتۋدە، تۇتاس وڭىرلىك ساياحاتتى جانە شينجياڭ ەكونوميكاسىنىڭ جوعارى ساپالى دامۋىن جەبەۋدە كەلەلى ماڭىز الادى.