شينحۋا اگەنتتىگىنىڭ 4 - ايدىڭ 15 - كۇنى بەيجيڭنەن بەرگەن حابارى (ءتىلشى فىڭ شينران). 4 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا رەسەيدىڭ سىرتقى ىستەر مينيسترى لاۆروۆپەن كەزدەستى.

شي جينپيڭ لاۆروۆقا پۋتين زۇڭتۇڭعا ىقىلاستى سالەمىن جەتكىزۋدى تاپسىردى. شي جينپيڭ بىلاي دەپ اتاپ كورسەتتى: بيىل − جۇڭگو − رەسەي ستراتەگيالىق سەلبەستىك سەرىكتەستىك قارىم - قاتىناسى ورناتىلعاندىعىنىڭ 30 جىلدىعى، سونداي - اق «جۇڭگو − رەسەي تاتۋ كورشىلىك، دوستىق سەلبەستىك شارتىنا» قول قويىلعاندىعىنىڭ 25 جىلدىعى، ەكى ەلدىڭ جاپپاي ستراتەگيالىق سەلبەستىك سەرىكتەستىك قارىم - قاتىناسى جوعارى دەڭگەيدە دامۋدى ساقتاپ، ءار سالاداعى سەلبەستىكتىڭ تابىسى سۇبەلى بولدى. وزگەرىس پەن بىلىقپالىق قاباتتاسقان حالىقارالىق جاعداي الدىندا، جۇڭگو − رەسەي قارىم - قاتىناسىنىڭ ورنىقتىلىعى مەن ايقىندىلىعى ءتىپتى قىمباتتى، «جۇڭگو − رەسەي تاتۋ كورشىلىك، دوستىق سەلبەستىك شارتىنىڭ» مىعىم ومىرشەڭ كۇشى مەن ۇلگىلىك ءمانى اناعۇرلىم كورنەكتىلەندى. ەكى جاق مەنىمەن پۋتين زۇڭتۇڭ كەلىسكەن ماڭىزدى ورتاق تانىمدى بار كۇشپەن تياناقتاندىرىپ، ستراتەگيالىق بايلانىستى كۇشەيتىپ، ديپلوماتيالىق سايكەسۋدى جيىلەتىپ، جۇڭگو − رەسەي جاپپاي ستراتەگيالىق سەلبەستىك سەرىكتەستىك قارىم - قاتىناسىنىڭ اناعۇرلىم بيىكتە تۇرۋىن، اناعۇرلىم ورنىقتى ءجۇرۋىن، اناعۇرلىم الىسقا جەتۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: 100 جىلدا بولماعان زور وزگەرىس الدىندا، جۇڭگو مەن رەسەي اناعۇرلىم تىعىز، پارمەندى ستراتەگيالىق سەلبەستىك ارقىلى ەكى ەلدىڭ ورىندى مۇددەسىن باتىل قورعاپ، جەر شارىنىڭ وڭتۇستىگىندەگى ەلدەردىڭ ىنتىماعىن قورعاپ، ءىرى ەلدىڭ جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلدىڭ جاۋاپكەرشىلىك ارقالاۋىن ايگىلەۋى كەرەك. ەكى جاق ستراتەگيالىق تاباندىلىقتى ساقتاپ، ءبىر - بىرىنە سەنىپ، ءوزارا قولداپ، بىرگە دامىپ، ءوز ىستەرىن ويداعىداي ىستەۋى كەرەك. ىرگەلەس بولۋدىڭ جانە ءبىر - ءبىرىن تولىقتاۋدىڭ ارتىقشىلىعىن تولىق ساۋلەلەندىرىپ، جان - جاقتى سەلبەستىكتى تەرەڭدەتىپ، ءوز - ءوزىنىڭ دامۋ سەرپىمدىلىگىن جوعارىلاتۋى كەرەك. كوپ جاقتى سەلبەستىكتى كۇشەيتىپ، كوپ جاقتىلىقتى باتىل قورعاپ جانە امالياتتا ايگىلەپ، بىرلەسكەن مەملەكەتتەر ۇيىمىنىڭ بەدەلى مەن ومىرشەڭ كۇشىن قول ۇستاسا قايتا جانداندىرىپ، شاڭحاي سەلبەستىك ۇيىمى، بريكس ەلدەرى سياقتى جۇلگەلەردە تىعىز سايكەسىپ جانە سەلبەسىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋى كەرەك.

لاۆروۆ پۋتين زۇڭتۇڭنىڭ ءتوراعا شي جينپيڭگە جولداعان ىقىلاستى سالەمى مەن ىزگى تىلەگىن جەتكىزىپ، بىلاي دەدى: ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، رەسەي − جۇڭگو قارىم - قاتىناسى كۇردەلى سىرتقى ورتادا ايرىقشا سەرپىمدىلىگىن ايگىلەپ، ساۋدا، قارجى قوسۋ سەلبەستىگىنىڭ بەتالىسى جاقسارىپ، گۋمانيتارلىق اۋىس - كۇيىس كۇن سايىن جيىلەپ، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى، ازيا − تىنىق مۇحيت ەكونوميكالىق سەلبەستىك ۇيىمى سياقتى كوپ جاقتى تۇعىرلارداعى سايكەسۋى تىعىز بولدى. قاتاڭ دا كۇردەلى حالىقارالىق جاعداي الدىندا، رەسەي جاق جۇڭگو جاقپەن بىرگە ەكى ەل مەملەكەت باسشىلارى كەلىسكەن ماڭىزدى ورتاق تانىمدى شىنايى تياناقتاندىرىپ، جوعارى جىكتەگىلەردىڭ بارىس - كەلىسىن ساقتاپ، ناقتى ىستەر سەلبەستىگىن كۇشەيتىپ، گۋمانيتارلىق اۋىس - كۇيىستى جەبەپ، حالىقارانىڭ ادىلدىگىن، ادىلەتتىلىگىن قورعاپ، رەسەي − جۇڭگو قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتىپ، دۇنيە ءجۇزىنىڭ بەيبىتشىلىگىنە، ورنىقتىلىعىنا اناعۇرلىم زور ۇلەس قوسۋدى قالايدى.

ۋاڭ ي كەزدەسۋگە قاتىناستى.