جۇڭگو مەن ۆيەتنامنىڭ ”جولداستىق ءارى باۋىرلاستىق“ تەرەڭ دوستىق سۇيىسپەنشىلىگىنىڭ جاستىق اجارىن جايناتىڭىزدار 　

　　− باس شۋجي، مەملەكەت ءتوراعاسى شي جينپيڭنىڭ باس شۋجي، مەملەكەت ءتوراعاسى سۋ لينمەن بىرگە جۇڭگو − ۆيەتنام جاستارى ۋاكىلدەرىمەن كەزدەسكەندىگى جونىندە ەستەلىك

□ شينحۋا اگەنتتىگىنىڭ تىلشىلەرى ياڭ يجۇن، دۇڭ شۋە، فىڭ شينران

4 - ايداعى بەيجيڭدە جانعا جايلى سامال ەسىپ، كۇن شۇلەن شۋاعىن شاشىپ، كوكتەم لەبى ەسىپ تۇر.

4 - ايدىڭ 15 - كۇنى تۇستەن بۇرىن بەيجيڭ حالىق سارايىنىڭ باتىس زالىندا شىراقتار سامالاداي جارقىراپ، جۇڭگو كوممۋنيستىك پارتياسىنىڭ پارتيا تۋى مەن ۆيەتنام كوممۋنيستىك پارتياسىنىڭ پارتيا تۋى قاتار ءتىزىلىپ، بەس جۇلدىزدى قىزىل تۋ مەن التىن ءتۇستى جۇلدىزدى قىزىل تۋ ءبىر - بىرىنە شۇعىلا شاشىپ تۇر.

ەكى ەلدىڭ تەرەڭ سۇيىسپەنشىلىك، قويۋ دوستىعىن جىرلاعان «ۆيەتنام − جۇڭگو» مۋزيكاسىنىڭ اۋەنىمەن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن بىرگە ءماجىلىس زالىنا كىرىپ، ”قىزىل زەرتتەۋ - ۇيرەنۋ ساپارىنا“ قاتىناسىپ جاتقان جۇڭگو − ۆيەتنام جاستارى ۋاكىلدەرىمەن كەزدەستى.

”كوپشىلىك، سالەمەتسىزدەر مە، كوپشىلىكپەن جۇزدەسكەنىمە وتە قۋانىشتىمىن“. جالىندى دا جىگەرلى 300دەن استام جۇڭگو − ۆيەتنام جاستارى ۋاكىلى الدىندا، باس شۋجي، مەملەكەت ءتوراعاسى شي جينپيڭ شىن ىقىلاسپەن بىلاي دەدى: ”بىلتىرعى ءدال بۇگىنگى كۇنى مەن باس شۋجي سۋ لين جولداسپەن بىرگە ’قىزىل زەرتتەۋ - ۇيرەنۋ ساپارى‘ نىسانىن باستادىق“.

ءدال وسىدان ءبىر جىلدىڭ الدىنداعى بۇگىنگى كۇنى، 2025 - جىلى 4 - ايدىڭ 15 - كۇنى ۆيەتنامدا مەملەكەتتىك ساپاردا بولعان باس شۋجي، مەملەكەت ءتوراعاسى شي جينپيڭ جۇڭگو − ۆيەتنام حالقىنىڭ كولەمدى بىرلەسكەن ساۋىق كەشى قيمىلى ۋاكىلدەرىمەن كەزدەسكەندە، جۇڭگو جاقتىڭ الداعى 3 جىلدا ۆيەتنام جاستارىن جۇڭگوعا كەلىپ ”قىزىل زەرتتەۋ - ۇيرەنۋ ساپارىن“ ورىستەتۋگە ۇسىنىس ەتكەندىگىن جاريالادى، سونداي - اق باس شۋجي سۋ لينمەن بىرگە تۇيمەشىكتى باسىپ، ”قىزىل زەرتتەۋ - ۇيرەنۋ ساپارى“ نىسانىن باستاعان ەدى.

ءبىر جىلدان بەرى، ۆيەتنامنىڭ ءار سالاسىنداعى 1000نان استام جاس جۇڭگو جاستارىمەن بىرگە ەكى پارتيانىڭ، ەكى ەلدىڭ اعا بۋىن باسشىلارىنىڭ توڭكەرىستىك ىزدەرىن بويلاپ، جۇڭگو − ۆيەتنام دوستىعىنىڭ قىزىل گەنى جونىندە بىرگە ىزدەنىس جاساپ، جۇڭگو ۇلگىسىندەگى وسىزامانداندىرۋدىڭ الۋان ءتۇرلى بەينەسىن سەزىندى.

”اۋەلگى ماقساتتى ۇمىتپاۋ“، ”قىزىل جۇلدىز شۇعىلا شاشادى“، ”ۇرپاقتان - ۇرپاققا جالعاستىرۋ“، ”مۇرات شۇعىلاسى“، ”حۋ اتانىڭ ىزىمەن“... ”قىزىل زەرتتەۋ - ۇيرەنۋ ساپارى“ زەرتتەۋ - ۇيرەنۋ لاگەرىنىڭ تۇرلىشە نەگىزگى تاقىرىبىندا جۇڭگو − ۆيەتنام ەكى پارتيا، ەكى ەل بىرگە ۇزبەي جالعاستىرىپ كەلە جاتقان قىزىل گەن قامتىلعان.

كوك تىرەگەن بايتەرەكتىڭ دە تامىرى بولادى، تاۋدان اققان وزەننىڭ دە قاينارى بولادى. جۇڭگو − ۆيەتنام ەكى جاق مەملەكەتتىڭ تاۋەلسىزدىگى مەن ۇلت ازاتتىعىنا قول جەتكىزۋ كۇرەسىندە ءبىرىن - ءبىرى قولداپ، سوتسياليستىك قۇرىلىس ىستەرىندە قول ۇستاسا بىرگە العا باسىپ، وزدەرىنىڭ وسىزاماندانۋىن ىلگەرىلەتۋ بارىسىندا ۇدەرە العا تارتتى. جۇڭگو − ۆيەتنام دوستىعى ەكى ەل حالقىنىڭ ءبىر - بىرىنە قارايلاسۋ بارىسىندا تامىر تارتىپ، وركەن جايدى، ەكى ەل حالقىنىڭ ىنتىماعى، ىستەستىگى بارىسىندا گۇل اشىپ، جەمىس بەرىپ، ەكى ەل حالقىنىڭ ورتاق تالپىنىسى بارىسىندا جالعاسا بەردى، بيىكتەدى.

جۇڭگو − ۆيەتنام دوستىعىنىڭ تامىرى حالىقتا، بولاشاعى جاستاردا. باس شۋجي، مەملەكەت ءتوراعاسى شي جينپيڭ جۇڭگو مەن ۆيەتنام جاس ۇرپاقتارىنىڭ ءداستۇرلى دوستىقتى جالعاستىرۋىنا جانە ۇلاستىرۋىنا باستان - اياق كوڭىل ءبولىپ، ەكى جاقتىڭ ”جولداستىق ءارى باۋىرلاستىق“ دوستىق سۇيىسپەنشىلىگىنىڭ جاستىق ومىرشەڭ كۇشىن قاۋلاتۋعا تىكەلەي كوڭىل ءبولدى جانە ونى ىلگەرىلەتتى.

”جاستار − قوعامنىڭ دامۋىن، العا باسۋىن ىلگەرىلەتەتىن جاندى كۇش، سونداي - اق جۇڭگو − ۆيەتنام ەكى پارتيا، ەكى ەل ىستەرىنىڭ ۇرپاقتان - ۇرپاققا جالعاسۋىنداعى ۇتىلامالى تاياقشانى جالعاۋشىلار“. كەزدەسۋ ورنىندا، ەكى ەل جاستارى ۋاكىلدەرىنىڭ ىقىلاستى جانارلارى الدىندا باس شۋجي، مەملەكەت ءتوراعاسى شي جينپيڭ كوپشىلىكتەن 3 ءتۇرلى ءۇمىت كۇتتى:

”ءبىرىنشى، سىزدەردىڭ ءوزارا قارايلاسىپ، قىزىل سەنىمدى بىرگە بەكەمدەپ، قىزىل تامىردى جالعاستىرىپ، جۇڭگو مەن ۆيەتنامنىڭ ’جولداستىق ءارى باۋىرلاستىق‘ تەرەڭ دوستىق سۇيىسپەنشىلىگىنىڭ جاستىق اجارىن جايناتۋلارىڭىزدى ءۇمىت ەتەمىن“؛

”ەكىنشى، جۇرەكتىلىكپەن جاۋاپكەرشىلىك ارقالاپ، جاستىق كوكتەمنىڭ ومىرشەڭدىگى مەن جاسامپازدىق قۋاتى ارقىلى جاڭالىق اشۋدىڭ، ەسىك اشۋدىڭ، سەلبەستىك جاساۋدىڭ، تەڭ يگىلىككە كەنەلۋدىڭ بۋىرقانعان كوكتەم تولقىنىن تاسقىنداتۋلارىڭىزدى ءۇمىت ەتەمىن“؛

”ءۇشىنشى، سىزدەردىڭ الەمدى كوكەيدە ساقتاپ، ادامزاتتىڭ تاعدىرلاس ورتاق تۇلعاسىن قۇرۋدىڭ اتويشى قوسىنى بولۋعا قۇلشىنىپ، ادامزاتتىڭ العا باسۋ ىستەرىنە جاستىق كوكتەمنىڭ كۇشىن ارناۋلارىڭىزدى ءۇمىت ەتەمىن“.

باس شۋجي، مەملەكەت ءتوراعاسى سۋ لين سوزىندە مىنالاردى ءبىلدىردى: جاستار − ۆيەتنام − جۇڭگو ەكى پارتيا، ەكى ەل قارىم - قاتىناسىنىڭ ماڭىزدى كوپىرى، ەكى ەل جاستارىنىڭ مۇرات - سەنىمدى ونان ارى بەكەمدەپ، ساياسي قابىلەتىن جوعارىلاتىپ، عىلمي بىلىمدەردى يگەرىپ، ۆيەتنام − جۇڭگو قارىم - قاتىناسى جونىندەگى تانىمدى تەرەڭدەتىپ، ءوز ەلدەرىنىڭ دامۋى مەن ەكى ەلدىڭ دوستىعى ءۇشىن ماڭىزدى رول اتقارۋىن ءۇمىت ەتەمىن.

ەكى پارتيا، ەكى ەل ەڭ جوعارى باسشىلارىنىڭ تەرەڭ سۇيىسپەنشىلىككە تولى، ۇزاق بولاشاقتى كوزدەگەن ىقىلاستى ءۇمىتى جۇڭگو − ۆيەتنام جاستارى ۋاكىلدەرىنىڭ شىنايى ۇندەستىگىن قوزعادى، الاڭدا ءالسىن - ءالى قىزۋ قول شاپالاق ءۇنى كوتەرىلدى.

ۆيەتنام جاستارى ۋاكىلى لي ميڭدى تەبىرەنە بىلاي دەدى: ”بۇگىن وسىندا وتىرعان جاس دوستاردىڭ دا مەن سياقتى ەكى باسشىنىڭ ءسوزىن ناق مايداندا تىڭداعاننان كەيىن، كوكىرەگىندە، ءسوز جوق، اناعۇرلىم قىزۋ ىنتا مەن جالىن اتىپ، ۆيەتنام − جۇڭگو دوستىعىن دامىتۋعا ۇزدىكسىز جاستىق جالىنى مەن جىگەرىن ارنايتىندىعىنا سەنەمىن“.

ۆيەتنام جاستارى ۋاكىلى رۋانشى جياۋيىڭ بىلاي دەدى: ەكى باسشىنىڭ ءسوزى مەنى ەرەكشە شابىتتاندىردى. جاس ءانشى رەتىندە، مەن ەكى جاقتىڭ مادەنيەت سالاسىنداعى اۋىس - كۇيىسىن، سەلبەستىگىن كۇشەيتۋگە كۇش سالىپ، ۆيەتنام − جۇڭگو دوستىعىنىڭ ماڭگى جالعاسۋىنا ۇلەس قوسامىن.

جۇڭگو جاستارىنىڭ ۋاكىلى جوۋ جۇنجيە كوپكە دەيىن كوڭىل كۇيىن ساباسىنا تۇسىرە المادى: ”بۇگىنگى وسى قيمىل ماعان قىزىل گەننىڭ تەك عانا كىتاپتا ايتىلاتىن الىس جەردەگى اڭگىمە ەمەس، قايتا مەيىرگە تولى، ومىرشەڭ كۇشى بار، بولاشاعى بار قىمباتتى بايلىق ەكەندىگىن تەرەڭ سەزىندىردى. ول ءبىزدىڭ وتكەنىمىزدى، قازىرگىمىزدى جانە بولاشاعىمىزدى تىعىز بايلانىستىرۋدا.

قيمىل رەسمي باستالۋدان بۇرىن، ەكى ەل جاستارى ۋاكىلدەرى جينالىس الاڭىندا اسەرىن ءبولىسىپ، دوستىق ىقپالداستىق جاسادى، سونداي - اق وزدىكتەرىنەن حانزۋ تىلىندە «شىعىس قىزاردى» ءانىن بىرگە شىرقادى، ورتا قىزۋ مەرەيگە شومدى. ”سول جەردەگى جۇڭگو − ۆيەتنام جاستارى قاتار تۇرىسىپ، بىرگە ءان سالىپ جاتقانىن كورگەنىمدە، مەنىڭ ىشكى جان دۇنيەمدەگى ەڭ تىكە اسەرىم سول − قىزىل گەن ءدال وسى ساتتە ’جانداندى‘“، - دەدى جۇڭگو جاستارىنىڭ ۋاكىلى لين ۋىنكاڭ.

جاستار − ىستەرىمىزدىڭ بولاشاعى جانە ءۇمىتى. جۇڭگو − ۆيەتنام جاستارىنىڭ ءوزارا ۇيرەنىپ، ءوزارا ۇلگى الۋى، ءوزارا ءتۇسىنىسىپ، ءوزارا ەتەنە بولۋى ستراتەگيالىق مانگە يە جۇڭگو − ۆيەتنام تاعدىرلاس ورتاق تۇلعاسىن قۇرۋعا جاستىق كوكتەمنىڭ بىرىككەن كۇشىن ۇيىستىرىپ، ەكى ەل سوتسياليزم ىستەرىنىڭ جاڭا جورىعىندا اسقاق العا باسقان جاستىق ىسكەرلىكتى ايگىلەدى.

”جۇڭگو − ۆيەتنام دوستىعىنىڭ بولاشاعى جاستاردا“. مەن جۇڭگو − ۆيەتنام جاستارىنىڭ، ءسوز جوق، ەكى ەلدىڭ ۇرپاقتان - ۇرپاققا جالعاسقان دوستىعىنىڭ جالعاستىرۋشىسى جانە ءىزباسارى بولاتىندىعىنا، ءبىزدىڭ ورتاق ىستەرىمىزدىڭ، ءسوز جوق، ۇزدىكسىز گۇلدەنىپ - كوركەيەتىندىگىنە سەنەمىن! باس شۋجي، مەملەكەت ءتوراعاسى شي جينپيڭ جۇڭگو − ۆيەتنام جاستارىنا ىقىلاستى ءۇمىت ارتتى.

ءماجىلىس زالىندا جۇڭگو - ۆيەتنام ەكى ەل جاستارى ۋاكىلدەرىنىڭ شاپالاق ءۇنى ۇزاققا دەيىن تولاستامادى.

(شينحۋا اگەنتتىگىنىڭ 4 - ايدىڭ 15 - كۇنى بەيجيڭنەن بەرگەن حابارى)