شينحۋا اگەنتتىگىنىڭ 4 - ايدىڭ 15 - كۇنى بەيجيڭنەن بەرگەن حابارى. 4 - ايدىڭ 15 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ مەن حانىمى پىڭ لييۋان جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن جانە حانىمى ۋ فاڭليمەن ىقىلاستى قوشتاستى.

شي جينپيڭ بىلاي دەدى: بۇگىن مەن باس شۋجي، مەملەكەت ءتوراعاسى سۋ لينمەن بىرگە ورتاق كوڭىل ءبولىپ وتىرعان جالپى جاعداي سيپاتتى، ستراتەگيالىق سيپاتتى ماسەلەلەر جونىندە ۇزاق ۋاقىت ىشكەرىلەي پىكىر اۋىستىرىپ، كوپتەگەن جاڭا ماڭىزدى ورتاق تانىمعا كەلدىك. مەن مىنانى ايرىقشا سەزىندىم: جۇڭگو مەن ۆيەتنام تۇگەلدەي سوتسياليستىك مەملەكەت، ءبىز وسى جولدا بەلگىلەنگەن بەتالىستى بويلاپ ۇزدىكسىز تاباندىلىقپەن العا ىلگەرىلەپ، سوتسياليزم ىستەرىنىڭ تاعدىرلاس ورتاق تۇلعاسى بولۋىمىز كەرەك؛ ءبىز بەينەت پەن زەينەتتى بىرگە وتكەرىپ كەلە جاتقان جاقسى كورشىمىز، وسىزاماندانۋعا بىرگە ۇمتىلۋدامىز، وسىزامانداندىرۋدى جۇزەگە اسىرۋدىڭ تاعدىرلاس ورتاق تۇلعاسى بولۋىمىز قاجەت؛ ءبىز بارلىعىمىز الەمنىڭ ۇلى بىرلىگىن دارىپتەيمىز، دۇنيە ءجۇزىنىڭ 100 جىلدىق وزگەرىسىندە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەتىن سەرىك بولۋىمىز كەرەك. ءسىز ەرتەڭ گۋاڭشيگە ساپارعا اتتانىپ، جۇڭگونى تاعى دا ىشكەرىلەي تۇسىنبەك بولىپ وتىرسىز. ءبىز ۆيەتنام جاقپەن بىرگە قۇلشىنىپ، جۇڭگو − ۆيەتنام تاعدىرلاس ورتاق تۇلعاسى قۇرىلىسىنىڭ جوعارى قارقىنمەن دامۋ جەدەل ارناسىنا تۇسۋىنە جەتەكشىلىك ەتۋدى قالايمىز.

سۋ لين باس شۋجي، مەملەكەت ءتوراعاسى شي جينپيڭنىڭ جانە جۇڭگو جاقتىڭ ۆيەتنام جاقتىڭ جوعارى دارەجەلى ۋاكىلدەر ۇيىرمەسىندەگىلەردى جولداس ءارى باۋىرلاستاي كورىپ ىستىق ىقىلاسپەن كۇتىپ العاندىعىنا العىس ايتتى. سۋ لين بىلاي دەدى: جۇڭگو جاق ءبىر قىدىرۋ ەرەكشە ورنالاستىرۋلار جاساپ، ۆيەتنام جاققا ەرەكشە دوستىق سۇيىسپەنشىلىك كورسەتىپ، ۆيەتنام جاقتى تەرەڭ اسەرلەندىردى. قازىر ۆيەتنام − جۇڭگو قارىم - قاتىناسى تاريحتاعى ەڭ جاقسى مەزگىلدە تۇر، وسى رەتكى ساپاردا كوپتەگەن ماڭىزدى ورتاق تانىمعا كەلىپ، كوپتەگەن سەلبەستىك كەلىسىمىنە قول قويىپ، قازىرگە دەيىن قاناعاتتانارلىقتاي تابىستارعا قول جەتكىزدىك. بۇل جولى ءبىز تاعى باس شۋجي شي جينپيڭ جولداس العا قويعان ءبىر قىدىرۋ كەلەلى نازاريالاردىڭ اتقارىلعاندىعىنا ءارى كەلەلى تابىستارعا قول جەتكىزگەندىگىنە كۋا بولدىق. ۆيەتنام جاق جۇڭگو جاقپەن بىرگە دايەكتىلەندىرۋدى، تياناقتاندىرۋدى جاپپاي ويداعىداي يگەرىپ، وسى رەتكى ساپاردا كەلىسكەن ماڭىزدى ورتاق تانىمدى ەكى جاقتىڭ دوستىق سەلبەستىگىن ىلگەرىلەتۋدىڭ جاڭا قوزعاۋشى كۇشىنە اينالدىرىپ، ەكى ەلدىڭ اناعۇرلىم زور دامۋدى جۇزەگە اسىرۋىن جەبەپ، اناعۇرلىم جوعارى دەڭگەيدەگى ستراتەگيالىق مانگە يە تاعدىرلاس ورتاق تۇلعا قۇرۋعا قاراي تىڭ قادام تاستاۋدى قالايدى.

ساي چي، ۋاڭ ي قاتارلىلار قاتىناستى.