انار بۇلت \ شينجياڭ گازەتىنىڭ ءتىلشىسى كاڭ حاۋيان 4 - ايدىڭ 16 - كۇنى ۇرىمجىدەن حابارلايدى. 4 - ايدىڭ 16 - كۇنى سالماعى 560 توننا كەلەتىن 3 - ءنومىرلى گەنەراتور اگراگات روتورىنىڭ ماشينا شۇڭقىرىنا دالمە - ءدال قويىلۋىمەن، شينجياڭ داشىشيا سۋ يگىلىگى تورابى ينجەنەرياسىنىڭ ەڭ سوڭعى گەنەراتور اگراگاتتارىنىڭ وزەكتى بولشەكتەرى ءساتتى ورناتىلىپ بولدى، بۇل وسى ينجەنەريانىڭ ماشينا - ەلەكتر جابدىقتارىن ورناتۋ ينجەنەرياسىندا شەشۋشى ىلگەرىلەۋشىلىككە قول جەتكەندىگىن، بيىل جاپپاي وندىرىسكە قوسىلىپ، ەلەكتر تاراتۋ نىساناسىنا رەسمي ۇمتىلعاندىعىن اڭعارتادى.

داشىشيا سۋ يگىلىگى تورابى قۇرىلىسىنا سيىمدىلىعى 250 مەگاۆاتتىق 3 فازالى ءوستى جارتى شاتىر ءتارىزدى تەڭ قادامدا ەلەكتر تاراتاتىن 3 گەنەراتور اگراگاتى ورناتىلعان، جالپى سيىمدىلىعى 750 مىڭ كيلوۆاتقا جەتەدى، جۇڭگو ەنەرگيا قۇرىلىسى گىجوۋبا ماشينا - ەلەكتر سەرىكتەستىگى ورناتۋ جانە سىناۋ قىزمەتىنە جاۋاپتى بولدى. قازىرگە دەيىن 1 -، 2 - ءنومىرلى گەنەراتور اگراگاتتارى قۇراستىرىلىپ بولدى، 3 - ءنومىرلى گەنەراتور اگراگاتىنىڭ روتورى كرانمەن ءساتتى ورناتىلعاننان كەيىن، گەنەراتور اگراگاتتارىنىڭ جالپى قۇراستىرۋ، سىناۋ كەزەڭىنە وتكەندىگىن كورسەتەدى. ”جوسپار بويىنشا بيىلعى جىلدىڭ سوڭعى جارتىسىندا 3 گەنەراتور اگراگاتىنىڭ بارلىعى وندىرىسكە قوسىلىپ، ەلەكتر تاراتادى“، - دەدى وسى سەرىكتەستىكتىڭ داشىشيا III مەردىگەرلىك بولىگى نىسانىنىڭ جاۋاپتىسى لو شياۋگو.

شينجياڭ داشىشيا سۋ يگىلىگى تورابى ينجەنەرياسى 2019 - جىلدىڭ سوڭىندا جاپپاي قۇرىلىس باستاعان، توسپانىڭ ەڭ بيىك جەرى 247 مەتر بولىپ، قازىر دۇنيە ءجۇزى بويىنشا سالىنىپ بولعان جانە سالىنىپ جاتقان ەڭ بيىك بەتوندى شاعىل تاس توسپا ەسەپتەلەدى. ينجەنەريا سالىنىپ بولعاننان كەيىن ءار جىلى شامامەن 650 مىڭ وتباسىنىڭ ءبىر جىلدىق ەلەكتر قاجەتىن قاناعاتتاندىرىپ، تومەنگى اعارداعى 6 ميلليون 800 مىڭ مۋدان استام سۋارمالى ءوڭىردىڭ سۋ تاپشىلىعى ماسەلەسىن ءونىمدى شەشەدى.