تىـلـشـىـلـەرىمـىز حۋاڭ يان، مىڭ شيا، ەرىكتـى ٴتىلشى ٴدىلدار حابارلايدى. ىلە اڭعارىندا تەمپەراتۋرانىڭ بىرتىندەپ جوعارىلاۋىنا ىلەسە، قۇنارلى ەگىس اتىزىندا، قىستاق تۇرعىندارىنىڭ اۋلاسىندا، دۋماندى كوكونىس بازارىندا ”ەڭبەكشىلەردىڭ كوكتەمى ەرتە كەلەر“ دەگەندەي كوكتەمگى ەگىستىڭ قاربالاستىعى باستالىپ كەتكەن.

جاقىندا قۇلجا قالاسىنىڭ قۇديارجۇزى قالاشىعى قوتانتام قىستاعىنداعى مىڭ مۋلىق جۇگەرى ەگىمشىلىگىنەن ۇلگى كورسەتۋ اتىزىندا بەيدوۋ جول جەتەك جۇيەسى قوسىلعان ۇلكەن ات كۇشىندىك تراكتورلار ارلى - بەرلى قايشالىسىپ ٴجۇردى. تۇقىم ٴسىڭىرۋ، دالمە - ٴدال تىڭايتقىش بەرۋ، تامشىلاتىپ سۋارۋ قۇبىرىن جاتقىزۋ سياقتى جۇمىستار دا تارتىپپەن ىستەلۋدە. وسىنداي ”عىلىم - تەحنولوگيا ۇلگىسى“ تولىق قامتىلعان كوكتەمگى ەگىس ناۋقانى تۇتاس جىلدا استىقتان مول ٴونىم الۋدىڭ تاماشا باستاماسى بولماق.

 سۋرەتتە: ەگىمشىلىك كۋرسىنىڭ ناق مايدانى.  حۋاڭ يان فوتوسى 

بيىل قۇلجا قالاسى جۇگەرىنى ”70+40“ سانتيمەتر ارالىقتا ٴجيى ەگۋ تەحنولوگياسىن ٴتۇيىندى تۇردە جالپىلاستىردى. بۇل تەحنولوگيادان پايدالانعاندا قاتار ارالىعىن ساپالىلاندىرۋ ارقىلى جيىلىگىنە، اۋانىڭ الماسۋى مەن كۇن نۇرىنىڭ تۇسۋىنە تەڭ ٴمان بەرىپ، سۋ مەن تىڭعايتقىشتى دالمە - ٴدال مەڭگەرىپ، ەگىس ٴونىمىن جوعارىلاتۋعا بىردەي كەپىلدىك ەتۋگە بولادى.

ديقان لي شيمين تىلشىگە بىلاي دەدى: ”وتكەن جىلى ”70+40“ سانتيمەتر ارالىقتا ٴجيى ەگۋ تەحنولوگياسىن سىناق رەتىندە قولـدانـعاندا ٴار مۋ جەردەن العان ٴونىم 80 دە 90 كيلوگرام ارتتى، بيىل وسى تەحنولوگيانى قولدانۋ كولەمىن 6 مىڭ مۋعا كەڭەيتۋدى جوسپارلاپ وتىرمىز“.

”سىناپ كورۋدەن“، ”تالاسا ەگۋگە دەيىن“، اتالمىش تەحنولوگيانىڭ جالپىلاسۋى كوپتەگەن ديقاندارعا پايدا جەتكىزدى. قۇلجا قالالىق اۋىل شارۋاشىلىعى، اۋىل - قىستاق مەكەمەسى اۋىل شارۋاشىلىق تەحنولوگياسىن جالپىلاستىرۋ پۋنكتىنىڭ باستىعى ۋىن زىليننىڭ تانىستىرۋىنشا، وتكەن جىلى ٴونىم مولشەرىن سىناق رەتىندە ولشەۋ ارقىلى اتالمىش تەحنولوگيانىڭ ٴداستۇرلى ەگىمشىلىك ۇلگىسىمەن سالىستىرعاندا مۋ باسىندىق ٴونىم 50 كيلوگرام ارتقان. بيىل، وسى ”كىرىستى ارتتىرۋ تەحنولوگياسى“ تۇتاس قالاداعى 15 مىڭ مۋ جۇگەرى اتىزىنا جالپىلاستىرىلىپ، ەگىمشىلىك جەر كولەمىنىڭ جارىمىنان استامىنا جەتكىزىلمەك.

كەڭ اتىزدا اۋىل شارۋاشىلىق ماشينالارى گۇرىلدەسە، اۋلالار دا وزگەشە دۋمانعا ەنگەن. چيڭميڭ مەرەكەسىنىڭ الدى - ارتى ٴتۇرلى كوكونىستەر جونىنەن تۇقىم ٴسىڭىرۋدىڭ، كوشىرىپ ەگۋدىڭ تاماشا مەزگىلى. قۇلجا قالاسى بەيجيڭ جولىنداعى اۋىل شارۋاشىلىق - ساۋدا بازارىندا كوكونىس تۇقىمىن ساتاتىن جايمالاردا ادامدار قايشالىسىپ، سۋلى شومىرت، بالدىركوك سياقتى كوكونىس تۇقىمدارىن تۇرعىندار تالاسا - تارماسا ساتىپ الدى. جايماشى ۋاڭ حۋالين بىلاي دەپ تانىستىردى: قازىر كوكونىس ەگەتىن مەزگىل، 4 - ايدىڭ ورتا شەنىنەن باستاپ، قىزاناق، بۇرىش سياقتى كوكونىس مايسالارى ىركەس - تىركەس بازارعا شىعارىلادى.

قالا تۇرعىنى حى شييىڭ جاڭا عانا ساتىپ العان كوكونىس تۇقىمىن الىپ، اۋلاسىنا ەكپەكشى. ول بىلاي دەدى: ”قازىر ساۋمالدىق، كىشكەنە اس جاپىراق سياقتى كوكونىستەردى ەگۋگە بولادى، بىرەر كۇننەن كەيىن قىزاناق، بۇرىش ەكپەكشىمىن“.

قـۇلـجا قالاسى يشيڭ جولىندا تۇراتىن لياڭ يۋەچاڭنىڭ اۋلاسىنا كىرگەندە ول ٴوزى ەككەن ۋسارىمساق پەن اس سۇتتىگەندى سۋارىپ، تىڭايتقىش بەرىپ جاتىر ەكەن. توپىراعى جۇمسارتىلىپ تەگىستەلگەن جەردەن دىمقىل توپىراق ٴيىسى مۇرىنعا كەلەدى.

 سۋرەتتە: قالا تۇرعىنى كوكونىس تۇقىمىن تاڭداپ ساتىپ الۋدا. حۋاڭ يان فوتوسى

داردامتى قالاشىعى ۋاڭدا كوكونىس بازاسى ايرىقشا قاربالاستىققا تۇسكەن. ديقاندار ەككەن قيار قالامشالانىپ، بالدىركوك، ەبەلەك، اسجۋا سياقتى كوكونىس مايسالارى جاپ - جاسىل بولىپ بوي كوتەرگەن، كەيبىرەۋى ورىلىپ بازارعادا شىعىپ تا ۇلگىرگەن.

ٴۇيدىڭ الدى - ارتىنداعى ”كوكونىستىك جەردەن“ ەگىمشىلىك بازاسىنداعى ”كوجە - قاتىق قۇرىلىسىنا“ دەيىن قۇلجا قالاسىنىڭ كوكتەمگى ٴوندىرىس ناۋقانى جاپپاي باستالدى. ۋىن زىلين بىلاي دەدى: ٴبىز جاقىندا دۇمبە ٴبيدايدىڭ ٴوسۋىن حيميالىق جولمەن مەڭگەرۋ جۇمىسىنا تەحنولوگيالىق جاقتان جەتەكشىلىك ەتۋمەن بىرگە، ۇقساماعان ەگىس داقىلدارى مايساسىنىڭ ٴوسىپ - جەتىلۋ جاعدايىنا ۇدايىلانعان تەحنولوگيالىق جەتەكشىلىك ەتۋ قىزمەتىن وتەيمىز.