الەمدىك دەڭگەيدەگى تەحنولوگيالىق قيىن ماسەلەلەردەن قامال الىندى
موڭعۇلكۇرە - ونسۋ تاس جولى باتىس تيانشان تۋنەلىنىڭ كىرە بەرىسى جۇمىسىندا تاعى دا تىڭ ناتيجەگە قول جەتكىزىلدى
ٴتىلشىمىز لي يافىڭ حابارلايدى. جۋىقتا ٴتىلشىنىڭ جۇڭگو قاتىناس قۇرىلىسى موڭعۇلكۇرە - ونسۋ 1 ـ مەردىگەرلىك بولىگى نىسانى بولىمىنەن ۇعىسۋىنشا، وسى نىسان ٴبولىمى سالاتىن باتىس تيانشان تۋنەلىنىڭ كىرە بەرىسىندەگى تەگىس وتكەلەك ۇڭگىرىنىڭ جالپى ارالىعى 5007 مەترگە جەتىپ، 2380 مەتر تەرەڭگە ٴساتتى جەتكەن. بۇل دۇنيە جۇزىلىك دەڭگەيدەگى وسى تۋنەل قۇرىلىسىندا كەزەڭدىك كەلەلى تابىستارعا قول جەتكىزىلىپ، G219 جەلىسىندەگى موڭعۇلكۇرە - ونسۋ تاس جولىنىڭ تۇتاس جەلى بويىنشا تۇتاستىرىلۋىنا بەرىك نەگىز قالانعاندىعىن كورسەتەدى.
G219 جەلىسىنىڭ موڭعۇلكۇرە - ونسۋ تاس جول بولىگىندەگى باتىس تيانشان تۋنەلىنىڭ كىرە بەرىسى. لي يافىڭ فوتوسى
مەملەكەتتىڭ باتىس بولىك شەكارا بويىنداعى ٴىرى ارنالاردىڭ شەشۋشى ٴتۇيىنى بولعان G219 جەلىسىنىڭ موڭعۇلكۇرەدەن ونسۋعا دەيىنگى تاس جول بولىگى سولتۇستىكتە ىلە وبلىسى موڭعۇلكۇرە اۋدانىنىڭ شاتى قىرعىز اۋىلىنان باستالىپ، وڭتۇستىكتە اقسۋ ايماعىنىڭ ونسۋ اۋدانىنا دەيىن جالعاساتىـن، تـيانـشان تاۋ سـىلەمـىن ەندەي ٴوتىپ، وڭتۇستىك - سولتۇستىك شينجياڭدى تۇتاستىراتىن ماڭىزدى جاڭا ارنا. مۇنىڭ ىشىندە باتىس تيانشان تۋنەلى تۇتاس جەلىدەگى وزەكتى وتكەلەكتىك مەڭگەرۋ سيپاتتى ينجەنەريا بولىپ، جالپى ۇزىندىعى 15.7 كيلومەتر، ول ەلىمىزدەگى مۇزدىقتى كەسىپ وتكەن تۇڭعىش تاس جول تۋنەلى ٴارى قازىر دۇنيە ٴجۇزى بويىنشا تەرەڭدىگى ەڭ ۇلكەن تاس جول تۋنەلى. نارات وپىرىلمالى بەلدەۋى مەن ەرەكشە تەرەڭدىكتەگى گەولوگيالىق شارت - جاعدايدىڭ شەكتەۋىنە ۇشىراعاندىقتان، بۇل تۋنەلدە قۇرىلىس جۇرگىزۋ وتە قيىن بولىپ، قۇرىلىس جۇرگىزۋ بارىسىندا كوپ ٴتۇرلى تەحنولوگيالىق سىن - سايىسقا ٴدوپ كەلدى.
نىسان قۇرىلىس جۇمىسىن باستاعاننان بەرى جۇڭگو قاتىناس قۇرىلىسى موڭعۇلكۇرە - ونسۋ 1 ـ مەردىگەرلىك بولىگى نىسانى ٴبولىمىنىڭ قۇرىلىسشىلارى تيانشان تاۋىنىڭ تەرەڭ قويناۋىنا تامىر تارتىپ، مۇزدىق گەولوگياسى، بەرىك قاتتى جىنىس قاباتى سياقتى قۇرىلىس جۇرگىزۋدەگى قيىن ماسەلەلەرگە بەتپە ـ بەت كەلىپ، عىلىم ـ تەحنولوگيا قۋاتىنا سۇيەنىپ، قامال الۋ جۇمىسىن ورىستەتىپ، ٴتۇرلى قۇرىلىس جۇرگىزۋدەگى بوگەتتەردى ٴونىمدى شەشتى.
جۇڭگو قاتىناس قۇرىلىسى موڭعۇلكۇرە - ونسۋ 1 ـ مەردىگەرلىك بولىگى نىسانىنىڭ باس ينجەنەرى لي گاڭ بىلاي دەپ تانىستىردى: قازىر تەگىس وتكەلەك ۇڭگىرى 2380 مەتر تەرەڭدىكتەگى ەڭ تەرەڭ جەرگە دەيىن قازىلىپ، قۇرىلىس جۇرگىزۋ بارىسىندا الدىن الا تۇجىرىمدالعان كۇشتى جارىلۋ جايتى تۋىلمادى، ٴبىراق قايتا ـ قايتا وپىرىلۋ جانە جۇمساق جىنىستاردىڭ جينالۋى سياقتى گەولوگيالىق قيىن ماسەلەلەرگە ٴدوپ كەلدىك.
نىسان ٴبولىمى جەڭىل تۇرپاتتى بولات قۇبىر جۇمىس تەحنولوگياسىن قولدانىپ، ەڭ ۇلكەن تەرەڭ قازۋ جۇمىسىن ٴونىمدى، حاۋىپسىز ورىنداپ، ەلىمىزدىڭ تاس جول تۋنەلى قۇرىلىسىنىڭ تەحنولوگيالىق قۋاتى مەن قۇرىلىس جۇرگىزۋ دەڭگەيىن ايگىلەدى.
3 - ايدىڭ 25 - كۇنى جۇڭگو قاتىناس قۇرىلىسى موڭعۇلكۇرە - ونسۋ 1 ـ مەردىگەرلىك بولىگى نىسانىندا كەزەڭدىك جۇمىس قالپىنا كەلتىرىلىپ، ٴتۇرلى قۇرىلىس قىزمەتتەرى تارتىپپەن ىلگەرىلەتىلىپ، قارقىنى تەزدەپ، ونىمدىلىگى ارتتى.
جۇڭگو قاتىناس قۇرىلىسى موڭعۇلكۇرە - ونسۋ 1 ـ مەردىگەرلىك بولىگى نىسانى ٴبولىمىنىڭ وندىرىسكە جاۋاپتى ورىنباسار ديرەكتورى ليۋ يۇيشىڭ تىلشىگە بىلاي دەدى: قازىر تەگىس وتكەلەك ۇڭگىرىنەن تاعى 715.8 مەتر قازۋ مىندەتى بار، نەگىزگى ۇڭگىردىڭ 4 جۇمىس اۋماعى اشىلدى، جەكە ۇڭگىردىڭ جالپى ۇزىندىعى 2080 مەترگە جەتەدى. 6 - ايدا ”موڭعۇلكۇرە ٴنومىرلى“ قاتتى تاۋ جىنىستارىن قازۋ ماشيناسى قازۋ جۇمىسىن تامامداعان سوڭ، نەگىزگى ۇڭگىردىڭ ەڭ سوڭعى جۇمىس اۋماعىن اشىپ، ”ۇزىن تۋنەلدى قىسقا ۋاقىتتا قازۋ، قىسقا تۋنەلدى جىلدام قازۋ“ قۇرىلىس ۇستانىمىن شىنايى جۇزەگە اسىرىپ، قۇرىلىس قارقىنىن تەزدەتۋدى جوسپارلادىق. ۇڭگىر سىرتىنداعى ينجەنەريا جاعىندا، تۇتاس جەلىدەگى كوپىر نەگىزى، سۋ اعار ينجەنەرياسى جانە جول تاعانىن قازۋ سياقتىلار جاپپاي قالپىنا كەلتىرىلدى، قالعان ارقالىقتى الدىن الا جاساۋ جانە قورعاۋ ينجەنەرياسى ماۋسىمدىق فاكتوردىڭ ىقپالىنا ۇشىراعاندىقتان مەجەمەن وسى ايدىڭ ورتا شەنىندە جاپپاي جۇمىس باستاماقشىمىز.
باتىس تيانشان تۋنەلىن 2027 - جىلى تۇتاستىرۋ جوسپارلانۋدا، سالىنىپ بولىپ كولىك قاتىناعاننان كەيىن، وڭتۇستىك - سولتۇستىك شينجياڭنىڭ قاتىناس قامالىن ىركىلىسسىزدەندىرىپ، وڭتۇستىك - سولتۇستىك شينجياڭنىڭ ۋاقىت جانە كەڭىستىك ارالىعىن قىسقارتىپ، جەلى بويىنداعى بايلىقتى اشۋدىڭ، ساياحات كاسىپ سالاسىنىڭ بىرگە دامۋىن ىلگەرىلەتىپ، وڭتۇستىك شينجياڭ مەن سولتۇستىك شينجياڭنىڭ جاڭا كۇرە تامىرىن قالىپتاستىرىپ، كۇنى بويى قاتىناپ، شينجياڭنىڭ ەكونوميكاسى مەن قوعامىنىڭ جوعارى ساپالى دامۋىنا قۋاتتى قاتىناس قوزعاۋشى كۇشىن قوسادى.