جياڭسۋ ولكەسى ەمدەۋ جاعىنان شينجياڭعا كومەكتەسۋ بارىسىندا بۇقارانىڭ ىرگەسىنەن ”تىرشىلىك قورعانىس شەبىن“ قۇردى
− جياڭسۋ نەگىزگى اقپارات مەديالارى تىلشىلىك ۇيىرمەسىندەگىلەردىڭ ىلەنى ارالاعاندىعى جونىندەگى جەلىلەس حابار (3)
تىلشىلەرىمىز ۋاڭ جىحۋا، جاڭ لياڭ، دۋ لەي، اراي
تاياۋدا موڭعۇلكۇرە اۋداندىق حالىق شيپاحاناسىنىڭ وپەراتسيا بولمەسىندە جياڭسۋ ولكەسى تايجوۋ قالاسىنىڭ 11 - توپتا شينجياڭعا باعىتتامالى كومەكتەسۋ ەمدەۋ ۇجىمىنىڭ باستىعى، اۋداندىق حالىق شيپاحاناسىنىڭ ورىنباسار باستىعى ۋاڭ بين ەكرانعا قادالا قاراپ، قولىنداعى وتكىزگىش سىمدى توسىلعان قان تامىردان دالمە ـ ٴدال وتكىزىپ، ٴبىر تىرەۋىشتى ورنىقتى قويدى. جۇرەك بۇلشىق ەتى شۇعىل ولەتتەنگەن 62 جاستاعى قارت جياڭسۋ ماماندارىنىڭ شيپالى قولىمەن امان قالدى.
”قازىر قالايسىز؟ تاعى دا جايسىزدانىپ جاتقان جەرىڭىز بار ما؟“ سول كۇنى تۇستە ۋاڭ بين تاعى دا اۋرۋ توسەگىنىڭ الدىنا كەلدى. ول ەڭكەيىپ كەلىپ اقىرىن جاعدايىن سۇرادى، ناۋقاس باياۋ باسىن يزەپ، ارت - ارتىنان العىس ايتتى. ىلە اڭعارىنداعى شيپاحانالاردا مۇنداي جاعداي ۇنەمى كەزدەسىپ تۇرادى.
سۋرەتتە: موڭعۇلكۇرە اۋداندىق حالىق شيپاحاناسىنان شينجياڭعا كومەككە كەلگەن شيپاگەرلەر ناۋقاسقا اسقازان ايناسىمەن تەكسەرۋ جۇرگىزۋدە. سۋرەتتى ۋاڭ جىحۋا تۇسىرگەن
موڭعۇلكۇرە اۋدانىنان قۇلجا قالاسىنا ماشينامەن 3 ساعاتتا جەتۋگە بولاتىن، ىلەدەگى ەمدەۋ بايلىعى ٴبىرشاما ٴالسىز وڭىرلەردىڭ ٴبىرى. ”بۇرىن جۇرەك بۇلشىق ەتى ولەتتەنۋ، مي ولەتتەنۋ سياقتى اۋرۋلارعا شالدىققانداردى تەك قۇلجا قالاسىنداعى شيپاحانالارعا جەتكىزەتىن ەدىك“ دەدى موڭعۇلكۇرە اۋداندىق حالىق شيپاحاناسىنىڭ باستىعى ۋاڭ شينحۋا. تايجوۋ قالاسىنان شينجياڭعا كومەككە كەلگەن ەمدەۋ ۇيىرمەسى شينجياڭعا ”ۇيىرمە ۇلگىسىندە“ جانە ”شاعىن ۇيىرمە“ بويىنشا قىسقا مەرزىمدىك كومەكتەسۋ، يكەمدى كومەكتەسۋ سياقتى كوپ ٴتۇرلى تاسىلدەر ارقىلى ساپالى ەمدەۋ بايلىعىن ۇزدىكسىز تومەنگە ٴتۇسىردى. 2023 - جىلدان 2025 - جىلعا دەيىن شيپاحانا امبولاتورياسىندا ەمدەلۋشىلەردىڭ مولشەرى 130 مىڭ ادام - رەتتەن 190 مىڭ ادام - رەتكە كوبەيدى، 3 -، 4 - دارەجەلى كۇردەلى وپەراتسيالاردى جاساۋ سالىستىرماسى %67 كە جوعارىلادى.
ەمدەۋ جاعىنان شينجياڭعا كومەكتەسۋدە ”تەحنولوگيا“ دا، ”جابدىق“ تا تارتۋ ەتتى. 2025 - جىلدىڭ سوڭىندا موڭعۇلكۇرە اۋداندىق حالىق شيپاحاناسىنا جۇڭگو كوكىرەك اۋرۋلارى ورتالىعى وداعى جاعىنان ”مەملەكەتتىك كوكىرەك اۋرۋلارى ورتالىعى (نەگىزگى ساتى نۇسقاسى)“ دەگەن بەلگى تاقتاسى رەسمي بەرىلدى.
شينجياڭعا باعىتتامالى كومەكتەسۋ قارجىسىنىڭ قولداۋىندا قورعاس اۋداندىق 1 ـ حالىق شيپاحاناسىنىڭ تەكسەرۋ ٴبولىمى 2 جىلدان استام ۋاقىت جۇمساپ، ISO15189 مەديتسينا تاجىريبەحاناسىنىڭ مويىنداۋىنان ٴساتتى ٴوتىپ، تەكسەرۋ مالىمەتىن حالىقارادا ٴوزارا مويىنداۋدى جۇزەگە اسىردى. ”بۇل ٴبىزدىڭ تەكسەرۋ ناتيجەمىزدىڭ جياڭسۋداعى ۇلكەن شيپاحانالاردىكى سياقتى بەدەلگە يە ەكەندىگىنەن دەرەك بەرەدى، بۇقارا ەسىك الدىندا ـ اق حالىقارامەن ۇشتاسقان تەكسەرۋ قىزمەت وتەۋىنەن يگىلىكتەنە الاتىن بولدى“، - دەدى تەكسەرۋ ٴبولىمىنىڭ مەڭگەرۋشىسى ليۋ فاڭ قۋانىشىن جاسىرا الماي.
4 ميلليون 300 مىڭ يۋان قارجى قوسىپ، دارەجەسىن جوعارىلاتقان قان تازارتۋ بولمەسىندە 13 قوس ناسوستى جەكە ادامدىق قان ٴسۇزۋ جابدىعى تىڭنان قوسىلىپ، قان ٴسۇزۋ قۋاتى ەسەلەپ ارتتى. ”بۇرىن قان سۇزدىرەتىن ناۋقاستار، ٴسوز جوق، قۇلجا قالاسىنا بارىپ، اپتا سايىن بارىپ ـ كەلىپ تۇراتىن، جولدا اۋرە ـ سارساڭعا تۇسەتىن. قازىر اۋداندىق شيپاحانا وسىلاي ىستەي الاتىن بولدى، اقشاسى دا ۇنەمدەلەدى ٴارى ناۋقاستار الاڭسىز بولادى“، - دەدى جياڭسۋدىڭ ىلەگە كومەكتەسۋ . ۋشي (جياڭيىن) قىزمەت گرۋپپاسى ەمدەۋ گرۋپپ−اسىنىڭ جەتەكشىسى، قورعاس اۋداندىق 1 ـ حالىق شيپاحاناسىنىڭ باستىعى جاڭ بياۋ.
”تۇراقتى ەمدەۋ اترەتىن جەتىلدىرۋ ـــ ٴبىزدىڭ شينجياڭعا كومەكتەسۋدەگى وزەكتى نىسانامىز“. جاڭ بياۋ بىلاي دەپ تانىستىردى: شينجياڭعا كومەكتەسۋ ۇيىرمەسى ”كومەكتەسۋ مەن ونەر ۇيرەتۋگە“ تەڭ ٴمان بەرۋگە تاباندى بولىپ، ۇيىرمە مەن ۇيىرمەنى، ٴبولىم مەن ٴبولىمدى دالمە - ٴدال سايكەستىرۋ ارقىلى ”ۇيرەتۋ، كومەكتەسۋ، جەتەكتەۋ“ قىزمەتىن ورىستەتىپ، ۇستاز جانە شاكىرت بولىپ 47 جۇپ قۇرادى. جەلىدە، جەلىدەن تىس ٴوزارا سايكەسىپ، جيىنى 295 رەت عىلمي لەكسيا، كاسىپتىك كۋرس اشىپ، جەرگىلىكتى ەمدەۋ قىزمەتكەرلەرىنەن 4319 ادام ـ رەت تاربيەلەدى.
تەكەس اۋدانىندا جالپى قۇرىلىس كولەمى 3400 شارشى مەتر كەلەتىن شۇعىل ەمدەۋ، شۇعىل قۇتقارۋ ورتالىعى عيماراتى ەرەكشە كوز تارتادى، بۇل ــ نانجيڭ جياڭنيڭ قالاسى شينجياڭعا باعىتتامالى كومەكتەسۋدە 25 ميلليون يۋان قارجى قوسىپ سالعان ”تىرشىلىك قامالى“ ەدى.
”بيىل 2 ـ ايدا ينتەرۆەنتسيالىق ەمدەۋدىڭ رۇقسات كۋالىگىن الدىق، سول ايدىڭ 18 ـ كۇنى تۇڭعىش رەت ٴتاج ارتەرياسىن سۋرەتكە الۋ جۇمىسىن ورىندادىق، 3 ـ ايدا جۇرەك بۇلشىق ەتىنىڭ شۇعىل ولەتتەنۋىنە دياگنوز قويىپ، دەربەس وپەراتسيا جاساي الاتىن بولدىق“، - دەدى نانجيڭ قالاسىنىڭ (جياڭنيڭ رايونى) ”ۇيىرمە ۇلگىسىندەگى“ شينجياڭعا كومەكتەسۋ ەمدەۋ ۇيىرمەسىنىڭ جەتەكشىسى، تەكەس اۋداندىق حالىق شيپاحاناسىنىڭ ورىنباسار باستىعى لي چييۇن. ول بىلاي دەپ تانىستىردى: قازىرگە دەيىن 400 گە جۋىق وپەراتسيا جاسالىپ، 300 دەن استام ناۋقاسقا تيىمدىلىك جەتكىزىلىپ، تۇتاس اۋداندى قامتىعان كوكىرەك اۋرۋلارىن ەمدەۋ تورابىندا شيپاحاناعا كەلۋدەن ىلگەرى جەدەل قۇتقارۋ، شيپاحانادا شۇعىل قۇتقارۋ، سالماقتى ناۋقاستاردى ەمدەۋ جالپى بارىسىن جابىق اينالىمدا ورىنداۋدى جۇزەگە اسىردىق.
شينجياڭعا كومەككە كەلگەن شيپاگەرلەردىڭ كومەگىندە 2025 ـ جىلى ىلە وبلىسىندا جاسالعان 3 ـ، 4 ـ دارەجەلى كۇردەلى وپەراتسيالاردىڭ سانى 2023 ـ جىلداعىدان %15.65 ارتىپ، مەملەكەت دارەجەلى 5 كلينيكالىق ٴتۇيىندى ارناۋلى ٴبولىم، اۆتونوميالى رايون دارەجەلى 16 ٴتۇيىندى ارناۋلى ٴبولىم تىڭنان قوسىلدى، جياڭسۋ ولكەلىك حالىق شيپاحاناسىمەن جۇپ قۇراعان ىلە وبلىستىق دوستىق شيپاحاناسى سولتۇستىك شينجياڭداعى بىردەن ـ ٴبىر وڭىرلىك ەمدەۋ ورتالىعىنا اينالدى، 2024 ـ جىلى مەملەكەتتىڭ باعالاۋىندا ايماق، وبلىستار بويىنشا 1 ـ ورىندى يەلەدى.
موڭعۇلكۇرە ۇستىرتىنەن تەكەس اڭعارىنا دەيىن، قاتتى بولشەكتەردىڭ دارەجەسىن جوعارىلاتۋدان تەحنولوگيالىق قامال الۋعا دەيىن جياڭسۋدىڭ ەمدەۋ جاعىنان شينجياڭعا كومەكتەسۋى ”ۇيىرمە ۇلگىسىندەگى“ بىرىككەن كۇش قالىپتاستىرىپ، ىلەدەگى بۇقارانىڭ ىرگەسىندە بەرىك ”تىرشىلىك قورعانىس شەبىن“ قۇردى.