4 - ايدىڭ 15 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان سۋ لين جانە حانىمى ۋ فاڭليمەن بىرگە سۋرەتكە ءتۇستى.

□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگىنىڭ 4 - ايدىڭ 15 - كۇنى بەيجيڭنەن بەرگەن حابارى (تىلشىلەر فىڭ شينران، دۇڭ شۋە). 4 - ايدىڭ 15 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن كەڭەس وتكىزدى.

شي جينپيڭ سۋ ليننىڭ ۆيەتنامنىڭ مەملەكەت ءتوراعاسى بولىپ سايلانعاندىعىن قايتالاي قۇتتىقتادى. شي جينپيڭ بىلاي دەپ اتاپ كورسەتتى: ءسىز ۆيەتنامنىڭ مەملەكەت ءتوراعاسى بولىپ سايلانعاننان كەيىن، ەڭ الدىمەن جۇڭگوعا ساپارلاي كەلدىڭىز، بۇل ءسىزدىڭ جۇڭگو − ۆيەتنام قارىم - قاتىناسىن دامىتۋعا وسكەلەڭ ءمان بەرەتىندىگىڭىزدى ايگىلەدى. سۋ لين جولداس باستاعان ۆيەتنام كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، ۆيەتنامنىڭ، ءسوز جوق، سوتسياليزم جولىمەن بۇلجىماي ءجۇرىپ، پارتيا قۇرۋدىڭ، مەملەكەت قۇرۋدىڭ ”قوس 100 جىلدىق“ كۇرەس نىساناسىنا قاراي قايراتتانا العا تارتاتىندىعىنا سەنەمىن. مەيلى حالىقارالىق جاعداي قالاي وزگەرسە دە، جۇڭگو جاق باستان - اياق ۆيەتنامدى توڭىرەكتىك ديپلوماتياداعى الدىمەن ەسكەرىلەتىن باعىت ەتەدى، ۆيەتنام جاقپەن اۋەلگى ماقساتتى ۇستانىپ، دوستىقتى جالعاستىرىپ، ىنتىماقتاسا سەلبەسىپ، ءوزارا قولداۋ كورسەتىپ، ۇزدىكسىز تۇردە ”التى اناعۇرلىم“ جالپى تۇلعالىق نىساناسى بويىنشا جاپپاي ستراتەگيالىق سەلبەستىكتى جوعارى ساپالى ىلگەرىلەتىپ، اناعۇرلىم جوعارى دەڭگەيلى ستراتەگيالىق مانگە يە جۇڭگو − ۆيەتنام تاعدىرلاس ورتاق تۇلعاسىن قۇرۋدى جەدەلدەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە اناعۇرلىم زور ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: پارتيانىڭ باسشىلىعى − سوتسياليزمنىڭ ەڭ ماندىك ەرەكشەلىگى جانە ەڭ ۇلكەن ارتىقشىلىعى. سوتسياليستىك ءتۇزىم مەن كوممۋنيستىك پارتيانىڭ بيلىك جۇرگىزۋ ورنىن قورعاۋ − جۇڭگو مەن ۆيەتنام ەكى پارتياسىنىڭ ەڭ ۇلكەن ورتاق ستراتەگيالىق مۇددەسى. ەكى جاق وسكەلەڭ ستراتەگيالىق سەرگەكتىكتى جانە كۇشتى ستراتەگيالىق تاباندىلىقتى ساقتاپ، جول سەنىمى مەن ءتۇزىم سەنىمىن باستان - اياق بەكەمدەپ، رەفورمادا بەتالىستان جازباۋعا، جاڭارتۋدا قاسيەتىن وزگەرتپەۋگە تاباندى بولۋى كەرەك.

ەكى جاق پارتيالار ارا بايلانىس ارناسىنىڭ ەرەكشە رولىن تولىق ساۋلەلەندىرىپ، جوعارى جىكتەگىلەردىڭ بارىس - كەلىسىن جيىلەتىپ، ساياسي ءوزارا سەنىمدىلىكتى بەكەمدەۋى قاجەت. جوعارى جىكتەگىلەردىڭ كەڭەسى، نازاريالىق زەرتتەۋ - تالقىلاۋ، كادرلاردى باۋلۋ، باعىتتامالى اۋىس - كۇيىس ، جەرگىلىكتى ورىندار سەلبەستىگى سياقتى مەحانيزمدەردەن ويداعىداي پايدالانىپ، جاڭا كەزەكتى جۇڭگو كوممۋنيستىك پارتياسى مەن ۆيەتنام كوممۋنيستىك پارتياسىنىڭ سەلبەستىك جوسپارىن ويداعىداي اتقارىپ، پارتيانى باسقارۋ، ەل باسقارۋ نازارياسى مەن تاجىريبەسى جونىندەگى اۋىس - كۇيىستى، ءوزارا ۇلگى الۋدى ىشكەرىلەي ورىستەتۋى كەرەك. ساياسي حاۋىپسىزدىكتى قورعاۋدى ماڭداي الدى ورىنعا قويىپ، ديپلوماتيا، مەملەكەت قورعانىسى، قوعام حاۋىپسىزدىگى سياقتى ”3 + 3“ ستراتەگيالىق تىلدەسۋ مەحانيزمىنەن ويداعىداي پايدالانىپ، ەكى ەل جاستارىنا مۇرات - سەنىم تاربيەسىن ۇزدىكسىز كۇشەيتۋى قاجەت.

ەكى جاق ءبىر جاعادان باس، ءبىر جەڭنەن قول شىعارىپ، وسىزاماندانۋ جولىمەن قول ۇستاسا ىلگەرىلەۋى كەرەك. دامۋ ستراتەگيالارىن ۇشتاستىرۋدى جەدەلدەتىپ، نەگىزدىك قۇرىلعىلاردى ۇلاستىرۋدى، تۇتاستىرۋدى الدىمەن ىلگەرىلەتۋى قاجەت. جاساندى زەردە، جارتىلاي وتكىزگىش، زات ينتەرنەتى سياقتى جاڭادان گۇلدەنگەن سالالارداعى سەلبەستىكتى كۇشەيتۋى كەرەك. جۇڭگو جاق ۆيەتنامنىڭ اناعۇرلىم كوپ ساپالى ونىمدەرىنىڭ جۇڭگو بازارىنا كىرۋىن قارسى الادى. ەكى جاق ساياحات، مادەنيەت، مەديا، وقۋ - اعارتۋ، دەنساۋلىق ساقتاۋ، دەنە تاربيە سياقتى جاقتارداعى دوستىق اۋىس - كۇيىستى، سەلبەستىكتى ۇزدىكسىز كۇشەيتىپ، ەكى ەل حالقىنىڭ ءوزارا ءتۇسىنىسىپ، ءوزارا ەتەنە بولۋىن جەبەۋى كەرەك. مەن سىزبەن بىرگە 2026 - جىلدان 2027 - جىلعا دەيىنگى ”جۇڭگو − ۆيەتنام ساياحات سەلبەستىك جىلىن“ باستاۋدى جاريالاۋدى قالايمىن.

ەكى جاق بەيبىتشىلىك، دامۋ، سەلبەستىك، تەڭ يگىلىككە كەنەلۋ تۋىن بيىك ۇستاپ، سىڭار جاقتىلىققا، قورعامپازدىققا بىرگە قارسى تۇرىپ، الەمدىك ەركىن ساۋدا ءتۇزىلىسىنىڭ جانە كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاۋى قاجەت. الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن، الەمدىك باسقارۋ باستاماسىن قول ۇستاسا امالياتتا ايگىلەپ، الەمدىك سىن - سايىستارعا بىرگە توتەپ بەرۋى كەرەك. بيىل − جۇڭگو − شىعىس وڭتۇستىك ازيا ەلدەرى وداعىنىڭ جاپپاي ستراتەگيالىق سەرىكتەستىك قارىم - قاتىناس ورناتقاندىعىنىڭ 5 جىلدىعى، جۇڭگو جاق وڭىردەگى ەلدەرمەن سايكەسۋدى جانە سەلبەسۋدى كۇشەيتىپ، جۇڭگو − شىعىس وڭتۇستىك ازيا ەلدەرى وداعىنىڭ اناعۇرلىم تىعىز تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

سۋ لين بىلاي دەدى: بۇل مەنىڭ ۆيەتنامنىڭ مەملەكەت ءتوراعاسى بولىپ سايلانعاننان كەيىنگى تۇڭعىش ساپارىم، سونداي - اق باس شۋجي، مەملەكەت ءتوراعاسى شي جينپيڭنىڭ بىلتىر ۆيەتنامدا تاريحي سيپاتتى ساپاردا بولعاندىعىنىڭ ءبىر جىلدىعىنا تۋرا كەلىپ وتىر، بۇل باس شۋجي جولداس ايتقان ”كورشىلەر بارعان سايىن ەتەنە بولا ءتۇستى“ دەگەن ءسوزدى تولىق بەينەلەدى. ۆيەتنام جاق جۇڭگو كوممۋنيستىك پارتياسىنىڭ، ۇكىمەتىنىڭ جانە حالقىنىڭ ۆيەتنام كوممۋنيستىك پارتياسىنىڭ 14 - قۇرىلتايىنا بەرگەن ماڭىزدى ساياسي قولداۋىنا العىس ايتادى، باستان - اياق جۇڭگو جاقپەن بىرگە ءداستۇرلى دوستىقتى جالعاستىرىپ، ەكى ەلدىڭ جاپپاي ستراتەگيالىق سەلبەستىك سەرىكتەستىك قارىم - قاتىناسىن جانە ستراتەگيالىق مانگە يە تاعدىرلاس ورتاق تۇلعاسىن ۇزدىكسىز دامىتا ءتۇسۋدى قالايدى. ۆيەتنام جاق جۇڭگونىڭ ”14 - بەسجىلدىق“ جوبانى جەڭىسپەن ورىنداعاندىعىن ءارى تاريحي تابىستارعا قول جەتكىزگەندىگىن قۇتتىقتايدى، جۇڭگو جاقتىڭ ”15 - بەسجىلدىق“ جوبانى ءساتتى اتقارىپ، جوعارى ساپالى دامۋدى جانە سوتسياليستىك وسىزامانداندىرۋ قۇرىلىسىن ۇزدىكسىز ىلگەرىلەتىپ، ەكىنشى 100 جىلدىق كۇرەس نىساناسىن ۋاعىندا جۇزەگە اسىراتىندىعىنا، سونداي - اق دۇنيە ءجۇزىنىڭ بەيبىتشىلىگى مەن دامۋىنىڭ تىرەكتى كۇشىنە جانە باستى قوزعاۋشى كۇشىنە اينالاتىندىعىنا سەنەدى.

كەزەكتە ۆيەتنام مەن جۇڭگونىڭ قارىم - قاتىناسى بەلسەندى دامۋ ارىنىن ساقتاپ، ستراتەگيالىق تىلدەسۋى جيىلەدى، مەملەكەت قورعانىسى حاۋىپسىزدىگى سالاسى تىلدەسۋدەن ناقتى ىستەر سەلبەستىگى كەزەڭىنە ءوتتى، ەكونوميكا - ساۋدا، قارجى قوسۋ جانە نەگىزدىك قۇرىلعىلار سەلبەستىگى ىشكەرىلەي ورىستەتىلىپ، حالىقتىق اۋىس - كۇيىس توتەنشە جيىلەپ، كوپ جاقتى قارىم - قاتىناس اناعۇرلىم قويۋ بولدى. ۆيەتنام جاق باس شۋجي شي جينپيڭ جولداستىڭ ۆيەتنام − جۇڭگو قارىم - قاتىناسى جونىندەگى ەرەكشە سۇيىسپەنشىلىگىن جانە دايەكتى قولداۋىن قاستەرلەيدى، تاباندىلىقپەن جۇڭگومەن قارىم - قاتىناستى دامىتۋدى ۆيەتنامنىڭ وبيەكتيۆ قاجەتى، ستراتەگيالىق تالعامى جانە ماڭداي الدى ورىنداعى ءىسى ەتىپ، ءبىر جۇڭگو ساياساتىن ۇزدىكسىز قولدايدى، جۇڭگو جاقپەن ستراتەگيالىق تىلدەسۋدى جانە جوعارى دەڭگەيلى ستراتەگيالىق ىستەستىكتى كۇشەيتىپ، ەكونوميكا - ساۋدا، قارجى قوسۋ، تەمىر جول سياقتى نەگىزدىك قۇرىلعىلار مەن ساياحات سەلبەستىگىنىڭ دەڭگەيىن ءوسىرىپ، وقۋ - اعارتۋ، باۋلۋ، عىلىم - تەحنولوگيا، گۋمانيتارلىق ىستەر جانە جەرگىلىكتى ورىندار سەلبەستىگىن كۇشەيتىپ، قۇرلىق شەكاراسىن اناعۇرلىم ويداعىداي باسقارۋدى جانە تەڭىزدەگى بەيبىتشىلىكتى قورعاۋدى قالايدى. ۆيەتنام جاق باس شۋجي شي جينپيڭ جولداس العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن جانە الەمدىك باسقارۋ باستاماسىن قولدايدى، جۇڭگو جاقپەن بىرگە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

كەڭەستەن كەيىن ەكى جاق پارتيالار ارا، قوعام حاۋىپسىزدىگى، ءادىليا، ەكونوميكا، ءوندىرىس - قامداۋ تىزبەگى سەلبەستىگى، كەدەن سەلبەستىگى، عىلىم - تەحنولوگيا، حالىق تۇرمىسى، ادام كۇشى بايلىعىن اشۋ، مەديا جانە جەرگىلىكتى ورىندار سياقتى سالالارداعى كوپتەگەن ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.

كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا سۋ لين مەن حانىمى ۋ فاڭليگە ارناپ قارسى الۋ سالتىن وتكىزدى. سۋ لين كەلگەندە قۇرمەت قاراۋىلى قاتار تۇزەپ قۇرمەت ءبىلدىردى. شي جينپيڭ مەن سۋ لين سالتانات مىنبەسىنە شىعىپ، اسكەري وركەستر جۇڭگو مەن ۆيەتنام ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. سۋ لين شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى. ءوسپىرىم بالالار قولدارىنا گۇل شوقتارىن جانە جۇڭگو − ۆيەتنام ەكى ەلدىڭ پارتيا تۋىن، مەملەكەت تۋىن ۇستاپ الاقايلاپ قۇرمەت ءبىلدىردى.

سول كۇنى تۇستە شي جينپيڭ مەن پىڭ لييۋان حالىق سارايىنىڭ جينسى زالىندا سۋ لين مەن ونىڭ حانىمىنا ارناپ قارسى الۋ قوناعاسىن بەردى.

سول كۇنى تۇستەن كەيىن سۋ لين تاعى جۇڭگو كوممۋنيستىك پارتياسىنىڭ تاريح كورمە سارايىن ەكسكۋرسيالادى.

ساي چي، ۋاڭ ي، يىن لي، ۋاڭ شياۋحۇڭ قاتارلىلار قاتىستى قيمىلدارعا قاتىناستى.