الۋان گۇلدەر قۇلپىرىپ، اسەم تۇسكە بولەندى، وڭىرلەر، جالپى حالىق بىرگە بايىدى

− ىلە وبلىسى مادەنيەت پەن ساياحاتتى توعىستىرىپ، جوعارى ساپالى دامۋدىڭ كوكتەم سيمفونياسىن اسقاقتاتتى

لۋ جۇڭ، حۋاڭ جيڭ (ٴوز تىلشىلەرىمىز)، پىڭ شياڭميڭ، حاۋ ي - ران، ٴجاننات، ايزۇكىرا، ۇلان (ەرىكتى تىلشىلەر)

4 - ايدا تيانشانعا كوكتەم كەلدى. ىلە اڭعارىندا كوكتەمنىڭ العاشقى سامالى ەسكەندە، قورعاس اۋدانى جۇڭحۋا فۋشوۋشان كورىنىس رايونىنداعى 10 مىڭ مۋلىق گۇل تەڭىزى ىركەس - تىركەس جايقالا اشىلدى، كۇنەس اۋدانى نارات كورىنىس رايونىندا قار - مۇز ەرىپ، تىڭ تىرشىلىك تىنىسى جالىندادى، تەكەس اۋدانىنىڭ ساحاراسىندا جاسىل مانات پەن ۇلتتىق سالت ـ سانا توعىسىپ، شۇعىلا شاشتى. ”گۇل تاماشالاۋ ماۋسىمىنان“ ”ٴتورت ماۋسىمدا دا ساياحاتتاۋعا“ دەيىن، ىلە وبلىسى گۇلدى دانەكەر ەتىپ، مادەنيەت ارقىلى رۋحتى سومداپ، ساياحات ارقىلى كاسىپتى گۇلدەندىرىپ، جوعارى ساپالى دامۋدىڭ كوكتەمىندە ٴان اۋەنىمەن سايكەسە قادام تاستاپ ساپارعا اتتاندى.

جۋىق جىلداردان بەرى، ىلە وبلىسى ”شينجياڭدى ساياحات ارقىلى گۇلدەندىرۋ“ ستراتەگياسىن كۇش سالا اتقارىپ، ”دۇنيە جۇزىلىك دەڭگەيدەگى ساياحات نىسانالى جەرىن قۇرۋ“ نىساناسىن كوزدەپ، 100 ميلليارد دارەجەلى ساياحات كاسىپ سالاسىن جەتىلدىرىپ، زورايتىپ، مادەنيەت پەن ساياحاتتى توعىستىرۋدى تۇتقا ەتتى، ”الۋان گۇلدەر قۇلپىرىپ، اسەم تۇسكە بولەنگەن، وڭىرلەر، جالپى حالىق بىرگە بايىعان“ ايبىندى كارتينا باياۋ كەسكىندەلۋدە.

گۇلدى دانەكەر ەتتى:

”ساياحاتشىلار اعىنىنان“ ”تۇتىنۋ مولشەرىنە“ دەيىن

قورعاس اۋدانى جۇڭحۋا فۋشوۋشان كورىنىس رايونىندا كوكتەم سامالى ەسىپ، گۇل تەڭىزى تولقىندانىپ، حوش ٴيىسى شار تاراپقا تارادى. ساياحاتشىلار بىردە گۇل تەڭىزىندە سەيىل قۇرىپ، ايالداپ سۋرەتكە تۇسسە، بىردە بيىكتەن الىسقا كوز تاستاپ، كوكتەمدەگى اسەم كورىنىستەن مەيلىنشە ٴلاززات الدى.

”ٴبىز حاڭجوۋدان ٴوز كولىگىمىزبەن كەلـدىك، كورىنىس رايونى قازىر جاسىل جەلەك جامىلىپ، ادەمى گۇلدەرمەن جايناپ تۇر ەكەن“، ـ دەدى جىجياڭدىق ساياحاتشى جۋ يۇيتۇڭ قۋانىشى قوينىنا سيماي.

”كوكتەم كەلىسىمەن كورىنىس رايونى ’گۇل ارقىلى ساياحاتتى جانداندىرۋعا‘ كۇش سالىپ، تاۋ گۇلى مەرەكەسىن وتكىزۋ، كورىنىس تاماشالايتىن جاياۋلار جولىن جانە حالىقتىق تۇسەلحانانىڭ سايكەستى قۇرىلعىلارىن كەمەلدەندىرۋ ارقىلى ’ساياحاتشىلار اعىنىن‘ ’تۇتىنۋ مولشەرىنە‘ اينالدىردىق. سونىمەن بىرگە تۇزدە تۇنەۋ، سەيىل - سەرۋەن دەمالىسىن نەگىز ەتكەن 2 - ٴنومىرلى لاگەردى جاڭادان قۇردىق.

كەلەسى قادامدا ٴبىز ىلەنىڭ 100 ميلليارد دارەجەلى مادەنيەت ـ ساياحات كاسىپ سالاسى شوعىرى قۇرىلىسىمەن بار كۇشپەن توعىسىپ، ’گۇل تاماشالاۋ ماۋسىمىنان‘ ’ٴتورت ماۋسىمدا دا ساياحاتتاۋعا‘ قاراي ويىسىپ، كۇتىنۋ، شاڭعى تەبۋ، زەرتتەۋ ـ ۇيرەنۋ سياقتى جاڭا كاسىپ كۇيىن تۇلعالاپ، ’جايقالعان الۋان گۇلدى‘ كوز مەيىرىن قاندىرار كورىنىس قانا ەمەس، كوڭىل توعايتار كاسىپ كوزىنە اينالدىرامىز“ دەپ تانىستىردى قورعاس اۋدانى جۇڭحۋا فۋشوۋشان كورىنىس رايونىنىڭ جاۋاپتىسى ليۋ بو.

فۋشوۋشان بۇلدىرگەن مادەنيەت - ساياحات باقشاسىندا، جياڭسۋدىڭ ىلە وبلىسىنا باعىتتامالى كومەكتەسۋ الدىڭعى شەپ قولباسشىلىق شتابىنىڭ جەبەۋىندە، ياڭجوۋ داشۋەسى تەحنولوگيالىق تىرەكپەن قامداعان ”كەڭىستىكتەگى بۇلدىرگەن“ نىسانى دا جۇرتتىڭ نازارىن اۋداردى. زەردەلى جىلىجايدا توپىراقسىز ٴوسىرۋ جانە سۋ مەن تىڭايتقىشتى ٴبىر تۇلعالاندىرۋ جۇيەسى ارقىلى ەگىلگەن بۇلدىرگەننىڭ جايقالا وسكەن بەينەسى كوڭىل قۋانتادى.

”ياڭجوۋ داشۋەسىنىڭ قولداۋىندا، تەمپەراتۋرا، ىلعالدىق، سۋ، تىڭايتقىش سالىستىرماسى سياقتى ساندىق مالىمەتتەردى ۇزدىكسىز ساپالىلاندىرۋ ارقىلى بۇلدىرگەننىڭ ٴتۇسىمىن ورنىقتىردىق، ٴدامى دە ٴتىل ۇيىرەدى. قازىرگە دەيىن 10 مىڭنان استام ساياحاتشىنى تەرۋگە باۋرادى“، - دەدى فوشوۋشان بۇلدىرگەن مادەنيەت - ساياحات باقشاسىنىڭ تەحنولوگيالىق جاۋاپتىسى لي جۋاڭ.

گۇل تەڭىزىنە قاناتتاس وتىرىپ تا كىرىس كىرگىزۋگە بولادى، جەرگىلىكتى بۇقارا دا مۇنىڭ ٴدامىن تاتۋدا. ”گۇل اشقان مەزگىلدە كورىنىس ٴوڭىرىنىڭ ماڭىنداعى قىستاق تۇرعىندارى شارۋالار شاتتىعى ساياجايىن اشۋ ارقىلى بۇلدىرگەن قويمالجىڭى، جەمىس قاعى سياقتى جەرگىلىكتى ەرەكشە ونىمدەردى ساتىپ، وتباسىلارىنىڭ جىلدىق ورتاشا كىرىسى 30 مىڭ يۋاننان 40 مىڭ يۋانعا دەيىن ارتتى“، - دەدى ليۋ بو.

گۇلدى دانەكەر ەتىپ، اۋىل شارۋاشىلىعىن جەبەپ، بىرگە اۋقاتتاندى. قورعاس اۋدانى داشيگۋ قالاشىعى جۇڭحۋا فۋشوۋشان كورىنىس رايونىنا سۇيەنىپ، ەرەكشەلىگى ايقىن، كاسىپ كۇيى باي اۋىل ـ قىستاق ساياحات ماركاسىن تۇلعالادى.

داشيگۋ قالاشىعى پارتكومىنىڭ ورىنباسار شۋجيى، ۇگىت القاسى شياۋ رۇڭحۋا بىلاي دەپ تانىستىردى: ”داشيگۋ قالاشىعى ’قىستاق كوللەكتيۆى + سەلبەستىك كووپەراتيۆى + قىستاق تۇرعىندارى‘ سىندى سەلبەستىك ۇلگىسى ارقىلى بۇلدىرگەن مادەنيەت - ساياحات باقشاسىن، وزىندىك ەرەكشەلىككە يە 35 حالىقتىق تۇسەلحانا جانە 20 تۇنگى جۇلدىز تاماشالاۋ شاتىرىن سالىپ، اس - سۋ، جاتىن ورىن، ساياحات، زات ساتىپ الۋ، كوڭىل اشۋ ٴبىر تۇلعالانعان اۋىل شارۋاشىلىعى، مادەنيەت، ساياحات توعىسقان جاڭا كاسىپ كۇيىن قالىپتاستىردى. بيىل جاڭادان پايدالانۋعا بەرىلگەن دالادا تۇنەۋ بازاسى مەجەمەن 4 ـ ايدىڭ سوڭىندا جۇمىس باستايدى، ساياحاتشىلار ’تاپسىرىس بەرۋ فورماسى‘ ارقىلى ۆەلوسيپەد ٴمىنۋ، كوكپار تارتۋ، كەستە تىگۋ سياقتى قيمىلدار ارقىلى سەزىنۋ اسەرىن ونان ارى بايىتادى“.

يوۋجياڭ بۋلو حالىقتىق تۇسەلحاناسى داشيگۋ قالاشىعىنداعى 35 حالىقتىق تۇسەلحانانىڭ ٴبىرى. ”بۇرىن ٴبىر جىلدىڭ وزىندە ماردىمدى كىرىس كىرگىزە المايتىنبىز. قازىر كورىنىس ٴوڭىرى دۋمانعا بولەندى، گۇل اشۋ مەزگىلى كەلىسىمەن تۇسەلحانامىزعا الدىن الا تاپسىرىس بەرگەن ساياحاتشىلاردىڭ سانى كوبەيىپ، اپتا سوڭىندا قونالقى ورىن تابۋ قيىنعا تۇسەدى. گۇل ارقىلى ساياحاتتى دامىتۋ بىزگە شىنايى پايدا جەتكىزدى“، ـ دەدى يوۋجياڭ بۋلو حالىقتىق تۇسەلحاناسىنىڭ جاۋاپتىسى سۋ حۋا كۇلىمسىرەي.

كورىنىس رايونىنىڭ ساپاسى جوعارىلاتىلدى:

نارات شىت جاڭا ومىرشەڭدىك كۇشكە يە بولدى

ىلەدە كوكتەم لەبى ەسىپ، مادەنيەت پەن ساياحاتتى توعىستىرا دامىتۋ اياق الىسى جەدەلدەدى. كۇنەس اۋدانى نارات كورىنىس رايونىنىڭ دارەجەسىن جوعارىلاتىپ جاڭالاۋدى ٴتۇيىن ەتىپ، قىزمەت وتەۋ جاعىندا كۇش سالا ەگجەي ـ تەگجەيلى ىستەپ، قىزمەت وتەۋ ساپاسى جاعىندا دالمە ـ ٴدال كۇش سالىپ، 5A دارەجەلى وسى كورىنىس رايونىنىڭ شىت جاڭا ومىرشەڭدىك كۇشىن تاسقىنداتتى. 3 - ايدىڭ 25 - كۇنى نارات كورىنىس رايونىنىڭ جاڭا ساياحاتشىلارعا قىزمەت وتەۋ ورتالىعىندا ”ناراتتاعى قىزىقتى كەزدەسۋ“ نەگىزگى تاقىرىبىنداعى بەيزاتتىق مادەنيەت مۇرالارى مادەنيەت جاسامپازدىق ونىمدەرى، ەرەكشەلىككە يە شاعىن ساۋعالار سياقتى ونىمدەر كوزدىڭ جاۋىن الدى؛ كورىنىس تاماشالاۋ اۆتوكولىگىن كۇتۋ بەكەتىندە ساياحاتشىلار تارتىپپەن قاتارعا تۇرىپ، كۋالىكتەرىن تەكسەرۋدەن وتكىزىپ، باقشاعا كىرۋدە، قىزمەتكەرلەر كۇدىكتى ماسەلەلەرگە شىن ىقىلاسپەن جاۋاپ بەردى، كوكتەمگى ساياحات جاعدايىنىڭ بەتالىسى ورنىقتى ٴارى جاقسى بولدى.

”ەرەكشە قۋانىپ وتىرمىن، كورىنىس رايونى جاڭالانعاننان كەيىن قۇرىلعىلاردىڭ قىزمەت وتەۋى توتەنشە تياناقتى بولعانىن سەزىندىم، دەمالىس رايونى، تازالىق بولمەسى دە وتە تازا ەكەن، ساياحاتىم وتە كوڭىلدى بولدى، كەلەسى جولى تاعى دا كەلەمىن“، - دەدى حۋناندىق ساياحاتشى شياڭ ياڭ.

نارات كورىنىس رايونىن باسقارۋ كوميتەتى ساياحاتتى دامىتۋدى باسقارۋ مەكەمەسىنىڭ باستىعى، قۇرىلىس مەكەمەسىنىڭ باستىعى مي يۇي بىلاي دەدى: ”وتكەن ٴبىر جىلدا، ٴبىز نارات . نيانحۋاۋان قايىڭدىساي ۇلتتىق سالت - سانا ساياجايى، جينليڭ ساياجايىنىڭ 3 - مەرزىمدىك قۇرىلىسى، اقوزەن جايلاۋىنان كولدەنەڭگە دەيىنگى كوش جولى، وزەن اڭعارىنداعى جاياۋلار جولى، قايىڭدىساي شاڭعى تەبۋ، دەمالىس رايونى سياقتى ٴتۇيىندى نىسان قۇرىلىستارىن تامامدادىق. نىسان ىسكە قوسىلعاننان كەيىن، كورىنىس رايونىنىڭ ساياحاتشىلاردى قابىلداۋ قۋاتى، قىزمەت وتەۋ قابىلەتى جانە حاۋىپسىزدىكتى قامتاماسىز ەتۋ دەڭگەيى ٴونىمدى جوعارىلاتىلىپ، ٴتورت ماۋسىمدىق ساياحاتتاعى ولقىلىقتار تولىقتاندى. بيىل ٴبىز ’حاۋىپسىز كورىنىس رايونىن تۇلعالاۋ، مادەنيەت ارقىلى رۋح سومداۋ، عىلىم - تەحنولوگيا ارقىلى قۋات ۇستەۋ، كاسىپ سالاسىن سايكەستىرۋ‘ بەتالىسىن ارقاۋ ەتىپ، تيانجيەتاي اۆتوكولىك توقتاتۋ الاڭى، كورىنىس رايونى ساياحات دارەتحاناسى جانە بەلگى تاقتالارى، شىعىس قاقپا ۇلكەن كوپىرى، اقوزەن جايلاۋى جولىن كەڭەيتۋ، تيانمۋتاي جەر استى جولى، كوشپەندى مالشىلارعا جالپىلىق قىزمەت وتەۋ ٴتۇيىنى سياقتى ٴتۇيىندى ينجەنەريا قۇرىلىستارىن ىلگەرىلەتىپ، ’ناراتتاعى قىزىقتى كەزدەسۋ‘ مادەنيەت جاسامپازدىق ونىمدەرىن كەمەلدەندىرىپ، ساحارا دالالىق سپورت سالتاناتى، نارات مۋزيكا فەستيۆالى سياقتى ماركالى قيمىلداردى ۇزدىكسىز وتكىزىپ، بۇكىل ەلدىڭ جەر - جەرىنەن كەلگەن ساياحاتشىلاردى اناعۇرلىم ساپالى قىزمەت وتەۋمەن قارسى الامىز“.

كورىنىس رايونىنىڭ ساپاسىن جوعارىلاتۋمەن بىرگە، نارات . نيانحۋاۋان قايىڭدىساي ۇلتتىق سالت - سانا ساياجايى دا ٴبىر ۋاقىتتا دارەجەسى جوعارىلاتىلىپ، ساپالىلاندىرىلدى. ساياجايعا 58 ەرەكشە اۋلا، 326 قوناق بولمە ورنالاستىرۋ جوبالانىپ، 8 ۇلكەن نەگىزگى تاقىرىپتىق قونالقى كەڭىستىگى تۇلعالانعان. وزىندىك ەرەكشەلىككە يە حالىقتىق تۇسەلحانا مەن جاقىن ماڭداعى قارلى تاۋ ٴبىر - بىرىنە كورىك قوسىپ، قازجۋا نەگىزگى تاقىرىپتىق الاڭى توڭىرەكتەگى جاراتىلىستىق كورىنىستەرمەن ٴبىر تۇلعالانىپ، ساياحات سەيىل ورتاسىن ونان ارى بايىتىپ، قىزمەت وتەۋ يقۋاتى دا ۇزدىكسىز كەمەلدەندى. بۇل ارادا ۇلتتىق سالت ـ سانانى سەزىنۋ جانە سەيىل ـ سەرۋەن، دەمالىس يقۋاتى بار، ٴبىر بەكەتتىك سايكەستى قۇرىلعىلارى تولىق بولىپ، ساياحاتشىلاردىڭ ساحارا تۇرمىسىن سەزىنەتىن تاماشا جەرىنە اينالدى.

ساياجايدىڭ ساتۋ قىزمەتىنە جاۋاپتى ديرەكتورى جاي دۇڭبو بىلاي دەدى: ”بيىل كوكتەمگى ساياحاتقا مەڭزەس، ٴبىز الاۋ ساۋىق كەشى، بەيزاتتىق مادەنيەت مۇرا قولونەرى، ناراتتا وتباسىلارىن ارالاۋ سياقتى سالت - سانانى سەزىنۋ قيمىلدارىن ۇيىمداستىردىق، سونداي - اق كورىنىس رايوندارىمەن بىرلەسە قيمىلداپ، تەگىن قىزمەت وتەۋمەن قامداپ، بۇرىنعى ٴبىر كۇندىك سەزىنۋ ساياحاتىن 2 - 3 كۇندىك ساياحاتقا ۇزارتتىق“.

مادەنيەت ارقىلى رۋح سومدادى:

تەكەستە كوكتەمگى ساياحاتتىڭ ومىرشەڭدىك كۇشى تاسقىندادى

ەرەكشە ساياحات ونىمدەرىنىڭ ۇزدىكسىز مولايۋىنا، قىزمەت وتەۋ ساپاسىنىڭ ۇزدىكسىز جوعارىلاۋىنا بايلانىستى، تەكەس اۋدانىنىڭ كوكتەمگى ساياحات بازارىنىڭ ومىرشەڭدىك كۇشى تولىق ايگىلەندى. بيىل جىل باسىنان بەرى، اۋدان بويىنشا ساياحاتشى قابىلداۋ مولشەرى سايكەس مەزگىلىندەگىدەن %9.74 ارتتى، ساياحاتشىلار كوكتەم مەزگىلىندە تەكەسكە بارىپ، ساحارا كوركىن تاماشالاپ، ۇلتتىق سالت ـ سانادان كوزايىم بولىپ، تاماشا ساتتەن ٴلاززات الدى.

تەكەس اۋدانى شولاقتەرەك قالاشىعى اتشابىس قىستاعىندا مەملەكەتتىك A دارەجەلى ساياحات حالىقتىق تۇسەلحانا سايليس اۋلاسى جىلى شۋاققا شومدى.

”وسى ماۋسىمدا سەگىز تاڭبالى قالاشىققا بارىپ، باعدار شامى جوق ’ٴتىلسىم سارايدى‘ كورگىم كەلىپ ەدى. قاراجون جايلاۋىنان وسى ماۋسىمدا قاردى دا كورۋگە بولادى ەكەن، شىنىندا تاڭعالارلىق ٴىس“، - دەدى شاڭحايلىق ساياحاتشى ۋاڭ جيدۇڭ.

سايليس حالىقتىق تۇسەلحاناسىنىڭ جاۋاپتىسى جاۋ ۋيجيە بىلاي دەپ تانىستىردى: ”ٴبىز قوناقتارعا ساياحات جونىندە كەڭەس بەرىپ، ولاردى ٴتۇرلى بالكۇلشە جانە شايمەن قامدايمىز. حالىقتىق تۇسەلحانانىڭ جوبالانۋى شينجياڭ ۇلگىسىمەن توعىسقان، مۋزيكا ساۋىعى سياقتى قيمىلداردى ۇيىمداستىرىپ، ساياحاتشىلارعا ٴتىپتى دە ساپالى قىزمەت وتەيمىز“.

بيىل كوكتەمدە تەكەس اۋدانى ”مادەنيەت + ەكولوگيا“ سىندى ەكى جاقتى مىقتى يگەرۋگە تاباندى بولىپ، كوكتەمدە گۇل تاماشالاۋ ساياحاتى، ساحاراداعى اتا ـ انالار مەن بالالاردىڭ زەرتتەۋ ـ ۇيرەنۋ ساياحاتى سياقتى سارا لەنيالاردى العا قويىپ، يجيڭ مادەنيەت باقشاسىمەن بىرلەسىپ، ساحارانىڭ سىرىنا ٴۇڭىلىپ، بەيزاتتىق مادەني مۇرالاردى زەرتتەۋ، ۇلتتىق سالت ـ سانالىق قولونەر سياقتى ىشكەرىلەي سەزىنۋ نىساندارىن اشتى. ساياحاتشىلار اقتاس قىز شوقىسىندا سەيىلدەپ، قارلى تاۋ مەن گۇل تەڭىزى توعىسقان عاجايىپ كورىنىستەن ٴلاززاتتانا الادى، كيىز ٴۇي تىگۋ، دومبىرا شەرتۋ سياقتى ٴداستۇرلى ۇلتتىق سالت ـ سانا قيمىلدارىنا قاتىناسا الادى، سونداي ـ اق بەيزاتتىق مادەنيەت مۇرالارىن جالعاستىرۋ، كەستە تىگۋ سياقتى ۇلتتىق سالت ـ سانا شەبەرلىك بۇيىمدارىن ٴوز قولىمەن جاساۋدى سەزىنىپ، ”كورۋگە بولاتىن، ويناۋعا بولاتىن، سەزىنۋگە بولاتىن“ ديناميكالىق ساپار بارىسىندا تەكەستىڭ ەكولوگيالىق كوركەمدىگى مەن مادەنيەت قاتپارىن جان ـ جاقتى اڭعارادى.

تەكەس اۋداندىق مادەنيەت ـ ساياحات مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى شاۋ حۇي مىنالاردى ٴبىلدىردى: ”كەلەسى قادامدا ٴبىز مادەنيەت پەن ساياحاتتىڭ توعىسۋىن ۇزدىكسىز تەرەڭدەتىپ، ونىمدەرمەن قامداۋدى مولايتىپ، قىزمەت وتەۋ ساپاسىن جوعارىلاتىپ، اناعۇرلىم كوپ ساياحاتشىنىڭ تەكەسكە كەلۋىنە، تەكەستى ۇناتۋىنا مۇمكىندىك جاساپ، كوكتەمگى ساياحاتتى ۇزدىكسىز ورلەۋگە كوتەرەمىز.“

قورعاس اۋدانى جۇڭحۋا فۋشوۋشان كورىنىس رايونىنىڭ گۇل تەڭىزىنەن كۇنەس اۋدانى نارات كورىنىس رايونىنىڭ دارەجەسىن جوعارىلاتۋعا، ودان تەكەس اۋدانى سەگىز تاڭبالى قالاشىعىنىڭ مادەنيەت ارقىلى نارلەندىرۋىنە دەيىن، ىلە وبلىسى ”شينجياڭدى ساياحات ارقىلى گۇلدەندىرۋ“ ستراتەگياسىن جەتەكشى ەتىپ، دۇنيە جۇزىلىك دەڭگەيدەگى ساياحات نىسانالى ورنىن قۇرۋدى نىق قاداممەن جەدەلدەتۋدە. ”گۇلدى دانەكەر ەتۋ، مادەنيەت پەن ساياحاتتى توعىستىرۋ، اۋىل شارۋاشىلىعىن جەبەپ، بىرگە اۋقاتتانۋ“ سىندى جوعارى ساپالى دامۋ جولى كوكتەمنىڭ اياق الىسىمەن ەكپىندەي ىلگەرىلەۋدە.