شينجياڭدىق جىگىت ىزگى نيەتىن ”چۋانچىڭنىڭ“ تىرشىلىك تىنىسىمەن توعىستىردى

　　□ انار بۇلت \ شينجياڭ گازەتىنىڭ ءتىلشىسى سۇڭ حايبو

4 - ايدىڭ 10 - كۇنى جينان قالاسىنىڭ تيانچىڭ جولىنداعى الىم كورىكتى شينجياڭ تاعامجايىندا توناردان شىققان ىستىق لەپكە قوسىلا بۇرقىراي كوتەرىلگەن ءبيدايدىڭ حوش ءيىسى تۇستەن كەيىنگى كوشەدە اڭقىپ تۇر. دۇكەن قوجايىنى الىم ياقۇپ سورەگە جاڭا پىسقان ىستىق ناندى ءتىزىپ جاتىر، ناننىڭ بەتىنە التىنداي جالتىلداعان كۇنجۇت ءدانى قالىڭ جاپسىرىلىپتى.

”2 نان الايىن. الىم، كەشە دۇكەندە جوقسىڭ عوي“؟ - دەدى تۇراقتى قاريدار ۋاڭ حۇڭمەي شۇپەرەك دورباسىن ۇستاپ سورەنىڭ الدىندا نان الۋدى كۇتىپ تۇرىپ.

الىم باسىن كوتەرگەنىمەن جۇمىسىن توقتاتپاي: ”اپەكە، كەشە چيڭداۋعا بارىپ تەكسەرۋ جۇرگىزىپ كەلدىم، 5 - بولىمشە دۇكەنىمدى اشۋعا دايىندالىپ جاتىرمىن“، - دەدى. ول تەمىر ىلمەكپەن توناردان ءبىر ىستىق ناندى ءىلىپ الىپ، تاقتايدىڭ ۇستىنە ”تارس“ ەتكىزىپ قويا سالدى دا ەكەۋى اڭگىمە دۇكەنىن قۇردى.

كوڭىلى تازا، كىسىگە ىستىق ىقىلاستى وسى شينجياڭدىق جىگىتتىڭ جىل باسىندا شىعارعان ”قارىمجى ءدامدى تاعامى“ بەينەجازباسى تۇتاس ينتەرنەتتە كەڭىنەن تارالعان بولاتىن. ”اقشام جەتپەي تۇر“ دەگەن بەيتانىس ادامعا تيتتەي دە ءارى - ءسارى بولماستان تەگىن بەرە سالدى، سونداي - اق وعان وزدىگىنەن سامسا، كاۋاپ، روزا گۇلى شايىن اكەلىپ بەردى. ”مەيلى شىن ايتسا دا، وتىرىك ايتسا دا ونىڭ ءىسى، ال مەيىر سيلاۋ مەنىڭ ءىسىم“، - دەدى الىم.

بۇل ىزگى نيەت پەن قايسارلىق ونىڭ 6 جىلدىق كۇرەس جۇرگىزۋ جولىنا جاسىرىنعان. 2020 - جىلى الىم تۇڭعىش رەت پويەزگە وتىرىپ، تۋعان اۋىلى ءپايزاۋات اۋدانىنا قوش ايتىپ، وتباسىنداعىلاردى ەرتىپ جينانعا كەلىپ شارۋاشىلىق قۇرادى. العاش چۋانچىڭعا كەلگەندە، بەيتانىس ورتادا دۇكەن اشۋعا اسىققان جوق، قايتا الدىمەن اسپازدىق ىستەۋدەن باستاپ، ءبىر جاعىنان، جەرگىلىكتى ورىنداعى ادامداردىڭ تابەتىن ءتۇسىنىپ، ەندى ءبىر جاعىنان، ساۋدا جۇرگىزۋ تاجىريبەسىن توپتادى.

ءبىراق شارۋاشىلىق قۇرۋ جولى ويلاعانىنان الدەقايدا قيىن بولدى، جاڭادان كەلگەن الىم قات - قابات قيىنشىلىققا تاپ بولدى: قارىم - قاتىناس جاساعان كەزدە تىلدەن قينالدى، بار جيعان - تەرگەن 50 مىڭ يۋانىمەن اشقان تۇڭعىش دۇكەنى جارتى جىلعا جەتپەيتىن ۋاقىتتا شاعىلاتىن قۇرىلىس بولىپ شىعىپ، بارلىق ەڭبەگى ەش بولدى. ”سول جىلعى قىستى وتكىزۋىم قاتتى قيىنعا سوقتى، باز كەشىپ اۋىلعا قايتىپ كەتكىم دە كەلدى“، - دەدى الىم.

بۇرىلىس مۇمكىندىگى جينان سىندى وسى قالاداعى ىزگى نيەتتەن كەلدى. ءبىر كونە تۇرعىندار اۋماعىنىڭ قاسىنان الىم ءبىر بولمەلى دۇكەن تاپتى. ءۇي يەسى ونىڭ ىزگى جان ەكەنىن كورىپ، ماياقىسىن ىرىقتىلىقپەن تومەندەتىپ بەردى. ”جىگىتىم، الدىمەن ىستەپ كور، سونان سوڭ ءبىر ءجونى بولار“ دەگەن ءبىر اۋىز جىلى ءسوز ونىڭ قايتا باستاۋىنا جىگەر بەردى. 20 نەشە كۇن قاربالاستانعاننان كەيىن، كىشكەنتاي عانا نان دۇكەنىنەن حوش ءيىس اڭقىدى.

تۇرمىسى ورنىققانىمەن، الايدا الىمنىڭ كوڭىلىندەگى العىس سەزىمى سولعىندامادى. ءار جىلعى شىلىڭگىر شىلدەدە ورتا تازالىعى جۇمىسشىلارىن دۇكەنگە كىرىپ دەمالىپ، سالقىنداپ الۋعا شاقىردى؛ قاقاعان ايازدا بۋى بۇرقىراعان ءبىر شىنى كەسپە كوجەمەن قالانى قورعاپ تۇرعان قولداردى جىلىتتى. جىل اياعىندا ول تاعى قوراپ - قوراپ اقسۋ ءتاتتى الماسىن الىپ، ءۇي - ءۇيدى ارالاپ كورشى - قولاڭىنا بەردى. ”شاندۇڭدىقتاردىڭ ماعان بولعان ىستىق ىقىلاسىن ۇمىتقان ەمەسپىن. ءبىز شينجياڭدىقتار جاقسىلىقتىڭ قارىمجىسىن قايتارۋدى ابدەن بىلەمىز“، - دەدى ول.

بۇگىنگى كۇندە الىم جيناننان 4 بولىمشە دۇكەن اشتى، قول استىندا 40قا جۋىق قىزمەتكەرى بار، كوبى تۋعان اۋىلىنان كەلگەن تۋىس - تۋعان، دوس - جاراندارى. شارۋاشىلىق قۇرۋ جولىندا ول جالعىزسىرامادى، جەرگىلىكتى ورىنداعى سەرىكتەسى جاڭ جينگۋاڭ ونىڭ ەڭ سەنىمدى ”سۇيەنىشىنە“ اينالدى. العاشىندا جاڭ جينگۋاڭ الىمنىڭ قولىنان شىققان شينجياڭ دامىنە قۇمار بولدى، ارالاسا كەلە ەكەۋى اعا - ىنىدەي بولىپ كەتتى. ”ول ادال جان، جۇمىستى تىڭعىلىقتى ىستەيدى، ونىمەن سەلبەسسەم الاڭسىز بولامىن“. بىرنەشە جىل سايكەسۋ ارقىلى سەنىمدىلىك ارامىزداعى ەڭ بەرىك ”قۇندىلىققا“ اينالدى، - دەدى جاڭ جينگۋاڭ.

الىمنىڭ دۇكەنى داميڭحۋ مەن باۋتۋچۋانعا جاقىن بولعاندىقتان، كىسى اياعى ۇزىلمەيدى. ارلى - بەرلى قايشالىسقان ساياحاتشىلار جول - جونەكەي ناعىز ”شينجياڭ ءدامىن“ تاتا الادى. ىرگەلەس وتىرعان 20 جىلدىق ۇساق - تۇيەك بۇيىمدار دۇكەنىن اشقان حان شياۋشي وسى ارانىڭ كونە تۇرعىنى. جايشىلىقتا ول الىمنىڭ دۇكەنىنە قاراسادى، قوقىر - قوقسىعىن جولاي توگە كەتەدى، ۋاقىتشا بالاسىن قاراي تۇرادى. ”الىم كەڭ پەيىل جان، بارلىعىمىز ونى مويىندايمىز“، - دەدى حان شياۋشي.

”شاندۇڭنان ءتىپتى دە كوپ بولىمشە دۇكەن اشىپ، اناعۇرلىم كوپ ادامنىڭ شينجياڭنىڭ ءدامدى تاعامدارىنان اۋىز تيۋىنە، سونداي - اق قىزمەتكەرلەردىڭ اناعۇرلىم جاقسى تۇرمىس كەشىرۋىنە مۇمكىندىك جاساۋدى جوسپارلاپ وتىرمىن“. سىرتتاعى ساپىرىلىسقان قالىڭ جۇرتقا قاراپ تۇرعان الىمنىڭ جانارى جايناپ سالا بەردى.