شينجياڭ گازەتىنىڭ حابارى (ٴتىلشى ران حۋ). جاقىندا اۆتونوميالى رايوندىق قازىنا مەڭگەرمەسى 2026 ـ جىلعى اۋىل شارۋاشىلىعىن قامسىزداندىرۋ اقىسى قوسىمشا قاراجاتىنان 2 ميلليارد 409 ميلليون يۋان ٴتۇسىرىپ، ونى ساياساتتىق اۋىل شارۋاشىلىعىن قامسىزداندىرۋ اقىسى قوسىمشا قاراجاتىنا جۇمسادى. مۇنىڭ ىشىندە ورتالىقتىڭ قوسىمشا قاراجاتى ٴبىر ميلليارد 609 ميلليون يۋان، اۆتونوميالى رايوننىڭ قوسىمشا قاراجاتى 800 ميلليون يۋان. بۇل قارجىنىڭ ٴتۇسىرىلۋى 2026 ـ جىلعى اۆتونوميالى رايوننىڭ اۋىل شارۋاشىلىعى وندىرىسىنە پارمەندى قوزعاۋشى كۇش ۇستەدى.

ورتالىق قازىنا جانە اۆتونوميالى رايوندىق قازىنا ازىرلەگەن قامسىزداندىرۋ اقىسى قوسىمشا قاراجاتى بار اۋىل شارۋاشىلىعىن قامسىزداندىرۋ وبيەكتىلەرى − مەملەكەت جوسپارىنا، حالىق تۇرمىسىنا جانە استىققا، ەكولوگيالىق حاۋىپسىزدىككە ساياتىن باستى كوپ تۇتىناتىن اۋىل شارۋاشىلىق ونىمدەرى، سونداي ـ اق قاتىستى حۇجاتتاردىڭ رۋحىنا نەگىزدەلە وتىرىپ تۇراقتاندىرعان باسقا دا اۋىل شارۋاشىلىق ونىمدەرى؛  جەرگىلىكتى ابزالدىلىققا، ەرەكشەلىككە يە اۋىل شارۋاشىلىق ونىمدەرىنىڭ قامسىزداندىرۋدا قوسىمشا قاراجاتتىڭ ورنىنا سيلىق بەرۋ ساياساتى بويىنشا قولداۋ كورسەتىلەدى.

ناقتى قامسىزداندىرۋ وبيەكتىلەرى: كۇرىش، ٴبيداي، جۇگەرى، ماقتا، كارتوپ، مايلى داقىلدار، قانتتى داقىلدار، ٴۇش ۇلكەن استىق داقىلدارىنان (كۇرىش، ٴبيداي، جۇگەرى) ساپالى تۇقىم جەتىلدىرۋ سياقتى ەگىنشىلىك قامسىزداندىرۋ وبيەكتىلەرىن، مەگەجىن، بورداقىلانعان شوشقا، ساۋىن سيىر سىندى 3 ٴتۇرلى باعىمشىلىق كاسىبىن قامسىزداندىرۋ وبيەكتىسىن قامتيدى. حوتان ايماعىنىڭ، قاشقار ايماعىنىڭ، اقسۋ ايماعىنىڭ، قىزىلسۋ قىرعىز اۆتونوميالى وبلىسىنىڭ جاڭعاعى، شىلانى، ورىگى، ٴجۇزىمى، الماسى، بادامى جەرگىلىكتى ورىننىڭ ابزالدىلىققا، ەرەكشەلىككە يە اۋىل شارۋاشىلىق ونىمدەرىن قامسىزداندىرۋدى قامتاماسىز ەتۋ كولەمىنە ەنگىزىلدى.

ۇعىسۋعا قاراعاندا، ورتالىق قازىنا جانە اۆتونوميالى رايوندىق قازىنا قامسىزداندىرۋ اقىسى قوسىمشا قاراجاتىن بەرەتىن اۋىل شارۋاشىلىعىن قامسىزداندىرۋ جاۋاپكەرشىلىگى نەگىزگى جاراتىلىستىق اپات، دەرت ـ دەربەز، تىشقان، زياندى جاندىك، حايۋاناتتار ىندەتى، توسىن شىرعالاڭ، جابايى حايۋاناتتاردىڭ ٴبۇلدىرۋى سياقتى اۋىر حاۋىپ ـ قاتەرلەردى قامتيدى؛ شارت ـ جاعدايى بار وڭىرلەر ٴونىم مولشەرى، اۋا رايى سياقتى وزگەرىستەردى قامسىزداندىرۋ جاۋاپكەرشىلىگى رەتىندە قاراستىرۋىنا دا بولادى ەكەن.

اۆتونوميالى رايوندىق قازىنا مەڭگەرمەسى اۋىل شارۋاشىلىعىن قامسىزداندىرۋ اقىسى قوسىمشا قاراجاتىن ٴارقايسى ايماق، وبلىس، قالالارعا ٴبولىپ، شارۋالاردى اۋىل شارۋاشىلىعىن قامسىزداندىرۋعا قاتىناسۋعا جەتەكتەپ جانە قولداپ، اۋىل شارۋاشىلىعىن قامسىزداندىرۋدىڭ قامتۋ كولەمى مەن حاۋىپ ـ قاتەردى قامتاماسىز ەتۋ دەڭگەيىن ۇزدىكسىز كەڭەيتىپ، اۋىل شارۋاشىلىعى ٴوندىرىسىن ورنىقتىرىپ، شارۋالاردىڭ كىرىسىن قامتاماسىز ەتەدى. اۆتونوميالى رايوندىق قازىنا مەڭگەرمەسى اۋىل شارۋاشىلىعىن قامسىزداندىرۋ اقىسى قوسىمشا قاراجاتىن باسقارۋدى كۇشەيتىپ، جەر ـ جەردى قامسىزداندىرۋ اقىسى قوسىمشا قاراجاتىنا بەرىلەتىن قارجىنى اتقارۋ اياق الىسىن جەدەلدەتۋگە قۋزاپ، اۆتونوميالى رايوننىڭ اۋىل شارۋاشىلىعىنىڭ باياندى، اقاۋسىز دامۋىنا بەرىك كەپىلدىك ازىرلەيدى.